Jeremi 37 - Sră Goh 2018

Bơta gơn kơnòm roh lơm Jedekia dê

¹ Jedekia, kòn klau Jôsia geh bơtau Babilôn la Nebukatnessar bơtào lơh gơs cau bơtau lơgar Juda, at bồ ala Jekônia, kòn klau Jehôyakim.

² Mơya cau bơtau mơ ală cau lơh broă bal mơ làng bol tòm lơgar ò iat ală jơnau mơ Yàng Jehôwa neh đơs bơh bơr cau gơnoar hwơr Jeremi.

³ Bơtau Jedekia sồr Jehukan, kòn klau Selemia, mơ Sôphôni, kòn klau cau gơnoar ơn phan duh khoai Maaseya, lòt tus hơ cau gơnoar hwơr Jeremi mơ đơs lah: “Dan bơh bol hi hòi dan mơ Jehôwa Yàng Tom Trồ bol he dê.”

⁴ Tŭ hơ̆ Jeremi gam lòt rê digùl làng bol, òhềt ơm jàm.

⁵ Mpồl ling Pharaôn dê neh lik bơh lơgar Ejiptơ; ală cau Kalde ơm gơrwàng ƀòn Jerusalem kơno behơ̆, gen tơlik mpồl ling bơh Jerusalem.

⁶ Tŭ hơ̆, gơs jơnau Yàng Jehôwa đơs mơ cau gơnoar hwơr Jeremi lah:

⁷ “Jehôwa, Yàng Tom Trồ Israel dê, đơs be do: ‘Bol mê pal yal mơ bơtau Juda, la cau neh sồr bol mê tus lùp Añ, lah: Ne, mpồl ling Pharaôn dê neh tus dong tă bol mê, rơp lik rê hơ lơgar he, hơ̆ la lơgar Ejiptơ.

⁸ Ală cau Kalde rơp rê wơl, tòmlơh mơ ƀòn do, tòmpìt ai mơ ngui ồs chu pơrguc gơ.’”

⁹ Yàng Jehôwa đơs be do: “Bol mê bañ pơrlồm is să he mơ lah: ‘Cau Kalde ngan rơp lòt ngài bơh bol he;’ mơya bol khai rơp ò lòt ngài ò.

¹⁰ Bulah bol mê tơnroh jơh mpồl ling Kalde dê, la cau neh tus tòmlơh mơ bol mê, tòm mpồl bol khai mìng gam wơl ală cau kong sồt rmàñ ơm wơl tòm sàl, bol khai kung bơtào wơl mơ ngui ồs chu ƀòn do.”

Jeremi kong kup jàm

¹¹ Tòm tŭ mpồl ling Kalde lik bơh ƀòn Jerusalem, tài bơh rngòt mpồl ling Pharaôn,

¹² Jeremi lik bơh Jerusalem nàng lòt tòm tiah Benjamin, nàng dòp pơnah ù tiah he dê digùl làng bol hơ̆.

¹³ Mơya tŭ tus di Mpồng Benjamin, gen gơs cau at bồ kơp gàr sơnđan la Irija, kòn klau Selemia, sau Hanania, ơm tềng hơ̆; cau do kup cau gơnoar hwơr Jeremi mơ lah: “Mê la cau kong ơlah di cau Kalde!”

¹⁴ Jeremi ho lah: “Đơs ală alai! Añ ò kong alah cau Kalde ò.” Mơya Irija ò bài iat, kư̆ kup Jeremi mơ lam tus di đap ală kwang at bồ.

¹⁵ Ală kwang at bồ gơjrañ Jeremi; gen pù lơh mơ jàm tòm hìu cau gơnoar cih Jônathan; bơh cau ai hìu hơ̆ lơh gơs hìu jàm.

¹⁶ Jeremi kong ơm jàm tòm hìu jàm, tòm ơdŭ jơngo behơ̆, mơ khai ơm tềng hơ̆ jŏ ngai.

Bơtau Jedekia hòi Jeremi tus, khai đơs hwơr bơh bơtau kong kup

¹⁷ Gen, bơtau Jedekia sồr hòi Jeremi, mơ dòp rò khai. Cau bơtau lùp òm khai tòm gơlang bơtau, lah: “Yàng Jehôwa neh đơs jơnau lơi sơl?” Jeremi ho lah: “Gơs!” mơ pơnjat tai lah: “Bơtau rơp kong jào tòm tê bơtau Babilôn.”

¹⁸ Tơnơ̆ mơ hơ̆, Jeremi đơs mơ bơtau Jedekia lah: “Añ neh tìs glài lơi tòmdră mơ bơtau, ală cau duh broă bơtau, mơ làng bol do, mơ jàm añ tòm hìu jàm taih?

¹⁹ Ntềng đah ală cau gơnoar hwơr neh đơs hwơr bơtau in lah: ‘Bơtau Babilôn rơp ò tus tòmdră mơ bol mê hala tòmdră mơ tiah do ơ’?

²⁰ Tŭ do, ơ bơtau, ơ cau tòm añ, dan iat tĕ, kơp kòñ jơnau rac dan añ jê geh bơtau dòp! Dan bañ jào añ tòm hìu cau gơnoar cih Jônathan, rngòt añ rơp chơt tềng hơ̆.”

²¹ Gen bơtau Jedekia ai gơnoar sồr gàr Jeremi tòm tiah ƀlàng hìu cau ling kơp gàr, kòp ngai phàt khai in dô nơm piang lă cau neh rwat tòm drà, jơl tus di piang lă tòm ƀòn neh jơh hir. Behơ̆ Jeremi gam ơm tòm ƀlàng hìu cau ling kơp gàr dê.