Jôel 1 - Sră Goh 2018

Bơta gơlòng bòl glar mơ bơta gơjrañ sang glài ( 1:1 – 2:17 )

¹ Jơnau Yàng Jehôwa dê neh tus mơ Jôel, kòn klau Pethuel dê:

Bơta ñìm rac bơh bơta tơrlơm lề tòm lơgar

² Ơ ală cau dờng cau kra, iat tĕ jơnau do: Ơ jơh làng bol ơm tòm lơgar, ai tồr iat tĕ! Gơs bơta lơi be bơta do neh gơlik gơs tòm rài bol mê dê, hala tòm rài ală ồng pàng bol mê dê sơl?

³ Yal wơl tĕ bơta do ală kòn bol mê in; mơ lòi ală kòn bol mê dê yal wơl ală kòn bol khai in, mơ ală kòn bol khai dê yal wơl ală kòn sau rài tơnơ̆ bol khai in.

⁴ Phan lơi srah nting lòi wơl gen srah nting dờng sa; phan lơi srah nting dờng lòi wơl gen srah nting dềt sa; phan lơi srah nting dềt lòi wơl gen srah nting ndai sa.

⁵ Ơ cau bơñul ñô, kah rngal tĕ mơ ñìm rac! Ơ jơh ală bol mê la cau jak ñô tơrnòm, ñìm rac tĕ bơh tơrnòm pa, bơh neh kong tă bơh di bơr bol mê dê.

⁶ Dô nơm làng bol pràn kơldang mơ gal ngan, neh tus tòmpìt lơgar Añ jê; gơ gơs sề kung be sề klìu triă, mơ gơnèng kung be gơnèng klìu triă me dê.

⁷ Gơ neh sa tơrging ală tòm ño Añ jê, mơ koh rpot rpet ală chi ƀal Añ jê. Gơ neh klò kơmhò ală chi hơ̆ mơ sang sơrbì jơh, ală ntê gơ gơlik bò luh.

⁸ Ơ làng bol, ñìm rac tĕ kung be dô nă cau ơruh soh ào bài sơnò kiat nàng ñìm ƀồc bau klau neh bau bơh tŭ gam kơnòm să.

⁹ Phan ơn mơ kòi mbo bal mơ phan ơn ñô ò gam tai tòm hìu Yàng Jehôwa. Ală cau gơnoar ơn phan duh khoai ñìm rac, hơ̆ la ală cau duh broă Yàng Jehôwa dê.

¹⁰ Ală ƀlàng sre gơkòl phà tơnroh, ù tiah rañ rsơh, kòi mbo gơkòl tơnroh, tơrnòm pa neh soat, mơ mơñà neh jơh.

¹¹ Ơ cau lơh mìr lơh sre, gơdô nùs tĕ; Ơ cau tam ño, ñìm pơt wòl tĕ, moat jrùng tĕ bơh kòi mơ kòi pràng, tài bơh kơnhai toès tòm ƀlàng neh gơkòl tơnroh.

¹² Tòm ño neh ro: tòm chi ƀal neh pă; tòm chi lừu, tòm chi gòl tơô, tòm chi tăo mơ jơh ală tòm chi tòm ƀlàng neh ro jơh. Ngan la bơta hòn chò kòn mơnus di ò gam tai.

Bơto tơngkah bơh bơta gơjrañ sang glài

¹³ Ơ ală cau gơnoar ơn phan duh khoai, soh tĕ ào bài sơnò kiat mơ ñìm rac. Ơ bol mê la cau duh broă di đap cơnòng duh khoai, ñìm rac ròc tĕ. Ơ bol mê la cau duh broă di đap Yàng Tom Trồ añ jê, tus tĕ soh ào bài sơnò kiat mang àng, bơh phan ơn mơ kòi mbo bal mơ phan ơn ñô ò gam tai tòm hìu Yàng Tom Trồ bol mê dê.

¹⁴ Lơh nền tĕ dô bơta ơt sa sàng goh, hòi jà tĕ dô bơta pơjum duh khoai, pơjum wơl tĕ ală cau kwang kra bal mơ jơh làng bol tòm lơgar tòm hìu Jehôwa Yàng Tom Trồ bol mê dê mơ rac dan mơ Yàng Jehôwa!

¹⁵ Ơ hơh! Bơh ngai hơ̆, bơh ngai Yàng Jehôwa dê neh tus rềp! Gơ rơp tus kung be bơta tơnroh gơprah gơpring tus bơh Bơtau Gơnar Dờng.

¹⁶ Phan sa ò di neh tă jơh di đap mat bol he, bơta hòn chò hừh hơh ò di neh ò gam tai tòm hìu Yàng Tom Trồ bol he dê ơ?

¹⁷ Gar sơntìl neh ro hơđơm ù. Ală đam jàr neh gơpừ tơrlah, ală hìu đam neh lề lac, bơh kòi mbo neh jơh hir rau.

¹⁸ Mpồl phan poan jơng rơnđơh oă ngan! Mpồl rpu kơnrồ lòt nrah nring! Tài bơh ò gơs ƀlàng ñhơt bol gơ in sa: tian gơs ală mpồl belàt kong jơgloh tơhìr.

¹⁹ Ơ Yàng Jehôwa, añ hòi dan mơ Kơnràñ, bơh ồs neh sa jơh ală ƀlàng ñhơt tòm brê, lơmpiat ồs neh sa jơh ală chi che tòm ƀlàng.

²⁰ Jơl tus di ală phan poan jơng tòm brê kung rac dan mơ Kơnràñ, tài bơh ală croh dà neh soat, mơ ồs neh sa jơh ală ƀlàng ñhơt tòm brê.