Jơnau Niam Jat Mak 2 - Sră Goh 2018

Yàng Jesu sơmbòi cau gơlte

¹ Dô êt ngai tơnơ̆, Yàng Jesu rê wơl hơ Kapenaum, mơ cau kơno yal lah Kơnràñ ơm tòm hìu.

² Bol khai pơjum tềng hơ̆ gal ngan tian gơs di bơr mpồng kung ò tai ha sơl. Kơnràñ bơto yal jơnau Yàng bol khai in.

³ Tŭ hơ̆ gơs poan nă cau tùng dô nă cau gơlte tus hơ Yàng Jesu.

⁴ Tài bơh gơs cau oă ir, bol khai ò rgơi tus rềp mơ Kơnràñ, gen pò rkàng hìu tòm toh di tiah Yàng Jesu ơm, mơ tơmù cơnòng cau gơlte bic bơh di trồm hơ̆.

⁵ Yàng Jesu gŏ bơta dòn bol khai dê gen đơs mơ cau gơlte lah: “Ơ kòn, tồi glài mê neh geh toh.”

⁶ Gơs bàr pe nă cau bơto bơta boh lam nggui tềng hơ̆, kơlôi is tòm nùs lah:

⁷ “Ñchi bơh tài cau do đơs behơ̆ taih? Khai đơs tràl sơrbil ngan! Rlau mơ dô Bơtau la Yàng Tom Trồ, ñcau rgơi toh glài taih?”

⁸ Tòm hwềng nùs Yàng Jesu git bol khai bơyai bal behơ̆, gen đơs mo lah: “Ñchi bơh tài bol mê kơlôi is tòm nùs behơ̆ taih?

⁹ Jat bol mê gen đơs mơ cau gơlte lah: ‘Tồi glài mê neh geh toh,’ hala đơs: ‘Ñă ntào tĕ, at cơnòng mê mơ lòt;’ jơnau lơi la ƀuơn rlau taih?

¹⁰ Mơya nàng bol mê in git lah Kòn Mơnus gơs gơnoar toh glài hơđang ù,” gen Kơnràñ đơs mơ cau gơlte lah:

¹¹ “Añ sồr mê, ñă ntào tĕ, at cơnòng mơ rê hìu mê.”

¹² Tŭ hơ̆ mo cau gơlte ñă ntào, at cơnòng mơ lik lòt tian gơs cau lơi kung ai lơh crih crài, jòng ro Yàng Tom Trồ mơ đơs lah: “Bol hi òhềt gŏ broă be do ò.”

Yàng Jesu hòi Lebi - Bơta ơt sa

¹³ Tŭ hơ̆ Yàng Jesu rê wơl hơ gah dàlềng Galile, jơh mpồl làng bol lòt tus hơ Kơnràñ, mơ Kơnràñ bơto sồr bol khai.

¹⁴ Tòm tŭ lòt gan, Kơnràñ gŏ Lebi kòn Alphe nggui tòm tiah boh dia, gen đơs mơ khai lah: “Jat tĕ Añ.” Khai ñă ntào mơ jat Kơnràñ.

¹⁵ Mơ tai, tòm tŭ Yàng Jesu nggui sào tòm hìu Lebi, gơs oă cau dar dia mơ cau glài lòt jat Yàng Jesu mơ oă cau tòm bol khai nggui bal mơ Kơnràñ mơ ală cau bơtê Kơnràñ dê.

¹⁶ Ală cau bơto bơta boh lam đah jơi cau Pharisi gŏ Kơnràñ sào bal mơ cau dar dia mơ cau glài, gen đơs mơ ală cau bơtê Kơnràñ dê lah: “Ñchi bơh tài khai ñô sa bal mơ cau dar dia mơ cau glài taih?”

¹⁷ Yàng Jesu kơno behơ̆ gen đơs mơ bol khai lah: “Cau pràn kơldang ò càng cau gơnoar sơnơm ò, mơya la cau kòp jê; Añ tus ò di nàng hòi cau song ring ò, mơya nàng hòi cau glài.”

Jơnau lùp bơh bơta ơt sa

¹⁸ Mơ tai, cau bơtê Jang dê mơ cau Pharisi ơt sa. Gơs cau lòt tus lùp Yàng Jesu lah: “Ñchi bơh tài cau bơtê Jang dê mơ cau bơtê cau Pharisi dê ơt sa, ai cau bơtê ồng dê ò ơt sa taih?”

¹⁹ Yàng Jesu đơs lah: “Tòm tŭ cau bơrtơu gam ơm mơ oh mi bơyô he, gen bol khai rgơi ơt sa sơl ơ? Cau bơrtơu gam ơm mơ bol khai kàr lơi gen bol khai ò rgơi ơt sa jơl tus kàr hơ̆.

²⁰ Mơya tus di tŭ cau bơrtơu pal lik bơh di bol khai, gen tòm ngai hơ̆ sồng bol khai rơp ơt sa.

²¹ Ò gơs cau lơi ai bài pa mơ jing tơmbồl di ào yau; dilah lơh behơ̆ gen pet bài pa rơp lơh gơprơt sèt ào yau, mơ tiah sèt gơlik iơh rlau tai.

²² Kung ò gơs cau lơi tròc tơrnòm pa tòm nhồng gơltau yau, dilah lơh behơ̆ gen tơrnòm lơh bơcah nhồng, tơrnòm roh mơ nhồng kung ò gam sơl; mơya cau tròc tơrnòm pa tòm nhồng gơltau pa.”

Jơnau lùp bơh ngai Saƀat

²³ Di di ngai Saƀat, Yàng Jesu lòt gan sre kòi mi; tòm tŭ lòt gùng, cau bơtê Kơnràñ ròs kòi mi.

²⁴ Chòp ală cau Pharisi đơs mơ Kơnràñ lah: “Sền ne, ñchi bơh tài ală cau bơtê ồng dê lơh bơta ò geh gơnoar lơh tòm ngai Saƀat?”

²⁵ Yàng Jesu ho lah: “Bol mê òhềt tŭ lơi sền sră cih bơh broă Dabit lơh tòm tŭ khai mơ ală cau lòt jat khai gơtìp ò tơl phan sa mơ jơgloh ò ơ?

²⁶ Tòm rài Abiatha la cau gơnoar dờng lam bồ ơn phan duh khoai, Dabit mut tòm hìu Yàng Tom Trồ dê, sa piang lă ơn pơdơng mơ kung ai ală cau jat khai in sa sơl, la piang lă mơ ò gơs cau lơi geh gơnoar sa, lòi mìng ală cau gơnoar ơn phan duh khoai in lơm.”

²⁷ Yàng Jesu đơs tai lah: “Ngai Saƀat neh geh bơtào gơs tài bơh niam kòn mơnus in, ò di kòn mơnus neh geh crơng gơs tài bơh ngai Saƀat.

²⁸ Behơ̆ gen Kòn Mơnus kung la Yàng ngai Saƀat dê sơl.”