Jeremi 27 - Sră Goh 2018

Jeremi hòi jà pal duh broă bơtau Babilôn

¹ Tòm tŭ Jedekia, kòn klau Jôsia, bơtau Juda, rơp sơntòm at bồ, gơs jơnau Yàng Jehôwa sồr Jeremi be do:

² Yàng Jehôwa đơs mơ añ be do: “Mê lơh tĕ dô nơm yô mơ che gơltau he in, mơ ơn hơđang ngko mê.

³ Gen yal tĕ bơtau Edôm in, bơtau Môap, bơtau kòn sau Ammôn dê, bơtau Tirơ, mơ bơtau Sidôn, bơh ală cau kong sồr tus hơ ƀòn dờng Jerusalem tòm mat Jedekia, bơtau Juda.

⁴ Nting bol khai yal mơ cau tòm bol khai lah: Yàng Jehôwa Gơnap Gơnoar, Yàng Tom Trồ Israel dê, đơs be do: Bol mê yal tĕ cau tòm bol mê in lah:

⁵ ‘Să tòm Añ la Bơtau neh lơh gơs ù tiah, jơi kòn mơnus mơ jơi phan poan jơng ơm hơđang plai ù, bơh gơnoar dờng mơ tơwòr tê Añ jê pò tơlik, Añ ai gơ cau lơi in jat nùs Añ kòñ.

⁶ Tŭ do, Añ neh phi ală lơgar do tòm tê Nebukatnessar, bơtau Babilôn dĭ gơna Añ; Añ kung ai ală phan poan jơng tòm brê nàng dong broă khai sơl.

⁷ Jơh ală lơgar rơp dòn duh khai, kòn khai, sau khai, jơl tus di tŭ tơngai lơgar khai di neh tus; tŭ hơ̆ oă lơgar mơ ală bơtau dờng rơp kup khai dòn duh wơl.

⁸ Dilah làng bol lơi hala lơgar lơi ò duh broă bơtau hơ̆, la Nebukatnessar, bơtau Babilôn, mơ ò ơn yô bơtau Babilôn dê di ngko he dê, gen Añ rơp ngui đào tà, jơgloh rung mơ bơta rung rài mơ lơh glài làng bol hơ̆, jơl tus di tŭ tê bơtau Nebukatnessar neh tơnroh jơh bol khai, Yàng Jehôwa đơs behơ̆.

⁹ Behơ̆ gen, bañ iat ală cau gơnoar hwơr, cau sền dà, yal gơtha mpau, cau sền sơmañ, cau juh proh bol mê dê, la ală cau đơs mơ bol mê lah: Bol mê rơp ò dòn duh bơtau Babilôn ò.

¹⁰ Bơh bol khai đơs hwơr ma blac, nàng bol mê kong cèng pơrdô ngài bơh lơgar he, Añ rơp bơtrơh tơlik bol mê, mơ bol mê kong tơnroh.

¹¹ Mơya làng bol lơi ơn yô bơtau Babilôn dê di ngko he mơ duh broă bơtau hơ̆, gen Añ rơp ai bol khai in kư̆ ơm wơl tòm lơgar nàng troă lơòr mơ ơm kis tềng hơ̆,’ Yàng Jehôwa đơs behơ̆.”

¹² Añ kung neh đơs mơ Jedekia, bơtau Juda dê behơ̆ sơl lah: “Ơn tĕ ngko bol mê hơđơm yô bơtau Babilôn dê, duh broă tĕ khai mơ làng bol khai, gen bol mê geh kis.

¹³ Ñchi bơh tài bơtau mơ làng bol bơtau dê pal chơt bơh pềs tà, jơgloh rung, pluh plàng, kung be Yàng Jehôwa neh đơs bơh lơgar lơi ò duh broă bơtau Babilôn taih?

¹⁴ Behơ̆, bañ iat ală jơnau mpồl cau gơnoar hwơr đơs lah: ‘Bol mê rơp ò duh broă bơtau Babilôn!’ Hơ̆ la bol khai đơs hwơr ma blac bol mê in.

¹⁵ Yàng Jehôwa đơs: ‘Añ ò tŭ lơi sồr bol khai, mơya bol khai ai sơnđan Añ đơs hwơr blac; tồ Añ in bơtrơh bol mê, mơ lồi dut bol mê kong tơnroh, bol mê bal mơ ală cau gơnoar hwơr đơs hwơr bol mê in.’”

¹⁶ Gen Añ kung đơs mơ ală cau gơnoar ơn phan duh khoai mơ jơh làng bol lah: “Yàng Jehôwa đơs be do: Bañ iat ală jơnau mpồl cau gơnoar hwơr bol mê dê, đơs hwơr mơ bol mê lah: ‘Do, ală phan ngui tòm hìu Yàng Jehôwa dê rơp geh cèng brê wơl bơh lơgar Babilôn!’ Hơ̆ la bol khai đơs hwơr blac mơ oh mi.

¹⁷ Bañ iat bol khai. Duh broă tĕ bơtau Babilôn, gen geh kis. Ñchi bơh tài lòi ƀòn do gơlik gơs tiah sang lòi ngềt ngơt?

¹⁸ Mơya dilah bol khai ngan la cau gơnoar hwơr mơ jơnau Yàng Jehôwa ơm bal mơ bol khai, gen tŭ do hòi dan ala tĕ mơ Yàng Jehôwa Gơnap Gơnoar, nàng ală phan ngui gam wơl tòm hìu Yàng Jehôwa, tòm gơlang bơtau Juda mơ tòm Jerusalem, ò gơkòl cèng hơ lơgar Babilôn tai.

¹⁹ Bơh Yàng Jehôwa Gơnap Gơnoar đơs be do bơh ală jrong, cờu dờng mơ kòng, ală jơng đèng, mơ ală phan màng gam wơl tòm ƀòn do,

²⁰ ală phan mơ Nebukatnessar, bơtau Babilôn òhềt cèng, tŭ khai kup Jekônia kòn klau Jehôyakim bơtau Juda, bal mơ ală cau màng ryŭ tòm lơgar Juda bal mơ Jerusalem nàng cèng hơ lơgar Babilôn gơs dĭ sơl;

²¹ ngan, Yàng Jehôwa Gơnap Gơnoar, Yàng Tom Trồ Israel dê, đơs be do bơh ală phan ngui gam wơl tòm hìu Yàng Jehôwa, tòm gơlang bơtau Juda mơ tòm Jerusalem:

²² ‘Ală phan hơ̆ rơp kòl cèng hơ lơgar Babilôn, geh lòi tềng hơ̆ jơl tus di ngai Añ wèt sền bol khai; tŭ hơ̆ Añ rơp cèng ală phan hơ̆ rê wơl, ơn wơl tòm tiah do,’ Yàng Jehôwa đơs behơ̆.”