Jơnau Pơnđik 10 - Sră Goh 2018

Ală bơta pơnđik Salômôn dê ( 10:1 – 29:27 ) Sră dơ̆ dùl tơrgòm ală bơta pơnđik Salômôn dê

¹ Do la ală jơnau pơnđik Salômôn dê: Kòn klau jak chài lơh hừh nùs bèp khai, Mơya kòn bơrngơl gơla lơh moat jrùng mè khai in.

² Phan ò song ring ò gơs kwơ dô êt lơi: Mơya bơta song ring dong klàs bơh bơta chơt.

³ Yàng Jehôwa ò lòi hwềng soàn cau song ring lòt jơgloh, Mơya Kơnràñ bơtrơh tơlik bơta kơp kòñ cau iơh bơsak dê.

⁴ Cau alah lơh broă gen gơlik gơs rƀah, Ai tê cau ngac ngar lơh gơlik pas sơm.

⁵ Dô nă kòn tơrgòm prap tòm kơnhai prang la kòn git kơrhia, mơya dô nă kòn bic tòm kơnhai toès la kòn cèng bơta ƀàssìl.

⁶ Bơta ai lơngai mù hơđang bồ cau song ring; Mơya bơr cau iơh bơsak pồn ndơp bơta rhung rhang.

⁷ Kirsơnre cau song ring geh jòng ro; Mơya sơnđan cau iơh bơsak roh thit mo.

⁸ Cau gơs nùs jak chài, dòp leng ală bơta sồr lam, Ai cau gơs bơr tùl gơla rơp gơlik bơta roh rui.

⁹ Cau lơi lòt tòm bơta song ngan gen cơnđòa lòt kơ̆ wền; Ai cau lơi jat gùng rkwet rkwe gen cau rơp jòi bàn.

¹⁰ Cau lơi gơliang mat bơtào bơta kalke; Ai cau lơi đơs jơnau bơrngơl gơla rơp roh rui.

¹¹ Bơr cau song ring la dô nơm croh dà bơta kis; Mơya bơr cau iơh bơsak pồn ndơp bơta rhung rhang.

¹² Bơta gơjrañ mañ gơlik bơta tòmlah tòmring; Ai nùs kòñ gơboh pồn ndơp jơh ală bơta tìs.

¹³ Hơđang bơr sơndồi cau àng jak gơs bơta jak chài; Mơya gai mơng prap lòi ntìng ngkòi cau siơ̆u bơta wă wơng in.

¹⁴ Cau jak chài prap lòi bơta git wă; mơya jơnau đơs cau tùl gơla cèng bơta roh gơprah tus rềp.

¹⁵ Phan mơna cau pas gơs la dô nơm theng kơ̆ cê khai dê; Mơya bơta dồn sa cau rƀah dê la bơta roh rui bol khai in.

¹⁶ Bơta kong bòl glar cau song ring dê lam tus hơ bơta kis: Ai cồng nha cau iơh rmơh dê lam tus hơ tồi glài.

¹⁷ Cau iat jơnau bơto sồr ơm tòm gùng bơta kis; Mơya cau lơi hŭi bơta lah pơrhơng lòt tìs nrah.

¹⁸ Cau pồn bơta gơjrañ mañ gơs sơndồi ma blac; Mơ cau lơi rsìh bơta đơs joh la cau tùl gơla.

¹⁹ Dilah oă jơnau, bơta tìs ò siơ̆u: Mơya cau git kơrhia đơs dô êt jơnau.

²⁰ Lơmpiat cau song ring ò gơkrơi be priă ngan; Ai nùs cau iơh bơsak ò kwơ dô êt lơi.

²¹ Bơr sơndồi cau song ring ròng siam oă cau; Mơya cau tùl gơla chơt tài bơh siơ̆u bơta git wă.

²² Bơta lơngai bơh Yàng Jehôwa dê lơh gơlik pas gơs: Kơnràñ ò bơtơl tai bơta moat jrùng lơi ò.

²³ Cau lơi siơ̆u dơngoh jak sền bơta lơh iơh be kơnhơl; Mơya cau àng jak hừh nùs bơh cau gơs bơta jak chài.

²⁴ Bơta lơi cau iơh bơsak rngòt rngơt, ngan rơp tus hơđang bol khai; Mơya cau song ring rơp geh be nùs he kơp kòñ.

²⁵ Tŭ càl rbut lòt gan, cau iơh bơsak ò gam tai: Mơya cau song ring geh bơtào kơ̆ gam sùm sùm.

²⁶ Be dà sràt kìr sề, be ñhŭ hòi mat, cau lơh alah gơwèt mơ cau sồr khai lòt kung behơ̆.

²⁷ Bơta duh rngòt Yàng Jehôwa bơtơl bơta kis; Ai sơnam kis cau iơh rơp kong koh pơndut.

²⁸ Bơta gơn kơnòm cau song ring rơp tus hơ bơta chò hòp; Ai bơta gơn kơnòm cau iơh bơsak dê rơp roh thit.

²⁹ Gùng lòt Yàng Jehôwa dê be dô nơm theng kìng crŭ cau song ngan in; Mơya gơ la bơta tơnroh cau lơh iơh in.

³⁰ Cau song ring ò tŭ lơi kong gơlơnggơr: Mơya cau iơh ò gam wơl hơđang ù.

³¹ Bơr cau song ring tơnggơs bơta jak chài: Mơya lơmpiat cau ma blac rơp kong sang pơndut.

³² Sơndồi cau song ring git bơta niam nùs; Mơya bơr cau rhung rhang mìng đơs bơta lac lèo.