Jôna 4 - Sră Goh 2018

Jôna lòt tus hơ Ninibe

¹ Mơya bơta hơ̆ Jôna ò niam nùs ngan mơ gơhào gơjrañ.

² Khai hòi dan mơ Yàng Jehôwa lah: “Ơ Yàng Jehôwa, hơ̆ ò di la bơta mơ añ neh đơs tòm tŭ añ gam ơm tòm lơgar tòm añ jê ò ơ? Tài behơ̆ tàng añ sơrbac sơrbang dô pleh tus hơ Tarsi. Bơh añ git Kơnràñ la Yàng Tom Trồ gơs nùs kòñ nđàc, òbat gơjrañ, bềng bơta kòñ gơboh kơ̆ dơn, mơ tòmgơl nùs ò lơh glài.

³ Khoai Yàng Jehôwa, tŭ do añ dan mơ Kơnràñ tă bơta kis añ jê; bơh đah mơ añ, chơt la niam rlau mơ kis.”

⁴ Mơya Yàng Jehôwa ho wơl mơ khai lah: “Mê gơjrañ behơ̆ di sơl?”

⁵ Gen Jôna neh lik lòt bơh ƀòn dờng mơ nggui đah mattơngai lik ƀòn dờng hơ̆ dê. Tềng hơ̆, khai neh lơh dô nơm rnŭ khai in, nggui tòm mƀur hơ̆ mơ kơp sền bơta lơi rơp gơlik tus hơ ƀòn dờng hơ̆.

⁶ Gen Jehôwa Yàng Tom Trồ rcang gơs dô tòm che rpung brê mơ lơh gơ in hòn dờng nàng gơs mƀur jơm hơđang bồ Jôna dê, lơh khai in klàs bơh bơta duh tơngai. Jôna chò hòp ngan bơh tòm che rpung brê hơ̆.

⁷ Mơya tòm àng drim ngai tơnơ̆, Yàng Tom Trồ rcang dô nơm tu kap che hơ̆, lơh gơ in ro.

⁸ Tòm tŭ mattơngai guh, Yàng Tom Trồ rcang gơs dô ròs càl duh tus bơh đah mattơngai lik, mơ mattơngai sòl hơđang bồ Jôna tian gơs khai chơt yơh. Khai kòñ chơt mơ đơs lah: “Đah mơ añ chơt la niam rlau mơ kis!”

Jôna kòl lah pơrhơng

⁹ Mơya Yàng Tom Trồ đơs mơ Jôna lah: “Mê gơhào gơjrañ tài bơh che rpung brê do di sơl?” Khai ho lah: “Ngan, Añ gơjrañ jơl chơt kung di sơl.”

¹⁰ Gen Yàng Jehôwa đơs lah: “Mê neh ơn nùs pơlai bơh nơm che rpung brê do bulah mê ò rcang niam gơ in hala lơh gơ in hòn dờng. Gơhòn tòm dô mang mơ chơt tòm dô mang.

¹¹ Mơya Ninibe gơs rlau mơ dô rhiang bàr jơt rbô nă cau ò đal git tê ma mơ tê kiau, bal mơ oă ngan ò git nđò phan poan jơng. Añ ò di ò ơn nùs pơlai bơh dô nơm ƀòn dờng behơ̆ ò ơ?”