Jeremi 35 - Sră Goh 2018

Cau Rekap dòn song cau Juda ò dòn song

¹ Tòm rài Jehôyakim, kòn klau Jôsia, bơtau Juda, gơs jơnau bơh Yàng Jehôwa đơs mơ Jeremi lah:

² “Lòt tus tĕ hơ hìu cau Rekap dê, đơs mơ bol khai; cèng tĕ bol khai tus hơ hìu Yàng Jehôwa, mut tòm dô nơm ơdŭ, mơ ai bol khai in ñô tơrnòm.”

³ Gen añ cèng Jaajania, kòn klau Jeremi, sau Abatsinia, bal mơ ală oh mi khai, ală kòn klau khai, mơ jơh hìu Rekap sơl.

⁴ Añ cèng bol khai tus hơ hìu Yàng Jehôwa, tòm ơdŭ ală kòn klau Hanan dê, kòn klau Ikdalia, cau Yàng Tom Trồ dê, la ơdŭ rềp mơ ơdŭ ală kwang at bồ, mơ ơm hơđang ơdŭ Maaseya, kòn klau Salum, la cau kơp gàr mpồng.

⁵ Añ ơn ală gri bềng tơrnòm mơ mơngàn di đap ală kòn klau hìu cau Rekap dê, mơ đơs mơ bol khai lah: “Ñô tơrnòm tĕ!”

⁶ Mơya bol khai ho lah: “Bol hi ò ñô tơrnòm ò; tài bơh ồng pàng bol hi dê la Jônadap, kòn klau Rekap, neh ai gơnoar sồr bol hi lah: ‘Bol mê jơl tus di kòn sau bol mê dê sùm sùm bañ tŭ lơi ñô tơrnòm.

⁷ Bol mê bañ bơt hìu, bañ sih gar, bañ tùc tam mơ bañ gơs suơn ño; mơya bol mê pal ơm tòm sàl jơh rài, tồ bol mê in geh kis jŏ tòm tiah bol mê ơm ing.’

⁸ Bol hi dòn bơr lơh jat jơnau Jônadap, kòn klau Rekap, ồng pàng bol hi dê, tòm jơh ală bơta khai neh nting sồr bol hi, gen jơl jơh rài kis bol hi, jơl tus bau ùr, kòn klau, kòn ùr bol hi dê, kung ò ñô tơrnòm.

⁹ Bol hi ò bơt hìu nàng ơm, ò gơs suơn ño, sre, mơ gar sơntìl,

¹⁰ mơya kư̆ ơm tòm sàl. Bol hi neh dòn bơr ồng pàng bol hi dê la Jônadap behơ̆, mơ lơh jat jơh ală bơta khai neh nting sồr bol hi.

¹¹ Mơya, tŭ Nebukatnessar bơtau Babilôn tus tòmlơh mơ lơgar do, bol hi đơs bal lah: ‘Guh tĕ hơ Jerusalem, bơh rngòt di mpồl ling cau Kalde mơ mpồl ling Siri dê.’ Gen tàng bol hi tus ơm tòm Jerusalem.”

¹² Tŭ hơ̆, gơs jơnau Yàng Jehôwa đơs mơ Jeremi lah:

¹³ “Yàng Jehôwa Gơnap Gơnoar, Yàng Tom Trồ Israel dê, đơs be do: Lòt tĕ, đơs mơ cau Juda mơ làng bol Jerusalem lah: Yàng Jehôwa đơs: ‘Bol mê ò bài bơtê, mơ ò bài iat jơnau Añ ơ?

¹⁴ Jơnau Jônadap, kòn klau Rekap, neh bơto sồr kòn sau khai lah bañ ñô tơrnòm, gen gơlik gơs di ngan; bol khai ò ñô tơrnòm jơl tus di ngai do, bơh neh dòn jat gơnoar sồr pàng he dê. Ai Añ, neh kong ơt đơs mơ bol mê, mơ bol mê ò bài iat Añ.

¹⁵ Añ kung neh sồr jơh ală dĭ gơna Añ jê, hơ̆ la ală cau gơnoar hwơr lòt tus đơs mơ bol mê: “Kòp nă tòm bol mê sang tĕ gùng iơh bơsak, mơ lơh niam wơl broă lơh bol mê dê. Bañ lòt jat nàng duh broă ală yàng ndai, gen bol mê rơp ơm tòm ù tiah mơ Añ neh ai bol mê mơ ồng pàng bol mê in.” Mơya bol mê ò ai tồr nàng iat, mơ ò bài dòn bơr Añ.

¹⁶ Bơh ală kòn klau Jônadap dê, kòn klau Rekap, neh dòn bơr lơh jat jơnau bơto sồr ồng pàng bol khai dê, ai làng bol do gen ò iat Añ.’

¹⁷ Gen tàng, Jehôwa Yàng Tom Trồ Gơnap Gơnoar, Yàng Tom Trồ Israel dê, đơs be do: ‘Do, Añ rơp dùh hơđang Juda mơ jơh làng bol Jerusalem in ală bơta rung rài mơ Añ neh yal lài tòmdră mơ bol khai; bơh Añ đơs mơ bol khai ò bài iat, Añ hòi mơ bol khai ò ho wơl.’”

¹⁸ Gen, Jeremi đơs mơ hìu Rekap lah: “Yàng Jehôwa Gơnap Gơnoar, Yàng Tom Trồ Israel dê, đơs be do: ‘Bơh bol mê neh dòn jat gơnoar sồr ồng pàng bol mê dê la Jônadap, neh prap gàr kòp jơnau bơto sồr khai dê, mơ lơh jat kòp bơta khai neh nting sồr bol mê in.’

¹⁹ Tài bơh hơ̆, Yàng Jehôwa Gơnap Gơnoar, Yàng Tom Trồ Israel dê, đơs be do: ‘Jônadap, kòn klau Rekap, rơp ò siơ̆u dô nă cau klau ntào di đap Añ jơl sùm sùm.’”