Jơnau Niam Jat Mak 7 - Sră Goh 2018

Bơta rào tê

¹ Tŭ hơ̆ ală cau Pharisi mơ bàr pe nă cau bơto bơta boh lam tus bơh Jerusalem, pơjum gùt dar Yàng Jesu,

² gŏ bàr pe nă cau bơtê Kơnràñ dê sa mơ tê ò goh, hơ̆ la tê òhềt rào.

³ Mơ tai, cau Pharisi mơ làng bol Israel òs kơrmap gàr jơnau òs yau ală cau yau dê, dilah ò rào tê nền gen ò sa.

⁴ Tòm tŭ bol khai cèng phan lơi bơh drà, dilah ò rào lài gen kung ò sa sơl. Bol khai gam mơ kơrmap gàr oă bơta ndai tai, be rào mơngàn mơ gri mơ gri kòng.

⁵ Behơ̆ ală cau Pharisi bal mơ cau bơto bơta boh lam lùp Yàng Jesu lah: “Ñchi bơh tài ală cau bơtê ồng dê ò kơrmap gàr jơnau òs yau ală cau yau dê, ai tê ò goh nàng sa behơ̆ taih?”

⁶ Yàng Jesu ho lah: “Ơ cau ma blac, Esai neh đơs hwơr di ngan bơh bol mê, be neh cih lah, Yàng Tom Trồ đơs lah: ‘Làng bol do dòn duh Añ mơ bơr sơndồi gòi, Mơya nùs bol khai ngài ngan bơh Añ.

⁷ Bơta bol khai duh khoai Añ la ò kwơ, Bơh gùng duh khoai bol khai bơto mìng la bơta òs yau kòn mơnus dê, be la bơta boh lam Yàng Tom Trồ dê.’

⁸ Bol mê sang lòi bơta sồr lam Yàng Tom Trồ dê, mơ kơrmap gàr jơnau òs yau kòn mơnus dê!”

⁹ Yàng Jesu đơs tai lah: “Ală bol mê chài rgơi ngan sang lòi bơta sồr lam Yàng Tom Trồ dê, nàng prap gàr jơnau òs yau bol mê dê.

¹⁰ Bơh Môise neh đơs lah: ‘Dòn duh tĕ mè bèp mê’ mơ tai: ‘Cau lơi wàc sơrpah di mè bèp, gen ngan pal chơt.’

¹¹ Mơya bol mê đơs lah: ‘Dilah cau lơi đơs mơ mè hala bèp lah: Ală bơta lơi mơ añ rgơi ai mè bèp in gen neh la Korban’ (hơ̆ la phan neh ơn Yàng Tom Trồ in rau).

¹² Behơ̆ gen bol mê ò ai gơnoar cau hơ̆ dong kòl bơta lơi mè bèp khai in.

¹³ Behơ̆ bol mê lơh jơnau Yàng Tom Trồ in gơlik ò kwơ tài bơh jơnau òs yau bol mê dê. Bol mê lơh oă broă ndai tai tòm toh behơ̆ sơl.”

Ală bơta lơh cau in ò goh

¹⁴ Chòp Yàng Jesu hòi wơl mpồl làng bol tus mơ đơs lah: “Jơh ală bol mê iat tĕ Añ mơ wă tĕ lah:

¹⁵ Ò gơs phan lơi bơh đah bơdìh mut tòm dơlam cau mơ rgơi lơh ƀơ̆ ƀơl cau hơ̆ in ò, mơya ală phan lơi lik bơh tòm dơlam cau dê, sồng lơh ƀơ̆ ƀơl cau hơ̆ in. [

¹⁶ Cau lơi gơs tồr gen iat tĕ.”]

¹⁷ Tòm tŭ Kơnràñ neh lòi mpồl làng bol mơ mut tòm hìu rau, gen ală cau bơtê lùp Kơnràñ bơh jơnau pơnyơu hơ̆.

¹⁸ Yàng Jesu đơs lah: “Bol mê kung ò gơs bơta git wă rlau sơl ơ? Bol mê òhềt wă lah phan lơi bơh bơdìh mơ mut tòm cau ò rgơi lơh ƀơ̆ ƀơl cau hơ̆ in sơl ơ?

