Jơnau Niam Jat Mak 1 - Sră Goh 2018

Bơta rcang lài gơnoar broă Yàng Jesu dê ( 1:1-13 ) Gơnoar broă Jang Ƀaptis dê

¹ Bơta rơp sơntòm Jơnau Niam Yàng Jesu Krist dê, la Kòn Yàng Tom Trồ.

² Be neh cih tòm sră cau gơnoar hwơr Esai lah: “Do, Añ sồr cau kong sồr Añ jê lòt tus di đap mê, La cau rơp wàs gùng lài mê in.

³ Gơs jơnau cau hòi driau tòm ƀlàng bràs lah: Wàs tĕ gùng Yàng, Bơsong tĕ ală gùng dềt Kơnràñ in.”

⁴ Jang neh tus, lơh ƀaptem tòm ƀlàng bràs mơ bơto yal bơta ƀaptem bơh bơta gơjrañ sang glài nàng geh toh glài.

⁵ Làm lơgar Jude mơ jơh làng bol tòm Jerusalem lòt tus hơ khai, yal glài he, mơ khai lơh ƀaptem bol hơ̆ in tòm hiòng Jordan.

⁶ Jang soh ào sơnò làkđa, kơt che but mơ gơltau, sa srah nting mơ dà kròt brê.

⁷ Khai bơto yal lah: “Bơtau tus tơnơ̆ añ gơs gơnoar dờng rlau mơ añ. Añ ò pal kun hồ che gơltau jă Kơnràñ dê.

⁸ Añ lơh ƀaptem bol mê in mơ dà, mơya Kơnràñ rơp lơh ƀaptem bol mê in mơ Yàng Hwềng Goh.”

Yàng Jesu gơs ƀaptem mơ kong cà ràk ơniai

⁹ Mơ tai, tòm ală ngai hơ̆ Yàng Jesu tus bơh Nasaret lơgar Galile, mơ Jang lơh ƀaptem Kơnràñ in tòm hiòng Jordan.

¹⁰ Dơ̆ pa guh bơh dà, Kơnràñ gŏ ală tap trồ pò tơlik, mơ Yàng Hwềng Goh mù hơđang Kơnràñ be dô nơm sềm ntòp.

¹¹ Mơ gơs jơnau bơh đang trồ đơs lah: “Mê la Kòn kòñ gơboh Añ jê, niam nùs Añ tòm jơh ală bơta.”

¹² Tŭ hơ̆ mo, Yàng Hwềng chồl Kơnràñ lòt tus tòm ƀlàng ngềt ngơt.

¹³ Kơnràñ ơm tòm ƀlàng ngềt ngơt hơ̆ poan jơt ngai, kong cà Satan ơniai, ơm bal mơ ală phan poan jơng tòm brê, mơ gơs ală cau gơnrơh duh broă Kơnràñ.

Gơnoar broă Yàng Jesu tòm kơnhwàl Galile ( 1:14 – 9:50 ) Yàng Jesu rơp sơntòm gơnoar broă Kơnràñ dê. Ală cau bơtê sơnròp

¹⁴ Tơnơ̆ mơ tŭ Jang gơkòl ơm jàm, Yàng Jesu lòt tus hơ Galile, bơto yal Jơnau Niam Yàng Tom Trồ dê,

¹⁵ mơ đơs lah: “Tơngai neh tơl, lơgar Yàng Tom Trồ neh tus rềp, ală bol mê gơjrañ sang glài tĕ mơ dòn Jơnau Niam.”

¹⁶ Kơnràñ lòt rò gah dàlềng Galile, gŏ Simôn mơ Andre, oh khai, ơm dang bơtơng tòm dàlềng, bơh bol khai la cau kup ka.

¹⁷ Yàng Jesu đơs mơ bol khai lah: “Jat tĕ Añ, Añ rơp lơh bol mê in gơlik gơs cau dang bơtơng cau.”

¹⁸ Tŭ hơ̆ mo bol khai lòi bơtơng mơ jat Kơnràñ.

¹⁹ Lòt ngài dô êt tai, Kơnràñ gŏ Jakơ kòn Sebede mơ oh khai la Jang, ơm srồt bơtơng tòm ơhò.

²⁰ Chòp Kơnràñ hòi bol khai, gen bol khai lòi bèp bol khai la Sebede ơm wơl tòm ơhò bal mơ ală cau lơh ơpah, mơ bol khai lòt jat Kơnràñ.

Yàng Jesu sơmbòi cau gơkòl cà lơh

²¹ Yàng Jesu mơ ală cau bơtê lòt tus hơ Kapenaum; di di ngai Saƀat, Kơnràñ mut mo tòm hìu jum mơ bơto sồr tềng hơ̆.

