Jakơ 5 - Sră Goh 2018

Jơnau bơto tơngkah cau pas sơm

¹ Tŭ do, ơ oh mi la ală cau pas sơm! Ñìm rac tĕ, hòi driau tài bơh ală bơta rung rài rơp tuh hơđang bol mê.

² Phan mơna bol mê kòl ồm lề, ồi ào bol mê dê kòl mŏ tu sa rau.

³ Màh priă bol mê dê è sa rau, è sa hơ̆ rơp lơh cơng tòmsò mơ bol mê, gơ rơp sa poac bol mê dê kung be ồs sa behơ̆ sơl. Bol mê neh tơrgòm prap ală phan màng ală ngai lồi dut in.

⁴ Jền tơngai ală cau lơh ơpah toès tòm sre bol mê dê, mơ bol mê neh sa kơrlơm, gen gơ hòi driau; mơ jơnau hòi driau ală cau toès dê neh guh tus dê tồr Yàng Gơnap Gơnoar Làm Jơh.

⁵ Bol mê neh pròng preh phan mơna mơ kơnhơl gơlềng gơlàng tòm plai ù do; bol mê neh ròng lơmă să he dê tòm ngai lơh poac.

⁶ Bol mê neh lơh nền glài mơ neh tơnchơt cau song ring, mơya khai ò tòmdră mơ bol mê.

Kong ơt tòm bơta rung rài

⁷ Ơ oh mi, behơ̆ tàng kong ơt tĕ jơl tus dê tŭ Yàng tus. Sền tĕ, cau lơh sre kơp gơn cồng nha kas màng bơh tòm ù, mơ gơs nùs kong ơt jơl tus di tŭ lơi tus mìu bồ sơnam mơ lồi sơnam.

⁸ Oh mi kung behơ̆ kong ơt tĕ mơ kơ̆ nùs, bơh bơta tus wơl Yàng dê neh rềp rau.

⁹ Ơ oh mi, bañ yoam pơrhiat di gơp, tồ klàs di bơta cahrña; ne, Bơtau cahrña ơm di bơr mpồng.

¹⁰ Ơ oh mi, kah tĕ ală cau gơnoar hwơr neh ai sơnđan Yàng mơ đơs, đòm krơh tĕ bol khai neh kong ơt tòm bơta kong bòl glar jê sồt.

¹¹ Do, bol he sơnđan ală cau neh kong ơt la cau gơs lơngai. Oh mi neh kơno bơh bơta kong ơt Jop dê, mơ neh gŏ mbe Yàng neh ai khai in tòm tŭ lồi dut, bơh Yàng bềng lìu nùs nđàc sơngit mơ bơta kòñ nđàc.

¹² Mơya lài ngan, ơ oh mi añ jê, bañ srat să, bañ sơnio trồ, bañ sơnio tiah, kung bañ sơnio phan lơi ndai mơ srat să; mơya di gen đơs di, ò gen đơs ò, tồ klàs di bơta lơh nền glài.

Bơta hòi dan ală cau kòp jê in

¹³ Gơs cau lơi tòm ală oh mi tìp bơta bòl glar jê sồt sơl? Cau hơ̆ hòi dan tĕ. Gơs cau lơi geh bơta chò hòp sơl? Cau hơ̆ đơs chò tĕ jòng ro Yàng.

¹⁴ Gơs cau lơi tòm ală oh mi kòp jê sơl? Cau hơ̆ jà tĕ ală cau kwang kra tòm Hìu Jum Goh tus, nàng bol khai ai sơnđan Yàng bong mơñà hòi dan cau kòp jê in.

¹⁵ Bơta hòi dan bơh bơta dòn rơp dong klàs cau kòp, Yàng rơp sơmbòi cau hơ̆ in; mơ dilah cau kòp gơs tìs glài, kung rơp geh toh.

¹⁶ Behơ̆ yal glài tĕ bal mơ gơp, mơ hòi dan tĕ bal mơ gơp, tồ ală oh mi in geh sơmbòi. Jơnau hòi dan cau song ring dê gơs gơnap gơnoar dờng ƀă tàm ngan.

¹⁷ Eli la cau be bol he, mơ tòm tŭ khai jơh nùs hòi dan nàng ò gơs mìu, gen ò gơs mìu hơđang ù tòm pe sơnam mơ prau kơnhai.

¹⁸ Lồc behơ̆ khai hòi dan tai, gen trồ mìu, mơ ù gơlik plai đo.

Cau tìs nrah rê wơl

¹⁹ Ơ oh mi añ jê, dilah tòm ală oh mi gơs cau lơi tìs nrah ngài mơ jơnau song, mơ gơs cau ndai tề lam khai rê wơl,

²⁰ gen pal git lah cau lơi tề lam cau glài rê wơl sang gùng tìs nrah, hơ̆ la dong hwềng soàn khai klàs bơh bơta chơt mơ jơm ndơp oă tồi glài.