Jơnau Niam Jat Mak 6 - Sră Goh 2018

Yàng Jesu tòm Nasaret

¹ Yàng Jesu ñă lòt bơh tềng hơ̆ mơ rê hơ ƀòn tòm Kơnràñ dê; gơs ală cau bơtê lòt jat bal sơl.

² Tus dê ngai Saƀat, Kơnràñ rơp sơntòm bơto sồr tòm hìu jum cau Juda. Oă cau gơs mat tềng hơ̆, kơno Kơnràñ bơto gen ai lơh crih crài mơ đơs lah: “Mbơh cau do geh ală bơta do taih? Bơta jak chài mơ khai dòp geh hơ̆ la ñchi, mơ mbe lơi tê khai lơh gơs ală broă gơnap gơnoar behơ̆ taih?

³ Cau do ò di la cau chài lơh chi, kòn klau Mari dê, oh mi mơ Jakơ, Jôsep, Jude mơ Simôn dê ò ơ? Ò di ală oh ùr khai dê ơm digùl bol he ò ơ?” Gen bol khai ò dòp Kơnràñ.

⁴ Mơ Yàng Jesu đơs mơ bol khai lah: “Cau gơnoar hwơr geh cau ki ngàm tòm ală tiah ndai, mơya mìng tòm ƀòn tòm khai, gơp bơtiàn khai, mơ tòm hìu nhă sền òsơp di khai.”

⁵ Tềng hơ̆ Kơnràñ ò rgơi lơh broă gơnap gơnoar lơi ò, mìng ơn tê sơmbòi bàr pe nă cau kòp jê.

⁶ Kơnràñ ai lơh krơi bơh bơta ò dòn bol khai dê. Lồc behơ̆ Kơnràñ lòt làm jơh ală ƀòn gùt dar mơ bơto sồr.

Jơt bàr nă cau bơtê geh sồr lòt

⁷ Gen Yàng Jesu hòi jơt bàr nă cau bơtê tus, sơntòm sồr lòt dô yô dô yô, ai bol khai in gơs gơnoar hơđang ală cà.

⁸ Kơnràñ sồr bol khai tòm tŭ lòt gùng bañ cèng phan lơi, piang lă hala kơldung hala jền priă tòm che but, cèng mìng dô nơm gai jra lơm,

⁹ jă mìng gơltau jă, bañ soh bàr blah ào.

¹⁰ Kơnràñ kung đơs lah: “Hìu lơi bol mê rơp mut gen kư̆ ơm tĕ tềng hơ̆ jơl tus di tŭ ñă lòt.

¹¹ Tiah lơi cau ò bài wă rò bol mê mơ ò bài iat jơnau bol mê dê, tòm tŭ lik bơh hơ̆, gen rtuh tĕ thul bơh di jơng bol mê dê nàng lơh cơng tơrwơl di bol khai.”

¹² Behơ̆ ală cau bơtê lik lòt bơto yal lah, jơh tơl nă pal gơjrañ sang glài.

¹³ Bol khai bơtrơh oă cà, bong mơñà oă cau kòp jê in mơ sơm bol khai in geh bòi.

Jang Ƀaptis chơt

¹⁴ Mơ tai, bơtau Herôt kơno đơs bơh Yàng Jesu, tài bơh sơnđan Kơnràñ neh tiơng pơnro làm jơh. Gơs cau đơs lah: “Jang Ƀaptis neh kis wơl bơh bơta chơt, gen tàng khai rgơi lơh ală broă gơnap gơnoar hơ̆.”

¹⁵ Cau ƀà đơs lah: “Hơ̆ la Eli;” cau ƀà tai đơs lah: “Hơ̆ la cau gơnoar hwơr kung be dô nă tòm ală cau gơnoar hwơr rài yau.”

¹⁶ Mơya dơ̆ Herôt kơno behơ̆ gen đơs lah: “Hơ̆ la Jang cau mơ añ neh sồr koh bồ, khai neh kis wơl.”

¹⁷ Bơh să tòm Herôt neh sồr cau kup cap Jang krơ̆ tòm hìu jàm, tài bơh Herôdias la bau ùr Philip, oh Herôt dê, mơ Herôt neh bau mơ khai.

