Jơnau Niam Jat Mak 15 - Sră Goh 2018

Yàng Jesu di đap Pilat

¹ Tòm tŭ rìng àng, ală cau gơnoar lam bồ ơn phan duh khoai, bơyai bal mơ ală cau kwang kra, ală cau bơto bơta boh lam mơ jơh Mpồl Kwang Tơrña, bol khai cap Yàng Jesu mơ cèng jào Pilat in.

² Pilat lùp Kơnràñ lah: “Mê ngan la Bơtau làng bol Juda dê sơl?” Yàng Jesu ho lah: “Ngan be ồng đơs.”

³ Ală cau gơnoar lam bồ ơn phan duh khoai yă Yàng Jesu oă bơta.

⁴ Pilat lùp Kơnràñ tai mơ lah: “Mê ò ho jơnau lơi ơ? Sền tĕ bol khai yă mê oă ò git lơh!”

⁵ Mơya Yàng Jesu ò ho dô jơnau lơi, tian gơs Pilat ai lơh krơi ngan.

Yàng Jesu di đap bơta chơt

⁶ Mơ tai, di di bơta pơjum sa, cau kwang đơng lơgar òs hồ dô nă cau glài jàm mpồl làng bol in jat be jơnau bol khai dan.

⁷ Tŭ hơ̆ gơs dô nă cau sơnđan la Baraba neh kòl jàm bal mơ cau phà kơñau, la cau neh tơnchơt cau tòm tŭ tòmdră.

⁸ Mpồl làng bol pơjum bal nàng dan mơ Pilat ai bol khai in jat be bơta òs lơh.

⁹ Pilat lùp lah: “Bol mê kòñ añ hồ Bơtau làng bol Juda bol mê in sơl?”

¹⁰ Bơh khai git loh ală cau gơnoar lam bồ ơn phan duh khoai bơtào Yàng Jesu bơh nùs ƀoah gơjrañ.

¹¹ Mơya ală cau gơnoar lam bồ ơn phan duh khoai chồl mpồl làng bol dan mơ Pilat hồ Baraba bol khai in wơl.

¹² Pilat lùp tai lah: “Behơ̆ ñchi añ rơp lơh di cau bol mê sơnđan la Bơtau làng bol Juda dê taih?”

¹³ Bol khai hòi driau tai lah: “Pơng tĕ khai di chi pơng!”

¹⁴ Pilat đơs mơ bol khai lah: “Ñchi broă iơh bơsak khai neh lơh taih?” Mơya bol khai sơlo driau dờng rlau tai lah: “Pơng tĕ khai di chi pơng!”

¹⁵ Pilat kòñ lơh niam nùs mpồl làng bol, gen hồ Baraba bol khai in sồr pù lơh Yàng Jesu, jào Kơnràñ nàng pơng di chi pơng.

Ală cau ling dơñŏ tơnhial di Yàng Jesu

¹⁶ Cau ling lam Yàng Jesu tòm ƀlàng hìu dờng cau kwang đơng lơgar dê, mơ pơjum jơh mpồl ling tềng hơ̆.

¹⁷ Bol khai tơnggòc Yàng Jesu in dô nơm ào gur, mơ tơndau di bồ Kơnràñ dô nơm sơgơn mơ lò bol khai neh tàñ,

¹⁸ lồc behơ̆, bol khai khoai Kơnràñ lah: “Bơtau làng bol Juda, kis jŏ jòng!”

¹⁹ Bol khai ai gai proh pù di bồ Kơnràñ, choh di Kơnràñ, mơ cùn khoai di đap Kơnràñ.

²⁰ Dơ̆ bol khai neh dơñŏ tơnhial di Kơnràñ rau, gen hồ ào gur hơ̆, tơnsoh wơl ào Kơnràñ dê, mơ cèng tơlik Kơnràñ nàng pơng di chi pơng.

Yàng Jesu kong pơng dê chi pơng

²¹ Gơs dô nă cau sơnđan la Simôn cau Siren, la bèp Aleksandria mơ Ruphus, bơh ƀòn dềt guh hơ ƀòn dờng, lòt gan tềng hơ̆; cau ling kup bơklơn khai tui chi pơng Yàng Jesu dê.

²² Bol khai cèng Yàng Jesu lòt tus hơ tiah ne sơnđan la Gôgôtha, gơtha la Tiah Ntìng Bồ.

²³ Bol khai ai Kơnràñ in ñô tơrnòm bơcă bal mơ cài trŭ, mơya Yàng Jesu ò bài ñô.

²⁴ Bol khai pơng Kơnràñ di chi pơng, gen tă khà nàng tòmpà bal ồi ào Kơnràñ dê, tồ git cau lơi geh pơnah lơi.

