Jơnau Pơnđik 1 - Sră Goh 2018

Jơnau wàs gùng

¹ Do la ală jơnau pơnđik Salômôn dê, kòn klau Dabit, Bơtau Israel dê:

² Ngui nàng bơtê bơh bơta jak chài mơ jơnau bơto sồr, nàng git wă ală jơnau đơs bơh nùs àng loh;

³ Nàng dòp geh jơnau bơto sồr tòm bơta lơh lòt chài rgơi, Bơta song ring, bơta cahrña song ngan mơ bơta ring bal;

⁴ Nàng bơto bơta chài rgơi cau ƀă liă in, Bơta git jak mơ bơta git kơrhia ală cau pơnu in.

⁵ Lòi ală cau jak chài in kung kơno mơ geh bơtơl bơta git jak, Mơ cau git kơlôi sơwì dòp geh bơta chài rgơi,

⁶ Nàng wă wơng jơnau đơs pơnđik mơ jơnau đơs pơnyơu, Ală jơnau đơs cau jak chài dê bal mơ ală jơnau pơnhồr bol khai dê

⁷ Bơta duh rngòt di Yàng Jehôwa la sơntòm bơta jak chài; Ai ală cau bơrngơl gơla sền òsơp bơta jak chài mơ jơnau bơto sồr.

Bơto tơngkah pal pleh di mpồl cau iơh bơsak

⁸ Ơ kòn añ jê, iat tĕ jơnau bơto sồr bèp mê dê, Mơ bañ sang lòi jơnau bơto mè mê dê;

⁹ Bơh ală jơnau hơ̆ kung be dô nơm dơwàng bơkào hơđang bồ kòn, Gơlơh be ală rơnjài màh wan di ngko kòn dê.

¹⁰ Ơ kòn añ jê, dilah cau glài jòi kai pơndòm ơniai kòn, Bañ lơh jat.

¹¹ Dilah bol khai đơs: “Tus tĕ mơ bol hi, bol he kơp mòc lơh gơhòr mhàm cau, bol he ơm kơp òm nàng lơh iơh di cau ò tìs glài.

¹² Bol he rơp sa loan ris bol khai kung be lơgar làng ƀồc, Sa loan jơh hir kung be cau mù tòm tiah brong jrô.

¹³ Bol he rơp geh tơl ală phan kas màng, Prap bềng ală hìu bol he dê ală phan bol he ntung kơñau.

¹⁴ Ai tĕ pơnah mê ơn bal mơ bol hi, Jơh tơl nă bol he rơp gơs bal mìng dô nơm kơldung priă lơm.”

¹⁵ Ơ kòn añ jê, bañ lòt tòm gùng bol khai dê, Kơrmap gàr jơng kòn bơh di ală gùng dà bol khai dê.

¹⁶ Bơh jơng bol khai dê ntoat tus hơ bơta iơh, Mơ sơrbac sơrbang lơh gơhòr mhàm.

¹⁷ Ngan la ò kwơ tŭ dang bơtơng di đap mat ală sềm;

¹⁸ Bulah behơ̆, bol khai kơp mòc nàng tơnchơt să tòm bol khai! Mơ kơp òm nàng tơnroh is bơta kis bol khai dê.

¹⁹ Hơ̆ la bơta lồi dut kòp nă cau hàm kòñ oă phan mơna; Cồng nha hơ̆ tă bơta kis ală cau dòp geh gơ.

Jơnau hòi jà bơta jak chài dê

²⁰ Bơta jak chài ai jơnau đơs dờng đah bơdìh ƀòn, Ai sap đơs dờng tòm ală ƀlàng dờng tiah pơjum làng bol.

²¹ Khai ai jơnau đơs dờng tòm mum gùng nggồr nggàc, Di bơr ală mpồng ƀòn dờng, khai đơs lah:

²² “Ơ ală cau ƀă liă, bol mê kòñ bơta ƀă liă bol mê dê jơl tus di tŭ lơi taih? Ală cau dơñŏ tơnhial kòñ bơta dơñŏ tơnhial bol mê dê, Mơ ală cau bơrngơl gơla gơjrañ kơuềng di bơta git jak jơl tus di tŭ lơi taih?

²³ Iat tĕ jơnau añ lah pơrhơng; Añ rơp tuh bơta kơlôi sơnơng añ jê bol mê in; Añ rơp lơh bol mê in git ală jơnau đơs añ jê.

²⁴ Tài bơh añ hòi jà mơya bol mê ò bài iat, Añ pò tê mơya ò gơs cau lơi ơn nùs kơlôi.

²⁵ Mơ tài bơh bol mê sang lòi jơh ală jơnau bơto tơngkah añ jê, Ò bài dòp jơnau lah pơrhơng añ jê;

²⁶ Gen tàng tòm tŭ bol mê kong bơta rung rài, añ kung rơp ñŏ; Añ rơp dơñŏ tơnhial tòm tŭ bol mê tìp bơta rngòt rngơt.

²⁷ Tòm tŭ bơta rngòt rngơt tus hơđang bol mê be càl rbut, Bơta rung rài dùh hơđang bol mê be càl wàl bong, Bơta bòl glar moat jrùng mơ bơta kơlôi dơrcul tus hơ bol mê.

²⁸ Gen bol khai rơp hòi rac mơ añ, mơya añ rơp ò ho wơl; Bol khai rơp jơh nùs jòi jat añ mơya ò bàn.

²⁹ Hơ̆ la tài bơh bol khai gơjrañ kơuềng di bơta git jak, Ò sac rwah bơta duh rngòt di Yàng Jehôwa.

³⁰ Kung ò bài iat jơnau bơto tơngkah añ jê. Mơ sền òsơp jơh ală jơnau lah pơrhơng añ jê.

³¹ Behơ̆ tàng bol khai rơp sa plai đo gơlik bơh gùng dà bol khai dê, Mơ geh hừh nùs bơh kai gơrmơ̆i să tòm bol khai dê.

³² Bơh bơta kơldang nùs tơnchơt ală cau ƀă liă, Mơ bơta ai lơh tơl cau bơrngơl gơla dê rơp tơnchơt bol khai.

³³ Mơya cau lơi kòñ iat añ gen rơp geh sền gàr lơngap lơngai, Rơp geh kis ring niam, ò rngòt di bơta rung rài lơi.”