¹⁸ Bơh Jang neh ràc Herôt lah: “Bơtau ò geh gơnoar bau mơ bau ùr oh bơtau dê.”

¹⁹ Herôdias gơjrañ di Jang, kòñ tơnchơt khai, mơya ò rgơi,

²⁰ bơh Herôt rngòt di Jang, mơ git khai la dô nă cau song ring mơ sàng goh, gen bơtau sền gàr khai. Herôt kòñ iat Jang đơs, mơya dơ̆ kơno jơnau khai dê rau, gen bơtau ò suk ơm ngan.

²¹ Di tŭ lơmpah gơtìp di ngai pơjum sa kah ngai deh Herôt dê, khai yò bơta ñô sa mho jà ală cau kwang dờng, ală cau at bồ ling, bal mơ ală cau dờng màng tòm Galile.

²² Să tòm kòn ùr Herôdias dê mut tòmya, lơh Herôt bal mơ ală cau ơm ñô sa in niam nùs. Cau bơtau đơs mơ kòn ùr hơ̆ lah: “Dan tĕ mơ añ bơta lơi ai kòñ gen añ rơp ai.”

²³ Bơtau Herôt srat să ho mơ khai lah: “Phan lơi ai dan gen añ kung rơp ai lơm, bulah dan nggùl lơgar añ jê añ kung ai sơl.”

²⁴ Khai lik bơh hơ̆, lùp mè lah: “Ñchi kòn kòñ dan taih?” Mè ho lah: “Bồ Jang Ƀaptis dê.”

²⁵ Tŭ hơ̆ mo khai sơrbac sơrbang mut wơl mơ cau bơtau mơ dan lah: “Tŭ do añ kòñ bơtau ai mo añ in bồ Jang Ƀaptis ơn tòm sơlào.”

²⁶ Cau bơtau moat jrùng ngan, mơya tài bơh ală jơnau srat să khai dê mơ tài bơh di đap ală cau nac ñô sa, gen ò rgơi ò ai khai in.

²⁷ Bơtau sồr dô nă cau ling kơp gàr lòt, mơ cèng brê bồ Jang dê. Cau hơ̆ lòt koh bồ Jang tòm hìu jàm,

²⁸ ơn bồ tòm sơlào, cèng ai kòn ùr in, mơ kòn ùr cèng ai mè khai in.

²⁹ Tòm tŭ cau bơtê Jang dê kơno jơnau hơ̆ gen lòt tus ai ƀồc mơ tơp tòm bơtô.

Yàng Jesu lơh piang lă gơlik gơs oă dơ̆ sơnròp

³⁰ Ală cau gơnoar bơto dờng rê wơl mơ pơjum gùt dar Yàng Jesu, mơ yal Kơnràñ in jơh ală bơta bol khai neh lơh mơ bơto.

³¹ Bơh gơs cau lòt rê oă ngan tian gơs Yàng Jesu mơ ală cau bơtê ò gơs tŭ nàng sào. Gen Kơnràñ đơs mơ bol khai lah: “Lik lòt tĕ pleh tòm tiah ngềt ngơt nàng rlô bòl dô êt.”

³² Behơ̆ Kơnràñ mơ ală cau bơtê mut tòm ơhò nàng lòt pleh tòm tiah ngềt ngơt.

³³ Mơya gơs oă cau gŏ bol khai lòt gen git đal, mơ ntoat lòt jơng bơh di jơh ală ƀòn dờng tus lài di tiah Yàng Jesu mơ cau bơtê rơp lòt.

³⁴ Tŭ Yàng Jesu lik bơh ơhò, gŏ mpồl làng bol oă gen nđàc sơngit di bol khai, bơh bol khai gơlơh be belàt ò gơs cau ê. Gen Kơnràñ sơntòm bơto sồr bol khai oă bơta.

³⁵ Trồ neh mho, ală cau bơtê lòt tus hơ Kơnràñ mơ đơs lah: “Tiah do ngềt ngơt mơ trồ neh mho rau.

³⁶ Dan ai mpồl làng bol in lòt tòm ală ƀòn dềt mơ tòm ală ƀòn gùt dar do nàng rwat phan sa.”

