Jeremi 28 - Sră Goh 2018

Jeremi mơ cau gơnoar hwơr blac Hanania

¹ Kung tòm nam hơ̆, tŭ Jedekia, bơtau Juda, rơp sơntòm at bồ, kơnhai pram bơh sơnam dơ̆ poan, Hanania, kòn klau Asua, cau gơnoar hwơr ơm tòm Gabaôn, đơs mơ añ tòm hìu Yàng Jehôwa, di đap ală cau gơnoar ơn phan duh khoai mơ jơh làng bol lah:

² “Yàng Jehôwa Gơnap Gơnoar, Yàng Tom Trồ Israel dê, đơs be do: ‘Añ neh dơrpă yô bơtau Babilôn dê.

³ Tòm bàr sơnam wil tơl, jơh ală phan ngui hìu Yàng Jehôwa dê mơ Nebukatnessar, bơtau Babilôn, neh tă tơlik bơh tiah do cèng tus hơ Babilôn, gen Añ rơp cèng rê wơl tòm tiah do.’

⁴ Yàng Jehôwa đơs: ‘Añ kung rơp cèng Jekônia, kòn klau Jehôyakim, bơtau Juda, mơ kòp nă cau Juda gơkòl kup cèng lơh dĭ tus tòm lơgar Babilôn, gen kung rê wơl tòm tiah do tai sơl; bơh Añ rơp dơrpă yô bơtau Babilôn dê.’”

⁵ Tŭ hơ̆, cau gơnoar hwơr Jeremi đơs mơ cau gơnoar hwơr Hanania, di đap ală cau gơnoar ơn phan duh khoai mơ jơh làng bol ơm ntào tòm hìu Yàng Jehôwa.

⁶ Cau gơnoar hwơr Jeremi đơs lah: “Amen! Dan Yàng Jehôwa lơh behơ̆! Dan Yàng Jehôwa lơh wil tơl ală bơta jat be jơnau mê neh đơs hwơr, cèng ală phan ngui tòm hìu Yàng Jehôwa mơ jơh ală cau gơs dĭ bơh Babilôn rê wơl tòm tiah do!

⁷ Bulah behơ̆, iat tĕ jơnau Añ đơs tòm tồr mê mơ tòm tồr jơh làng bol lah:

⁸ Ală cau gơnoar hwơr lài mơ Añ mơ lài mơ mê, bơh lài neh đơs hwơr bơh bơta kơlìn gơtoă, rung rài, mơ pluh plàng ală ƀòn dờng mơ ală lơgar in.

⁹ Dilah cau gơnoar hwơr lơi yal bơh bơta lơngap lơngai, mơ jơnau đơs he gơlik gơs tòm toh, gen rơp git cau gơnoar hwơr hơ̆ la ngan bơh Yàng Jehôwa sồr tus!”

¹⁰ Gen cau gơnoar hwơr Hanania tă dô nơm yô bơh di ngko cau gơnoar hwơr Jeremi, mơ dơrpă gơ.

¹¹ Chòp, Hanania đơs di đap jơh làng bol lah: “Yàng Jehôwa đơs be do: ‘Añ rơp dơrpă yô Nebukatnessar dê, bơtau Babilôn, bơh ngko kòp nơm lơgar kung behơ̆ tòm bàr sơnam.’” Gen cau gơnoar hwơr Jeremi lik lòt.

¹² Tơnơ̆ mơ tŭ cau gơnoar hwơr Hanania neh dơrpă yô bơh di ngko Jeremi dê, gen gơs jơnau Yàng Jehôwa đơs mơ Jeremi be do:

¹³ “Mê pal lòt tus đơs mơ Hanania lah: ‘Mê neh dơrpă dô nơm yô mơ chi; mơya lơh dô nơm yô mơ lòs ala wơl.

¹⁴ Bơh Yàng Jehôwa Gơnap Gơnoar, Yàng Tom Trồ Israel dê, đơs be do: Añ neh ơn yô mơ lòs hơđang ngko kòp lơgar do, nàng bol khai pal duh broă Nebukatnessar, bơtau Babilôn. Mơ tai, bol khai pal duh broă khai, mơ Añ neh ai ală jơi phan poan jơng tòm brê khai in sơl.’”

¹⁵ Chòp, cau gơnoar hwơr Jeremi đơs mơ cau gơnoar hwơr Hanania lah: “Ơ Hanania, iat tĕ! Yàng Jehôwa òhềt sồr mê, mơya mê lơh làng bol do in dòn kơnòm di bơta ma blac.

¹⁶ Behơ̆ tàng, Yàng Jehôwa đơs be do: ‘Añ rơp tă sang mê klàs bơh plai ù; nam do mê rơp chơt; tài bơh neh đơs tòmdră mơ Yàng Jehôwa.’”

¹⁷ Kung nam hơ̆ kơnhai poh, gen cau gơnoar hwơr Hanania chơt.