Jơnau Niam Jat Mak 5 - Sră Goh 2018

Yàng Jesu bơtrơh cà bơh di dô nă cau Jerase

¹ Yàng Jesu bal mơ ală cau bơtê tus đah bơtĭ ne dàlềng Galile, tòm kơnhwàl làng bol Jerase.

² Yàng Jesu lik bơh ơhò, gen tŭ hơ̆ mo gơs dô nă cau kòl cà lơh lik bơh tiah bơtô ƀồc nàng tìp Kơnràñ.

³ Khai òs ơm di tiah bơtô ƀồc, ò gơs cau lơi rgơi cap khai bulah ai sreng lòs;

⁴ bơh neh oă dơ̆ khai kòl cau tơndò gơsàng hala cap mơ che sreng sơl, gen khai gơltac sreng mơ dơrkă gơsàng hơ̆, ò gơs cau lơi gơs tơl pràn nàng geh at bồ khai.

⁵ Khai òs ơm sùm di tiah bơtô ƀồc mơ hơđang mơnơm, ngai mơ mang hòi driau mơ ai lŭ còr să tòm.

⁶ Khai gŏ Yàng Jesu bơh ngài, gen ntoat tus cùn khoai Kơnràñ,

⁷ mơ hòi driau dờng lah: “Ơ Yàng Jesu, Kòn Yàng Tom Trồ Hơđang Rlau Jơh, gơs ñchi jơnau digùl añ mơ Kơnràñ taih? Añ ai sơnđan Yàng Tom Trồ nàng rac dan mơ Kơnràñ dan bañ lơh bòl glar di añ.”

⁸ Bơh Yàng Jesu pa đơs mơ khai lah: “Ơ cà, lik tĕ bơh di cau do.”

⁹ Kơnràñ lùp lah: “Ñchi sơnđan mê taih?” Khai ho lah: “Sơnđan añ la mpồl ling, bơh bol hi gal ngan.”

¹⁰ Gơ rac dan tai mơ Kơnràñ bañ bơtrơh bol gơlik bơh kơnhwàl hơ̆.

¹¹ Tŭ hơ̆ gơs dô mpồl sur oă ngan ơm sa rềp hơđang dòr.

¹² Ală cà rac dan mơ Kơnràñ lah: “Dan ai bol hi in mut tòm ală sur hơ̆.”

¹³ Yàng Jesu ai gơnoar bol gơ in. Ală cà lik bơh di cau hơ̆, gen mut tòm mpồl sur; mpồl sur hơ̆ pơgap di bàr rbô nơm, bơh kơh ntruñ tòm dàlềng, dà bŭ chơt jơh.

¹⁴ Ală cau ê sur ntoat dô, yal wơl jơnau do tòm ƀòn dờng mơ tòm ƀòn dềt. Ƀòn lơgar lik lòt nàng sền bơta neh gơlik gơs hơ̆.

¹⁵ Tòm tŭ bol khai tus hơ Yàng Jesu, gŏ cau neh gơkòl mpồl cà lơh hơ̆ ơm nggui, soh ồi ào, dơngoh jak niam be òs, gen bol khai rngòt rngơt ngan.

¹⁶ Ală cau neh gŏ broă hơ̆ yal wơl bol khai in git jơnau neh gơlik gơs di cau neh gơkòl ală cà lơh mơ di mpồl sur hơ̆.

¹⁷ Chòp bol khai rac dan mơ Kơnràñ lik bơh nhàr kơnhwàl lơgar bol khai dê.

¹⁸ Tòm tŭ Kơnràñ rơp mut tòm ơhò, gen cau neh gơkòl ală cà lơh hơ̆ dan lòt jat Kơnràñ.

¹⁹ Mơya Yàng Jesu ò ai, mơ đơs lah: “Rê tĕ hơ hìu mê, tòm tiah gơp bơtiàn mê, mơ yal wơl bol khai in bơta dờng màng ò git nđò mơ Yàng neh lơh mê in, mơ mbe lơi Kơnràñ neh kòñ nđàc di mê.”

²⁰ Behơ̆ khai lòt yal tơlik tòm kơnhwàl Dekapôl ală bơta dờng màng ò git nđò mơ Yàng Jesu neh lơh khai in. Jơh ală cau ai lơh krơi ngan.

Kòn ùr Jeru dê mơ cau ùr kòp pìng mhàm

²¹ Tòm tŭ Yàng Jesu mut tòm ơhò mơ neh tiă wơl tus đah bơtĭ ne dà, gơs mpồl làng bol oă pơjum gùt dar Kơnràñ; Kơnràñ ntào di gah dàlềng.

