Jơnau Niam Jat Mak 12 - Sră Goh 2018

Pơnyơu bơh ală cau tòm suơn ño

¹ Yàng Jesu sơntòm ngui jơnau pơnyơu mơ đơs mơ bol khai lah: “Gơs dô nă cau ne tam dô nơm suơn ño, lơh pơnggàr gùt dar, tò dô nơm trồm nàng pat ño, bơt dô nơm theng kơp gàr, mơ ai ală cau lơh suơn in ơpah gơ, gen khai lòt hơ lơgar ndai.

² Tus di kơnhai pic plai, gen cau tòm sồr dô nă cau dĭ lòt tus hơ ală cau lơh suơn nàng ai dô pơnah cồng nha suơn ño bơh di bol khai.

³ Mơya bol khai kup cau dĭ hơ̆ pù lơh, lồc behơ̆ bơtrơh rê tê gòi.

⁴ Cau tòm sồr tai dô nă cau dĭ ndai lòt tus, gen bol hơ̆ pòng sồt bồ khai mơ bơtat bơtròh tai sơl.

⁵ Cau tòm sồr dô nă cau ndai tai lòt tus, gen bol hơ̆ tơnchơt tơn. Lồc behơ̆ cau tòm sồr oă cau dĭ ndai lòt tus, gen cau ƀà kong bol khai pù lơh, cau ƀà tai bol khai tơnchơt.

⁶ Cau tòm suơn gam gơs mìng dô nă, hơ̆ la kòn klau kòñ gơboh. Lồi dut, khai sồr kòn hơ̆ lòt tus hơ bol khai, mơ đơs lah: ‘Ngan bol khai rơp ki ngàm di kòn klau añ!’

⁷ Mơya bol lơh suơn đơs bal lah: ‘Do la cau pơrdòn. Heh, tơnchơt tĕ khai gen sre brê khai rơp gơrê mơ bol he.’

⁸ Gen bol khai kup kòn klau hơ̆ tơnchơt tơn, sơrbì hơ bơdìh suơn ño.

⁹ Yàng Jesu lùp lah: Behơ̆ cau tòm suơn ño hơ̆ rơp lơh mbe lơi taih? Khai rơp tus tơnroh ală cau lơh suơn hơ̆, gen jào suơn ño hơ̆ ală cau ndai in.

¹⁰ Bol mê òhềt sền jơnau Sră Goh do: ‘Pơnai lŭ gơkòl ală cau bơt hìu sang tơlik. Neh gơlik gơs lŭ mum hìu dờng màng rlau jơh.

¹¹ Do la broă neh gơlik gơs bơh Yàng, Mơ la dô bơta crih crài di mat bol he,’ ò ơ?”

¹² Ală cau hơ̆ jòi bơta nàng kup Yàng Jesu bơh git Kơnràñ đơs pơnyơu hơ̆ la sơnio bơh bol khai; mơya bol khai rngòt di mpồl làng bol, gen lòi Kơnràñ mơ lik lòt.

Jơnau lùp bơh bơta boh dia

¹³ Bol khai sồr bàr pe nă cau Pharisi mơ cau bal mơ bơnòr Herôt dê lòt tus lơh gơtup tìs tòm jơnau đơs Yàng Jesu nàng jòi kai kup Kơnràñ.

¹⁴ Behơ̆ ală cau hơ̆ lòt tus, đơs mơ Kơnràñ lah: “Ơ Cau Bơto, bol hi git ồng la cau đơs jơnau song, ò ơn nùs gơwèt hơ bơta kơlôi cau ndai dê. Bơh ồng ò sền đah bơdìh cau dê mơya bơto gùng Yàng Tom Trồ dê dô bă song ngan; behơ̆ boh dia bơtau in la tòm toh mơ bơta boh lam sơl? Bol hi pal boh dia hala ò taih?”

¹⁵ Mơya Yàng Jesu git bơta ma blac bol khai dê, gen đơs lah: “Ñchi bơh tài bol mê lòng Añ taih? Cèng tĕ dô dơnie Añ in sền.”

¹⁶ Bol khai cèng gơ Kơnràñ in, gen Kơnràñ lùp lah: “Rùp mơ sơnđan do la ñcau dê taih?” Bol khai ho lah: “Bơtau dê.”

¹⁷ Yàng Jesu đơs lah: “Tơm wơl tĕ bơtau in phan lơi bơtau dê, mơ tơm wơl tĕ Yàng Tom Trồ in phan lơi Yàng Tom Trồ dê.” Bol khai ai lơh krơi ngan bơh Yàng Jesu.

Jơnau lùp bơh bơta kis wơl

¹⁸ Ală cau Saduse, la cau đơs ò dòn gơs bơta kis wơl, lòt tus lùp Yàng Jesu lah:

¹⁹ “Ơ Cau Bơto, Môise neh cih bol hi in bơta boh lam do lah: ‘Dilah dô nă cau gơs bi khai dê chơt, lòi wơl bau mơ ò gơs kòn, gen oh khai pal bau mơ cau ùr bơnrau hơ̆ nàng tơrbŏ jơi bi khai in.’

²⁰ Mơ tai, gơs poh nă oh mi. Cau bi tơnhoa bau, mơ khai chơt ò gơs kòn.

²¹ Cau bàr bau mơ cau ùr hơ̆, mơ khai kung chơt ò gơs kòn; cau pe kung behơ̆ sơl.

²² Jơh poh nă cau hơ̆ ò gơs kòn lòi wơl. Lồi tơnơ̆, cau ùr hơ̆ kung chơt sơl.