¹⁹ Tài bơh phan hơ̆ ò mut tòm nùs cau ò, mơya mut tòm kơndul gơ dê, gen tơlik sang di tiah.” Behơ̆ Yàng Jesu kòñ đơs lah, jơh ală phan sa la goh lơm.

²⁰ Kơnràñ đơs tai lah: “Bơta lơi lik bơh tòm dơlam cau, sồng lơh ƀơ̆ ƀơl cau hơ̆ in.

²¹ Ngan la bơh tòm dơlam, hơ̆ la bơh tòm nùs cau, sồng gơlik ală bơta kơlôi iơh, rềs àr, ntung kơñau, tơnchơt cau, bơrnàn.

²² Hàm hà, rhung rhang, lac lèo, bung jang, gar mat iơh, tràl sơrbil, pơnhừ să, sơnrang sơnrồng.

²³ Jơh ală bơta iơh bơsak hơ̆ gơlik bơh tòm nùs mơ lơh cau in ƀơ̆ ƀơl.”

Bơta dòn cau ùr Kanaan dê

²⁴ Chòp Yàng Jesu ñă bơh hơ̆, lòt tus hơ kơnhwàl lơgar Tirơ mơ Sidôn. Kơnràñ mut tòm dô nơm hìu, mơ ò bài ai cau in git, mơya ò rgơi pồn ndơp.

²⁵ Tŭ hơ̆ mo gơs dô nă cau ùr gơs kòn ùr dềt kòl cà lơh. Khai neh kơno yal bơh Yàng Jesu gen mut tơmbic să di jơng Kơnràñ.

²⁶ Cau ùr hơ̆ la cau Grek, tòm jơi cau Sirô Phenisi. Khai rac dan mơ Yàng Jesu bơtrơh tơlik cà bơh di kòn ùr khai dê.

²⁷ Yàng Jesu đơs mơ khai lah: “Lài ngan lòi tĕ kòn sau in sa hòm jơh, bơh ò di ai piang lă ală kòn sau dê mơ sang so in.”

²⁸ Cau ùr ho tai lah: “Ơ Yàng, ngan behơ̆, so ơm tòm tiah cơnòng kung geh sa ală phan pìng kòn sau dê.”

²⁹ Chòp Yàng Jesu đơs mơ cau ùr lah: “Tài bơh jơnau hơ̆, rê tĕ; cà neh lik bơh di kòn ùr ai dê rau.”

³⁰ Dơ̆ khai rê hìu, gŏ oh dềt hơ̆ bic di cơnòng mơ cà neh lik bơh di oh hơ̆ rau.

Yàng Jesu sơmbòi cau tĭ

³¹ Yàng Jesu lik bơh kơnhwàl Tirơ, lòt gan Sidôn mơ tus hơ dàlềng Galile, tòm gùng lòt hơ kơnhwàl Dekapôl.

³² Cau cèng dô nă cau tĭ mơ đơs ò loh làng tus hơ Kơnràñ, rac dan mơ Yàng Jesu ơn tê hơđang khai.

³³ Yàng Jesu cèng tơlik is khai ngài bơh mpồl làng bol, lồc behơ̆ ơn ràs tê di trồm tồr khai mơ choh dà diau bong di lơmpiat khai.

³⁴ Chòp Yàng Jesu pò mat hơ trồ, tă nhơm dờng mơ đơs mơ khai lah: “Ephata!” Hơ̆ la: “Pò tơlik tĕ!”

³⁵ Gen tồr khai rgơi kơno mo, lơmpiat gơs lơbơn, khai đơs loh làng.

³⁶ Yàng Jesu bơkơŭ bol khai bañ yal jơnau hơ̆ cau lơi in, mơya Kơnràñ sơlo bơkơŭ gen cau sơlo yal tai jơnau hơ̆.

³⁷ Ală bol khai ai lơh crih crài oă ngan mơ đơs lah: “Kơnràñ lơh jơh ală broă gơs niam lơm: Lơh cau tĭ gơs kơno, cau kloat kơmlo gơs đơs!”