²² Bol khai ai lơh crih crài bơh bơta bơto sồr Kơnràñ dê, bơh Kơnràñ bơto bol khai dô bă gơs gơnoar, ò di be ală cau bơto bơta boh lam.

²³ Kung tòm tŭ hơ̆, tòm hìu jum gơs dô nă cau kòl cà lơh,

²⁴ hòi driau lah: “Ơ Jesu Cau Nasaret, bol hi mơ Kơnràñ gơs ñchi jơnau taih? Kơnràñ lòt tus nàng tơnroh bol hi ơ? Añ git Kơnràñ la ñcau, la Bơtau sàng goh Yàng Tom Trồ dê.”

²⁵ Mơya Yàng Jesu lah pơrhơng gơ lah: “Ơm mŏ mŏ tĕ! Mơ lik bơh di cau do!”

²⁶ Chòp cà sơrglơm cau hơ̆ pràn ngan, ai jơnau hòi driau dờng mơ lik bơh di khai.

²⁷ Cau lơi gŏ kung ai lơh crih crài ngan, tian gơs lùp bal lah: “Ñchi jơnau behơ̆ taih? Bơta bơto sồr pa ơ? Cau do ai gơnoar sồr ală cà mơ bol gơ kung dòn jơnau sơl!”

²⁸ Tŭ hơ̆ mo tiơng pơnro Yàng Jesu làm jơh gùt dar kơnhwàl Galile.

Yàng Jesu sơmbòi po me Pier

²⁹ Pa lik bơh hìu jum cau Juda, gen Yàng Jesu mơ ală cau bơtê lòt bal mơ Jakơ mơ Jang mut mo tòm hìu Simôn mơ Andre.

³⁰ Mơ tai, po me Simôn ơm bic kòp prơm; tŭ hơ̆ mo cau yal mơ Kơnràñ bơh khai.

³¹ Chòp Kơnràñ tus rềp, at di tê khai mơ yò tơngguh; phòt bòi kòp prơm, gen mò sơntòm duh broă bol khai in.

Yàng Jesu sơmbòi oă cau

³² Trồ mho tòm tŭ mattơngai ñơp, cau cèng jơh ală cau kòp jê mơ cau gơkòl cà lơh lòt tus hơ Yàng Jesu.

³³ Jơh ƀòn dờng pơjum di đap mpồng hìu.

³⁴ Kơnràñ sơmbòi oă cau bơh tơl ală bơta kòp jê, mơ bơtrơh oă cà, ò ai gơnoar ală cà in đơs, bơh bol gơ git Kơnràñ.

³⁵ Rìng àng ngai tơnơ̆, trồ gam jơngo, Kơnràñ guh, lik lòt tòm tiah ngềt ngơt mơ hòi dan tềng hơ̆.

³⁶ Simôn mơ ală cau ơm bal mơ khai lòt jòi Kơnràñ.

³⁷ Dơ̆ neh bàn rau, gen bol khai đơs lah: “Jơh ală cau jòi Kơnràñ.”

³⁸ Kơnràñ đơs mơ bol khai lah: “Bol he lòt tĕ hơ tiah ndai tòm ală ƀòn gùt dar do, nàng Añ in kung bơto yal tềng hơ̆ sơl, tài bơh broă hơ̆ tàng Añ neh lòt tus.”

³⁹ Kơnràñ lòt làm jơh kơnhwàl Galile, bơto yal tòm ală hìu jum mơ bơtrơh cà.

Yàng Jesu sơmbòi cau dun

⁴⁰ Gơs dô nă cau dun lòt tus hơ Yàng Jesu, cùn gơltang rac dan lah: “Dilah Kơnràñ kòñ, gen rgơi lơh Añ in gơs goh.”

⁴¹ Yàng Jesu rngoh rngac nđàc sơngit, ai tê ƀư di khai mơ đơs lah: “Añ kòñ, goh tĕ.”

⁴² Tŭ hơ̆ mo dun roh thit mơ khai gơs goh.

⁴³ Yàng Jesu sồr khai lik lòt mo, mơ ai jơnau kràñ cê nting lah:

⁴⁴ “Bañ yal jơnau hơ̆ mơ cau lơi, mơya lòt tĕ sơnio să mê mơ cau gơnoar ơn phan duh khoai; mơ bơh mê neh geh goh, gen ơn tĕ phan be Môise neh sồr nàng lơh cơng bol khai in.”

⁴⁵ Mơya cau hơ̆ lòt mơ yal pơnro broă hơ̆ làm jơh, tian gơs Yàng Jesu ò rgơi mut tòm ƀòn dờng dô bă loh làng tai; gen tàng Kơnràñ ơm đah bơdìh tòm ală tiah ngềt ngơt, mơ cau bơh ală đah lòt tus hơ Kơnràñ.