²² Jeru la dô nă cau at bồ hìu jum Juda lòt tus, gŏ Yàng Jesu, gen tơmbic să di jơng Kơnràñ,

²³ rac dan lah: “Kòn ùr dềt añ neh mòr chơt rau; dan Kơnràñ tus ơn tê hơđang khai nàng khai in gơs bòi mơ kis.”

²⁴ Yàng Jesu lòt bal mơ khai. Mpồl làng bol oă lòt jat bal mơ ntềt Kơnràñ.

²⁵ Mơ tai, gơs dô nă cau ùr kòp pìng mhàm neh jơt bàr nam rau,

²⁶ kong bòl glar ngan tòm tê oă cau gơnoar sơnơm, roh jơh jền priă phan mơna, mơya ò bòi dô êt lơi, ai kòp sơlo kơnjơ̆ rlau tai.

²⁷ Khai neh kơno yal bơh Yàng Jesu, gen khai ntềt mut bơh tơnơ̆ tòm gùl mpồl làng bol mơ ƀư di ào Kơnràñ.

²⁸ Bơh khai đơs is lah: “Dilah añ mìng ƀư di ào Kơnràñ gen añ rơp geh bòi.”

²⁹ Tŭ hơ̆ mo mhàm ò pìng tai. Khai git tòm să khai neh geh bòi rau.

³⁰ Tŭ hơ̆ mo Yàng Jesu git gơs gơnap gơnoar neh lik bơh Kơnràñ, gen wơlke hơ mpồl làng bol mơ lùp lah: “Ñcau neh ƀư di ào Añ taih?”

³¹ Ală cau bơtê ho lah: “Kơnràñ gŏ mpồl làng bol ntềt Kơnràñ mơ Kơnràñ gam lùp wơl lah: ‘Ñcau neh ƀư di Añ taih?’”

³² Mơya Yàng Jesu sền gùt dar nàng jòi ñcau neh lơh bơta hơ̆.

³³ Cau ùr git bơta neh gơlik gơs di khai gen rngòt rơm să, lòt tus tơmbic să di jơng Kơnràñ mơ yal song jơh ală bơta.

³⁴ Yàng Jesu đơs mơ khai lah: “Ơ kòn ùr, bơta dòn ai neh sơmbòi ai. Rê tĕ lơngap lơngai, mơ geh bòi tĕ kòp ai dê.”

³⁵ Tòm tŭ Yàng Jesu gam đơs jơnau do, gơs cau bơh hìu jum Jeru tus đơs mơ khai lah: “Kòn ùr ồng neh chơt rau, ñchi kòñ lơh tơmbòl tai Cau Bơto taih?”

³⁶ Mơya Yàng Jesu ò gơjal bơh jơnau hơ̆ gen đơs mơ khai lah: “Bañ rngòt, mìng dòn lơm.”

³⁷ Gen Kơnràñ ò ai cau lơi in jat Kơnràñ, mìng Pier, Jakơ mơ Jang la oh Jakơ dê lơm.

³⁸ Dơ̆ neh tus hơ hìu cau at bồ hìu jum Jeru, Kơnràñ gŏ dô mpồl cau lơh nggồr nggàc, cau ƀà ñìm, cau ƀà hòi driau pơt wòl.

³⁹ Neh mut tòm hìu rau, Kơnràñ đơs mơ bol khai lah: “Ñchi bơh tài bol mê lơh nggồr nggàc mơ ñìm rac behơ̆ taih? Oh dềt do ò chơt ò, mơya khai bic lơhă gơ dê.”

⁴⁰ Bol hơ̆ dơñŏ tơnhial di Kơnràñ. Behơ̆, Kơnràñ bơtrơh tơlik jơh ală bol khai, mơ cèng mè bèp oh dềt hơ̆ bal mơ pe nă cau bơtê Kơnràñ dê mut tòm ơdŭ tiah oh dềt bic.

⁴¹ Kơnràñ at di tê khai mơ đơs lah: “Talitha koumi!” Gơtha la: “Ơ kòn ùr, Añ sồr ai guh tĕ!”

⁴² Tŭ hơ̆ mo oh ùr hơ̆ guh mơ cơnđòa lòt, bơh khai neh tơl jơt bàr nam. Ală bol hơ̆ ai lơh crih crài oă ngan.

⁴³ Mơya Yàng Jesu bơkơŭ kràñ cê ală bol hơ̆ bañ yal cau lơi in git bơta hơ̆, mơ sồr ai oh ùr hơ̆ in sào.