Jơnau Niam Jat Mak 3 - Sră Goh 2018

Yàng Jesu sơmbòi cau siar tê

¹ Yàng Jesu mut wơl tòm hìu jum cau Juda, tềng hơ̆ gơs dô nă cau klau siar mpàng tê.

² Bol khai kơp sền Kơnràñ sơmbòi cau hơ̆ tòm ngai Saƀat hala ò, nàng yă Kơnràñ.

³ Yàng Jesu đơs mơ cau siar mpàng tê lah: “Ñă tĕ, ntào digùl do.”

⁴ Lồc behơ̆ Kơnràñ lùp bol khai lah: “Tòm ngai Saƀat geh gơnoar lơh broă niam hala broă iơh, dong klàs bơta kis hala tơnroh gơ taih?” Mơya bol khai ơm mŏ mŏ.

⁵ Tŭ hơ̆ Kơnràñ sền làm di bol khai, gơjrañ mơ moat tài bơh nùs bol khai kră kơldang mơ tìs nrah, lồc behơ̆ Kơnràñ đơs mơ cau klau lah: “Pò tĕ tê mê dê.” Gen khai pò tê mơ gơ bòi.

⁶ Tŭ hơ̆ mo ală cau Pharisi lik hơ bơdìh mơ bơyai bal mơ bơnòr cau Herôt dê nàng mbe lơh tồ tơnchơt Kơnràñ.

Mpồl làng bol di gah dàlềng Galile

⁷ Yàng Jesu mơ ală cau bơtê Kơnràñ pleh lòt hơ gah dàlềng; gơs mpồl làng bol oă ngan bơh lơgar Galile lòt tus jat Kơnràñ. Bơh lơgar Jude.

⁸ Jerusalem, lơgar Idume, lơgar đah ne hiòng Jordan, gùt dar Tirơ mơ Sidôn, kung gơs làng bol gal ngan kơno yal ală broă Kơnràñ lơh gen lòt tus hơ Kơnràñ.

⁹ Tài bơh làng bol oă ngan gen tàng Kơnràñ sồr cau bơtê rcang Kơnràñ in dô nơm ơhò dềt nàng Kơnràñ geh klàs bơh làng bol ntềt.

¹⁰ Bơh Kơnràñ neh sơmbòi oă cau kòp jê gen tàng cau lơi gơs bơta kòp jê lơi kung ntềt sơrlèt nàng ƀư di Kơnràñ.

¹¹ Kòp dơ̆ ală cà gŏ Kơnràñ gen tơmbic să dê jơng Kơnràñ mơ hòi driau lah: “Kơnràñ la Kòn Yàng Tom Trồ!”

¹² Mơya Kơnràñ bơkơŭ bol gơ, ò ai yal cau lơi in git Kơnràñ.

Yàng Jesu sac rwah jơt bàr nă cau bơtê

¹³ Chòp Yàng Jesu guh hơđang mơnơm, hòi ală cau jat nùs Kơnràñ kòñ, gen ală cau hơ̆ lòt tus hơ Kơnràñ.

¹⁴ Kơnràñ sac rwah jơt bàr nă sơnđan la cau gơnoar bơto dờng. Kơnràñ đơs mơ bol khai lah: “Añ sac rwah bol mê nàng ơm bal mơ Añ, mơ sồr lòt bơto yal,

¹⁵ mơ ai gơnap gơnoar bol mê in bơtrơh cà.”

¹⁶ Do la jơt bàr nă cau gơnoar bơto dờng mơ Kơnràñ neh sac: Simôn Kơnràñ sơnđan wơl la Pier,

¹⁷ Jakơ kòn Sebede, mơ Jang la oh Jakơ dê, Kơnràñ sơnđan wơl bàr nă bol khai la Bôanerges, cih tơlik hơ̆ la ală kòn klau ntơr kơnàs dê;

¹⁸ Andre, Philip, Bathelemi, Mathiơ, Thôma, Jakơ kòn Alphe, Thade, Simôn cau Kanaan,

¹⁹ mơ Juda Iskariôt, la cau pơrlơ̆ dră dê Kơnràñ.

Yàng Jesu mơ Beeljebul

²⁰ Yàng Jesu mut tòm dô nơm hìu. Mpồl làng bol pơjum tai, tian gơs Kơnràñ mơ ală cau bơtê ò rgơi sào.

²¹ Ală cau tòm hìu nhă Kơnràñ dê kơno behơ̆ gen tus nàng kup gàr Kơnràñ, bơh bol khai đơs lah: “Kơnràñ neh roh dơngoh jak rau.”

²² Ai ală cau bơto bơta boh lam mù bơh Jerusalem đơs lah: “Cau do kòl Beeljebul lơh, khai kơnòm di bơtau cà mơ bơtrơh cà.”

²³ Mơya Yàng Jesu hòi bol khai lòt tus, ai jơnau pơnyơu mơ đơs lah: “Mbe cà Satan rgơi bơtrơh Satan taih?

²⁴ Dilah lơgar lơi tòmcah is gen lơgar hơ̆ ò rgơi kơ̆ tai,

²⁵ mơ dilah hìu lơi tòmcah is gen hìu hơ̆ kung ò rgơi kơ̆ tai.

²⁶ Behơ̆ dilah lơgar cà Satan bơtào tòmsò is mơ tòmcah is gen ò gơs kơ̆ tai ò, mơya neh tus di lồi dut rài gơ rau.

²⁷ Ò gơs cau lơi rgơi mut tòm hìu cau pràn kơldang mơ phà kơñau phan, dilah lài ngan ò cap cau pràn hơ̆, gen sồng geh phà kơñau hìu khai dê.

²⁸ Añ đơs ngan mơ bol mê, jơh ală tồi glài rơp geh toh kòn sau jơi kòn mơnus in, mơ jơh ală jơnau tràl sơrbil bol khai đơs kung behơ̆ sơl;

²⁹ mơya cau lơi đơs tràl sơrbil di Yàng Hwềng Goh gen ò gơs tŭ lơi geh toh glài ò, mơya gơkòl glài gam sùm sùm.”

³⁰ Yàng Jesu đơs behơ̆ tài bơh bol hơ̆ đơs lah: “Khai kòl cà lơh.”

Mè mơ oh mi Yàng Jesu dê

³¹ Mè mơ oh mi Yàng Jesu lòt tus, ntào hơ bơdìh mơ sồr cau hòi Kơnràñ.

³² Mpồl làng bol nggui gùt dar Yàng Jesu, đơs mơ Kơnràñ lah: “Ne, mè mơ oh mi ồng dê ntào bơdìh jòi ồng.”

³³ Mơya Yàng Jesu ho lah: “Ñcau la mè mơ oh mi Añ taih?”

³⁴ Kơnràñ sền làm ală cau nggui gùt dar mơ đơs lah: “Do la mè Añ mơ oh mi Añ!

³⁵ Bơh cau lơi lơh jat nùs kòñ Yàng Tom Trồ dê, cau hơ̆ la oh mi, ruh lŏ mơ mè Añ jê.”