Jeremi 1 - Sră Goh 2018

Jeremi geh Yàng hòi sac mơ gơs bơta gơtơnggŏ

¹ Jơnau đơs Jeremi kòn klau Hilkia dê, la dô nă tòm ală cau gơnoar ơn phan duh khoai tòm Anatôt, kơnhwàl Benjamin.

² Jơnau Yàng Jehôwa đơs mơ khai tòm rài Jôsia, kòn klau Ammôn bơtau Juda, sơnam dơ̆ jơt pe rài bơtau hơ̆ dê;

³ kung neh đơs mơ khai tòm rài Jehôyakim, kòn klau Jôsia, bơtau Juda dê, jơl tus lồi sơnam dơ̆ jơt dùl rài bơtau Jedekia, kòn klau Jôsia, bơtau Juda dê, hơ̆ la sơnam cau tòm Jerusalem kong kup gơs dĭ tòm kơnhai dơ̆ pram.

Bơta hòi sac Jeremi

⁴ Gơs jơnau Yàng Jehôwa đơs mơ añ be do:

⁵ “Lài mơ tŭ crơng mòn mê tòm kơndul mè, Añ neh git mê rau; Lài mơ tŭ mê geh deh, Añ neh ơn is mê, bơtào mê lơh gơs cau gơnoar hwơr ală lơgar in.”

⁶ Añ đơs lah: “Khoai Yàng Jehôwa! Do, añ ò git đơs ñchi lơi, bơh añ la kơnòm dềt.”

⁷ Mơ Yàng Jehôwa đơs tai: “Bañ đơs: Añ la kơnòm dềt; Bơh mê rơp lòt tus hơ ală cau lơi Añ sồr mê lòt, Mơ rơp đơs ală jơnau Añ sồr mê đơs.

⁸ Bañ rngòt di bol khai; Bơh Añ ơm mơ mê nàng dong klàs mê.” Yàng Jehôwa đơs behơ̆.

⁹ Gen, Yàng Jehôwa pò tê ƀư di bơr añ, Yàng Jehôwa đơs tai mơ añ lah: “Do, Añ rơp ơn ală jơnau Añ tòm bơr mê.

¹⁰ Sền tĕ, ngai do Añ neh bơtào mê hơđang ală làng bol, ală lơgar, Nàng mê dus mơ phà, tơnroh mơ lơh tơrlah, bơt bơtào mơ tam.”

¹¹ Mơ kung gơs jơnau Yàng Jehôwa đơs tai mơ añ lah: “Ơ Jeremi, ñchi mê gŏ?” Añ ho wơl lah, “Añ gŏ dô nơm ntê chi plai gus.”

¹² Gen Yàng Jehôwa đơs: “Mê gŏ tòm toh ngan; bơh Añ kơp gàr, prap jơnau đơs Añ nàng lơh wil tơl.”

¹³ Jơnau Yàng Jehôwa đơs tai mơ añ dơ̆ bàr lah: “Ñchi mê gŏ?” Añ ho: “Añ gŏ dô nơm glah dà khuh, bơr glah sơrkềng bơh đah đang.”

¹⁴ Yàng Jehôwa đơs: “Hơ̆ la bơta rung rài bơh đah đang rơp dùh hơđang jơh ală làng bol tòm lơgar do.

¹⁵ Behơ̆ gen, Añ rơp hòi jơh ală jơi bơtiàn ală làng bol đah đang, Yàng Jehôwa đơs behơ̆; bol khai rơp tus, mơ cau lơi kung ơn sơbàn he dê di mpồng dờng Jerusalem, gơrwàng lơh ală dơrñang gùt dar gơ, mơ sò tơm ală ƀòn Juda dê.

¹⁶ Añ rơp yal tơnggit bơta cahrña Añ tòmdră mơ bol khai, bơh bơta iơh bol khai neh lơh; tài bơh bol khai neh sang lòi Añ, chu kơlhô ală yàng ndai in, mơ duh khoai broă tê he lơh gơs.

¹⁷ Behơ̆, mê kơt tĕ but, ñă ntào, yal bol khai in git ală bơta Añ neh ai gơnoar sồr mê in. Bañ rngòt di bol khai, rngòt Añ rơp lơh mê in rngòt rngơt di đap bol khai.

¹⁸ Behơ̆, ngai do, Añ bơtào mê lơh gơs ƀòn dờng kơ̆ cê, lơh gơs jrong mơ lòs, lơh gơs dơrñang mơ kòng, tòmdră mơ jơh ală lơgar do, tòmdră mơ ală bơtau Juda, ală cau kwang at bồ gơ, ală cau gơnoar ơn phan duh khoai, mơ làng bol tòm lơgar.

¹⁹ Bol khai rơp tòmlơh mơ mê, mơya ò geh pha mơ mê; bơh Añ ơm bal mơ mê nàng dong tă mê, Yàng Jehôwa đơs behơ̆.”