Jeremi 11 - Sră Goh 2018

Israel mơ Juda ò lơh jat bơta ho bal

¹ Gơs jơnau Yàng Jehôwa dê tus yal Jeremi in be do:

² “Iat tĕ jơnau ho bal do, mơ yal tĕ cau Juda mơ làng bol Jerusalem in.

³ Mê pal yal bol khai in lah: ‘Jehôwa Yàng Tom Trồ Israel dê đơs be do: Pal srat sơntơm cau lơi in ò lơh jat ală jơnau ho bal do,

⁴ la bơta Añ neh sồr ồng pàng bol mê in, tòm tŭ Añ cèng bol khai lik bơh lơgar Ejiptơ, bơh di bơnhă gơm lòs, mơ đơs lah: Iat tĕ jơnau Añ, mơ lơh jat tĕ jơh bơta Añ sồr bol mê. Behơ̆ bol mê rơp lơh gơs làng bol Añ jê, Añ rơp lơh gơs Yàng Tom Trồ bol mê dê;

⁵ tồ Añ in lơh gơs bơta srat să Añ neh ho bal mơ ồng pàng bol mê dê, mơ ai bol khai in dô nơm lơgar bềng dà toh mơ dà lơwe, be bol mê gŏ ngai do.’” Gen añ ho wơl lah: “Khoai Yàng Jehôwa! Amen!”

⁶ Mơ Yàng Jehôwa đơs mơ añ lah: “Yal tơlik tĕ ală jơnau do tòm ală ƀòn dờng Juda dê mơ tòm ală gùng Jerusalem dê lah: ‘Iat tĕ ală jơnau ho bal do mơ lơh jat.’

⁷ Añ neh kràñ cê bơto tơngkah ồng pàng bol mê, tòm tŭ Añ cèng bol khai lik bơh lơgar Ejiptơ jơl tus ngai do. Añ neh kơ̆ nùs bơto tơngkah bol khai lah: ‘Lơh jat tĕ jơnau Añ!’

⁸ Mơya bol khai ò dòn bơr, ò ơn tồr iat; mơ kòp nă kư̆ jat bơta kră kơldang nùs kòñ iơh he dê. Tài behơ̆ tàng Añ neh cèng hơđang bol khai jơh ală jơnau tòm bơta ho bal do dê, la bơta Añ neh nting sồr bol khai lơh jat mơya bol khai ò lơh jat.”

⁹ Mơ Yàng Jehôwa đơs mơ añ lah: “Digùl cau Juda mơ tòm làng bol Jerusalem gơs cau neh bơtào kai tòmdră.

¹⁰ Bol khai wèt wơl hơ tồi glài iơh bơsak ồng pàng bol khai dê bơh yau òr, la ală cau neh ò bài iat jơnau Añ; bol khai neh lòt jat ală yàng ndai mơ duh broă bol gơ. Hìu Israel mơ hìu Juda neh sang lòi bơta ho bal mơ Añ neh bơt bơtào bal mơ ồng pàng bol khai dê.

¹¹ Gen tàng, Yàng Jehôwa đơs be do: ‘Añ rơp cèng bơta rung rài dùh hơđang bol khai, mơ bol khai ò rgơi pleh klàs; bulah bol khai rơp hòi dan mơ Añ, Añ rơp ò iat bol khai.

¹² Tŭ hơ̆ làng bol Juda mơ làng bol Jerusalem rơp lik lòt hòi lùp ală yàng mơ bol khai neh òs chu kơlhô; mơya ală yàng hơ̆ rơp ò tŭ lơi dong tă bol khai tòm tŭ tìp bơta rung rài.

¹³ Ơ Juda, bơh mê gơs nđò nơm ƀòn dờng gen kung gơs nđò nơm yàng sơl; Jerusalem gơs nđò nơm gùng, bol mê kung bơt bơtào nđò nơm cơnòng duh khoai bơta ƀàssìl in, la ală cơnòng duh khoai chu kơlhô Baal in.’

¹⁴ Ai đah mơ mê, bañ hòi dan ala làng bol do in; bañ bơh bol khai ai jơnau rac dan hòi dan; bơh Añ rơp ò iat tòm tŭ bol khai hòi tus hơ Añ tòm bơta rung rài bol khai dê.

¹⁵ Gơs ñchi kwơ cau kòñ gơboh Añ jê tus tòm hìu Añ taih, tòm tŭ khai gam lơh bơta rềs àr taih? Gơs oă poac ơn pơdơng rgơi kơryan bơta rung rài bơh di mê sơl? Mơ mê rgơi hòn chò hừh hơh sơl ơ?

¹⁶ Yàng Jehôwa neh sơnđan mê la ‘chi ôlibe tơlir, gơlik plai niam mơnĕ!’ Mơ do tòm bơta nggồr càl rbut dờng Kơnràñ chu gơ mơ ồs, mơ ală ntê gơ rơp gơkòl chu pơrguc.

¹⁷ Yàng Jehôwa Gơnap Gơnoar Làm Jơh, la Bơtau neh tam mê, neh yal tơnggit bơta rung rài tòmdră mơ mê, tài bơh bơta iơh bơsak hìu Israel mơ hìu Juda neh lơh, nàng bơrcek Añ in gơjrañ bơh neh chu kơlhô Baal in.”

Kai gơrmơ̆i tòmdră mơ Jeremi

¹⁸ Yàng Jehôwa neh ai añ in git bơta hơ̆, mơ añ git rau; Gen Kơnràñ neh yal tơlik añ in broă lơh iơh bol khai dê.

¹⁹ Ai añ, kung be belàt kòn lơbơn niam Kong tề tus hơ tiah tơnchơt, Mơ añ ò git bol khai bơtào kai tòmdră mơ añ, mơ lah: “Bol he tơnroh tĕ chi bal mơ plai, Bol he pơndut tĕ khai bơh lơgar cau kis, Tồ sơnđan khai rơp ò gam kah tai.”

²⁰ Khoai Yàng Jehôwa Gơnap Gơnoar! Kơnràñ cahrña dô bă song ring, sền sơwì nùs mơ dơngoh, Añ kòñ gŏ bơta Kơnràñ sal tê di bol khai, Bơh añ neh yal tơlik broă añ mơ Kơnràñ.

²¹ Gen tàng do la jơnau Yàng Jehôwa đơs bơh cau Anatôt, la cau kòñ tă bơta kis mê, mơ lah: “Dilah mê ò kòñ chơt bơh tê añ, gen bañ ai sơnđan Yàng Jehôwa mơ đơs hwơr!”

²² Behơ̆ tàng, Yàng Jehôwa Gơnap Gơnoar đơs be do: “Do, Añ rơp lơh glài bol khai; ală cau klau pơnu rơp chơt bơh đào, ală kòn klau kòn ùr bol khai rơp chơt bơh bơta jơgloh rung;

²³ Rơp ò gơs cau lơi gam wơl bol khai in; bơh tus di sơnam lơh glài, Añ rơp dùh bơta rung rài hơđang cau klau Anatôt.”