³⁷ Yàng Jesu ho lah: “Să tòm bol mê ai tĕ bol khai in sa.” Cau bơtê đơs lah: “Bol hi rơp lòt rwat piang lă tus di bàr rhiang dơnie ai bol khai in sa ơ?”

³⁸ Yàng Jesu lùp bol khai lah: “Bol mê gơs nđò nơm piang lă taih? Lòt tĕ sền.” Dơ̆ cau bơtê neh sền rau, gen ho lah: “Pram nơm piang lă mơ bàr nơm ka.”

³⁹ Gen Kơnràñ sồr cau bơtê rơndap làng bol nggui jat sèng hơđang ñhơt tơlir.

⁴⁰ Ală cau hơ̆ nggui mơ sèng, sèng ƀà dô rhiang, sèng ƀà pram jơt.

⁴¹ Gen Yàng Jesu ai pram nơm piang lă mơ bàr nơm ka hơ̆, pò mat hơ trồ mơ ưnngài Yàng Tom Trồ, gen dơrkă piang lă tong ală cau bơtê in, nàng tòmpà mpồl làng bol in, mơ tai, kung tòmpà bàr nơm ka jơh ală bol khai in sơl.

⁴² Jơh tơl nă sa hòm lơm.

⁴³ Cau dòñ bềng jơt bàr bài ală pet piang lă mơ ka tơngkah.

⁴⁴ Ntum khà cau klau sa piang lă hơ̆ pơgap pram rbô nă.

Yàng Jesu lòt hơđang nha dàlềng

⁴⁵ Tŭ hơ̆ mo Yàng Jesu chồl ală cau bơtê mut tòm ơhò, tiă lài đah bơtĭ ne dàlềng tus hơ Betsaida tòm tŭ Kơnràñ ai mpồl làng bol in rê.

⁴⁶ Dơ̆ Kơnràñ neh tơngac làng bol rau gen guh hơđang mơnơm nàng hòi dan.

⁴⁷ Tus di mang, ơhò neh tus digùl dàlềng, ai Yàng Jesu gen ơm is dô nă hơđang ù.

⁴⁸ Kơnràñ gŏ cau bơtê wàs bòl glar ngan, tài bơh càl khồm sơlơ̆u. Pơgap di di pe jơ mơ prau jơ drim, Kơnràñ lòt hơđang nha dàlềng mơ tus hơ bol khai, mơ kòñ lòt sơrlèt lài sơl.

⁴⁹ Dơ̆ ală cau bơtê gŏ Kơnràñ lòt hơđang nha dàlềng gen tồnlah dô nơm cà mu, gen driau dờng,

⁵⁰ bơh jơh tơl nă rngòt rngơt tòm tŭ gŏ Kơnràñ. Kơnràñ đơs mo mơ bol khai lah: “Kơ̆ tĕ nùs, Añ do; bañ rngòt.”

⁵¹ Chòp Kơnràñ mut tòm ơhò bal mơ bol khai, gen càl thit ngềt. Bol khai sơlo ai lơh crih crài oă ngan,

⁵² bơh ò git wă loh làng bơta krơi bơh ală piang lă, ai pram rbô nă cau sa, tài bơh nùs bol khai gam kră kơldang.

Yàng sơmbòi cau kòp jê tòm Genesaret

⁵³ Tŭ neh tiă dàlềng rau, gen bol khai tus tòm ù tiah Genesaret mơ dơh ơhò di gah.

⁵⁴ Dơ̆ bol khai lik bơh ơhò, làng bol đal git Yàng Jesu mo,

⁵⁵ behơ̆ bol khai ntoat làm gùt dar kơnhwàl hơ̆, tùng ală cau kòp bic hơđang cơnòng cèng tus hơ tiah lơi bol khai kơno Kơnràñ ơm.

⁵⁶ Tiah lơi Yàng Jesu lòt tòm ală ƀòn, ƀòn dờng hala ƀòn dềt, gen cau cèng cau kòp jê ơn tòm ală drà, mơ rac dan mơ Kơnràñ ai khai in mìng ƀư di tiang ào Kơnràñ lơm. Cau lơi ƀư gen geh bòi jơh.