²³ Tòm tŭ gơs bơta kis wơl, cau ùr hơ̆ rơp la bau ñcau dê tòm bol hơ̆ taih? Bơh poh nă cau hơ̆ neh bau mơ khai.”

²⁴ Yàng Jesu ho lah: “Mbe lơi bol mê neh tìs! Mơ ñchi bơh tài ò git taih? Hơ̆ la tài bơh bol mê ò git Sră Goh mơ kung ò git gơnap gơnoar Yàng Tom Trồ dê taih?

²⁵ Bơh tòm tŭ cau kis wơl bơh bơta chơt, gen ò lap klau tòmbau ùr, mơya rơp be ală cau gơnrơh ơm hơđang trồ.

²⁶ Ai bơh ală cau chơt geh kis wơl, gen bol mê òhềt sền tòm sră Môise tòm tiah neh cih bơh jơnau Yàng Tom Trồ đơs mơ khai tòm rlau lò lah: ‘Añ la Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê,’ ò ơ?

²⁷ Kơnràñ ò di la Yàng Tom Trồ cau chơt dê ò, mơya la Yàng cau kis dê! Ngan bol mê tìs lơm.”

Bơta Sồr Lam Dờng Rlau Jơh

²⁸ Gơs dô nă cau bơto bơta boh lam iat Yàng Jesu mơ cau Saduse tòm pơndang bal, git Kơnràñ ho wơl chài rgơi, gen lùp Kơnràñ lah: “Tòm ală bơta sồr lam, bơta lơi la dờng màng rlau jơh?”

²⁹ Yàng Jesu ho lah: “Do la bơta dờng màng rlau jơh: ‘Ơ Israel, iat tĕ, Yàng la Yàng Tom Trồ bol he dê la Yàng mìng gơs dùl lơm.

³⁰ Mê jơh tĕ nùs, jơh hwềng soàn, jơh dơngoh jak, jơh pràn mơ kòñ gơboh di Yàng Tom Trồ mê dê’

³¹ Bơta sồr lam bàr: ‘Mê kòñ gơboh tĕ di cau gơp ƀòn he be să tòm he.’ Ò gơs bơta sồr lam lơi dờng rlau mơ bàr bơta sồr lam hơ̆.”

³² Cau bơto bơta boh lam ho lah: “Ơ Cau Bơto, ngan behơ̆, ồng đơs di ngan Yàng Tom Trồ mìng gơs dùl lơm. Rlau mơ Kơnràñ ò gơs Yàng lơi ndai tai.

³³ Mơ kòñ gơboh di Yàng jơh nùs, jơh dơngoh jak, jơh pràn, mơ kòñ gơboh di cau gơp ƀòn he be să tòm he, hơ̆ la bơta dờng màng rlau mơ jơh ală phan ơn mơ ală phan ơn duh khoai ndai tai sơl.”

³⁴ Yàng Jesu gŏ khai ho dô bă jak chài, gen đơs lah: “Mê ò ngài bơh lơgar Yàng Tom Trồ ò. Lồc behơ̆ ò gơs cau lơi khin lùp Kơnràñ tai.”

Jơnau lùp bơh Bơtau Mesia

³⁵ Yàng Jesu ơm bơto sồr tòm hìu duh khoai, Kơnràñ lùp lah: “Mbe ală cau bơto bơta boh lam rgơi đơs lah Bơtau Krist la Kòn Dabit taih?

³⁶ Să tòm Dabit neh geh rngoh rngac bơh Yàng Hwềng Goh mơ đơs lah: ‘Yàng neh đơs mơ Yàng añ lah: Nggui tĕ đah ma Añ Jơl tus di tŭ Añ ơn ală cau sò tơm di mê hơđơm mpàng jơng mê dê.’

³⁷ Bơh să tòm Dabit neh sơnđan Kơnràñ la Yàng gen mbe rgơi Kơnràñ la kòn khai dê taih?” Làng bol chò nùs kòñ iat Kơnràñ.

Jơnau lah pơrhơng ală cau bơto bơta boh lam

³⁸ Tòm tŭ bơto sồr, Kơnràñ đơs lah: “Kơrhia tĕ di ală cau bơto bơta boh lam la cau kòñ soh ào jrùh mơ lòt yơng, kòñ gơs cau lùp còp să tòm gùl drà,

³⁹ kòñ nggui cơnòng hơđap tòm hìu jum cau Juda mơ nggui tiah màng ryŭ tòm bơta ñô sa,

⁴⁰ pìt mơ sa loan hìu ală cau ùr bơnrau dê, mơ lơh bơthĭ hòi dan jòng jơnau. Bol khai rơp gơkòl lơh nền glài kơnjơ̆ rlau tai.”

Cau ùr bơnrau ơn jền

⁴¹ Yàng Jesu nggui tòm toh mơ tiah prap jền hìu duh khoai nàng sền mpồl làng bol ơn jền. Gơs gal ngan cau pas ơn oă jền.

⁴² Kung gơs dô nă cau ùr bơnrau rƀah lòt tus ơn bàr pet priă kòng, hơ̆ la pơgap dô su.

⁴³ Chòp Kơnràñ hòi ală cau bơtê tus mơ đơs lah: “Di ngan Añ đơs mơ bol mê, cau ùr bơnrau rƀah do neh ơn tòm hồp ơn priă oă rlau mơ jơh ală cau ndai.

⁴⁴ Bơh jơh ală cau ne ai jền tơngkah bol khai dê mơ ơn, ai cau ùr bơnrau rƀah do siơ̆u siar ngan, mơya neh ơn jơh phan khai gơs, la jơh phan ròng siam să khai dê.”