²⁵ Tŭ bol khai pơng Kơnràñ la di di sin jơ àng drim,

²⁶ Bơta lơh nền glài Kơnràñ dê geh cih đah hơđang Kơnràñ lah: “BƠTAU LÀNG BOL JUDA DÊ.”

²⁷ Tŭ hơ̆ bol khai kung pơng bàr nă cau phà di chi pơng bal mơ Yàng Jesu, dô nă đah ma, dô nă đah kiau Kơnràñ dê. [

²⁸ Behơ̆ gơlik di ngan be jơnau Sră Goh lah: Kơnràñ gơkòl kòp bal tòm sèng cau glài.]

²⁹ Ală cau lòt gan tềng hơ̆ dơñŏ tơnhial di Yàng Jesu, rtơs bồ mơ đơs lah: “Hơi! Mê la cau sòr tơrlah hìu duh khoai mơ bơtào gơs wơl tòm pe ngai,

³⁰ dong klàs tĕ să mê mơ mù bơh di chi pơng ih!”

³¹ Kung behơ̆ sơl ală cau gơnoar lam bồ ơn phan duh khoai mơ ală cau gơnoar cih đơs bal mơ gơp, mơ dơñŏ tơnhial di Kơnràñ lah: “Khai neh dong klàs cau ndai mơ ò rgơi dong klàs să tòm khai.

³² Tŭ do, ơ Bơtau Krist la Bơtau Israel dê mù tĕ bơh di chi pơng tồ bol he in gŏ mơ dòn!” Ală cau gơkòl pơng bal mơ Kơnràñ kung đơs jroh jram di Kơnràñ sơl.

Bơta chơt Yàng Jesu dê

³³ Bơh di jơt bàr jơ gùl ngai gơlik klam jơngo làm ù jơl tus di pe jơ mho.

³⁴ Di di pe jơ mho Yàng Jesu hòi dờng lah: “Elôi, Elôi, lama sabaktani?” Gơtha la: “Ơ Yàng Tom Trồ Añ, ơ Yàng Tom Trồ Añ, ñchi bơh tài Kơnràñ sang lòi Añ taih?”

³⁵ Gơs cau ƀà tòm mpồl cau ntào tềng hơ̆ kơno gen đơs lah: “Ne, khai hòi Eli.”

³⁶ Gơs dô nă cau tòm bol hơ̆ ntoat ai dô nơm phan nsồp iurŭ bềng dà sràt, ơn di cồng gai proh tong Yàng Jesu in ñô, mơ đơs lah: “Gơn tĕ, lòng sền gơs Eli tus nàng tă tơmù khai bơh chi pơng hala ò.”

³⁷ Yàng Jesu hòi dô jơnau dờng, gen chơt.

³⁸ Bài kơrnìng tòm hìu duh khoai gơcrè gơs bàr bơh hơđang tus hơđơm.

³⁹ Cau at dô rhiang ling ntào tòm toh di chi pơnggŏ Yàng Jesu chơt behơ̆, gen đơs lah: “Cau do ngan la Kòn Yàng Tom Trồ dê.”

⁴⁰ Gơs ală cau ùr kung ơm sền bơh ngài. Tòm bol khai gơs Mari Madơlen, Mari mè Jakơ dềt mơ Jôse dê, mơ Salôme,

⁴¹ la ală cau neh lòt jat mơ duh broă Yàng Jesu tòm tŭ Kơnràñ ơm tòm Galile. Kung gơs oă cau ùr ndai tai sơl, la ală cau neh lòt jat Kơnràñ guh hơ Jerusalem.

Bơta tơp Yàng Jesu

⁴² Tŭ hơ̆ la ngai Rcang Lài, mơ ngai Saƀat. Tus di trồ mho,

⁴³ gơs dô nă cau sơnđan la Jôsep, ơm tòm Arimathe, la cau gơnoar bơyai broă neh tiơng pơnro ngan, să tòm khai kung kơp gơn lơgar Yàng Tom Trồ. Khai khin cha ngan lòt tus hơ Pilat mơ dan ƀồc Yàng Jesu.

⁴⁴ Pilat ai lơh krơi bơh Yàng Jesu mhar chơt behơ̆, gen hòi cau at bồ dô rhiang ling nàng lùp tồ git Yàng Jesu neh chơt hala òhềt.

⁴⁵ Dơ̆ kơno cau at bồ dô rhiang ling yal, gen khai jào ƀồc Jôsep in.

⁴⁶ Jôsep rwat bài che dơmài lơbơn, tă tơmù ƀồc Yàng Jesu bơh di chi pơng, ai bài pò ƀồc Kơnràñ, ơn tòm bơtô neh phàt tòm pơnai lŭ klềr, mơ pơrlă dô nơm pơnai lŭ kơrdơl mpồng bơtô.

⁴⁷ Mari Madơlen mơ Mari mè Jôsep gŏ tiah tơp ƀồc Yàng Jesu.