Jôna 3 - Sră Goh 2018

Jôna lòt tus hơ Ninibe

¹ Gen gơs jơnau Yàng Jehôwa dê đơs mơ Jôna dơ̆ bàr lah:

² “Lòt tĕ hơ ƀòn dờng Ninibe, mơ bơto tơnggit gơ in jơnau Añ neh yal mê in.”

³ Behơ̆, Jôna lik lòt mo tus hơ Ninibe jat be jơnau Yàng Jehôwa sồr. Mơ tai, Ninibe la dô nơm ƀòn dờng ơnàng ngan, pal roh pe ngai nàng lòt làm ƀòn.

⁴ Jôna sơntòm mut tòm ƀòn dờng, dô ngai lòt gùng. Khai hòi driau lah: “Tòm poan jơt ngai tai gen Ninibe rơp kong tơrlơm lề.”

⁵ Làng bol Ninibe dòn Yàng Tom Trồ; bol khai yal tơnggit dô bơta ơt sa, mơ soh ƀào sơnò kiat, mơ jơh kòp nă cau, cau dờng mơ cau dềt.

⁶ Tòm tŭ bơtau Ninibe kơno jơnau hơ̆, khai ñă bơh hơđang sơbàn khai dê, hồ ào jrùh cau bơtau dê, soh ƀào sơnò kiat mơ nggui tòm bùh.

⁷ Gen bơtau ai jơnau sồr tòm ƀòn Ninibe lah: “Jat jơnau sồr cau bơtau dê bal mơ ală cau kwang dờng at bồ dê lah: bulah cau hala phan poan jơng, mpồl kơnrồ hala mpồl belàt ò geh sa liap phan lơi, jơh ală rơp ò geh sa hala hùc dà.

⁸ Kòn mơnus mơ phan poan jơng pal soh ƀào sơnò kiat, mơ bol khai pal hòi dan rac ròc dô bă pràn ngan mơ Yàng Tom Trồ. Kòp nă pal sang tĕ ală gùng iơh mơ bơta jàñ bơsak hơ̆ bơh tê bol khai lơh.

⁹ Ñcau git taih? Digơlan Yàng Tom Trồ rơp tòmgơl nùs mơ tơnruc bơta gơjrañ dờng Kơnràñ dê, mơ bol he rơp ò chơt roh.”

¹⁰ Tòm tŭ Yàng Tom Trồ gŏ bơta bol khai neh lơh, mbe bol khai neh pơrlac sang ală gùng iơh bơsak bol khai dê, Yàng Tom Trồ tòmgơl nùs bơh bơta rung rài mơ Kơnràñ neh đơs rơp tơndùh hơđang bol khai, mơ Kơnràñ neh ò lơh bơta hơ̆.