Biblia Todo Logo
Bìoball air-loidhne

- Sanasan -

I Yal Yau 23 - Sră Goh 2018


Hìu nhă ală cau Lebi mơ gơnoar broă bol khai dê

1 Tòm tŭ Dabit neh kra mơ jòng sơnam, khai pồ bơtào Salômôn kòn klau khai dê gơs bơtau at bồ hơđang Israel.

2 Dabit hòi pơjum jơh ală cau kwang at bồ hơđang Israel dê bal mơ ală cau gơnoar ơn phan duh khoai mơ cau Lebi.

3 Ală cau Lebi bơh pe jơt sơnam guh hơđang neh geh kòp khà jơh ală la pe jơt phàm rbô nă.

4 Dabit đơs lah: “Bàr jơt poan rbô nă tòm ală cau do rơp rcang gàr broă lơh tòm hìu duh khoai Yàng Jehôwa dê mơ prau rbô nă la cau kwang at bồ mơ kwang cahrña.

5 Poan rbô nă rơp gơs cau kơp gàr mpồng, mơ poan rbô nă rơp gơs cau jòng ro Yàng Jehôwa bal mơ tơl ală kơñi mơ añ neh lơh bơh bơta jòng ro.”

6 Dabit cah ală cau Lebi jat mpồl ală kòn klau Lebi dê la Gersôn, Kôhat mơ Merari.


Ală cau mpồl Gersôn

7 Ală kòn klau Gersôn la Ladan mơ Simei.

8 Ală kòn klau Ladan la Jehiel cau lam bồ, Jetham mơ Jôel jơh ală la pe nă.

9 Ală kòn klau Simei la Selômôt, Hasiel mơ Haran, jơh ală la pe nă. Hơ̆ la ală cau lam bồ ală hìu nhă Ladan dê.

10 Ală kòn klau Simei dê la Jahat, Jina, Jeus mơ Beria. Hơ̆ la poan nă kòn klau Simei dê, jơh ală la poan nă.

11 Jahat la cau lam bồ, Jijah la cau dơ̆ bàr, mơya Jeus mơ Beria ò gơs oă kòn klau; behơ̆ bol khai kòp bal tòm dô hìu nhă nàng lơh broă bal.


Ală cau mpồl Kôhat

12 Ală kòn klau Kôhat dê la Amram, Isar, Hebrôn mơ Usjiel, jơh ală la poan nă.

13 Ală kòn klau Amram dê la Arôn mơ Môise. Arôn neh geh ơn is, khai mơ ală kòn sau khai dê tòm jơh ală rài, geh ơn is ngui ală phan sàng goh rlau jơh nàng ơn ală phan ơn duh khoai di đap Yàng Jehôwa, duh broă di đap Kơnràñ mơ ai lơngai tòm sơnđan Kơnràñ dê gam sùm sùm.

14 Ală kòn klau Môise cau Yàng Tom Trồ dê gen geh kòp la dô pơnah tòm jơi bơtiàn Lebi dê.

15 Ală kòn klau Môise dê la Gersôn mơ Eliejer.

16 Ală kòn klau Gersôn dê la Sebuel cau lam bồ.

17 Ală kòn klau Eliejer dê la Rehabia cau lam bồ. Eliejer ò gơs kòn klau ndai, mơya ală kòn klau Rehabia la gal ngan.

18 Ală kòn klau Isar dê la Selômit cau lam bồ.

19 Ală kòn klau Hebrôn dê la Jeria cau lam bồ, Amaria dơ̆ bàr, Jahasiel dơ̆ pe mơ Jekameam dơ̆ poan.

20 Ală kòn klau Usjiel la Maka cau lam bồ mơ Issia kòn oh.


Ală cau mpồl Merari

21 Ală kòn klau Merari dê la Mali mơ Musi. Ală kòn klau Mali dê la Eleajar mơ Kis.

22 Eleajar chơt ò gơs kòn klau; khai mìng gơs ală kòn ùr. Kòn jơi bơtiàn bol khai dê la ală kòn klau Kis dê bau mơ bol khai.

23 Ală kòn klau Musi dê la Mali, Eder mơ Jeremôt, jơh ală la pe nă.

24 Hơ̆ la ală kòn sau Lebi dê jat hìu nhă bol khai dê, la ală cau tòm hìu nhă jat be bol khai neh geh cih sơnđan mơ geh kòp khà bơh bàr jơt sơnam mơ dờng rlau lơh broă tòm hìu duh khoai Yàng Jehôwa dê.

25 Bơh Dabit neh đơs lah: “Bơh Jehôwa Yàng Tom Trồ neh ai làng bol Kơnràñ in geh rlô lơngap lơngai mơ neh tus ơm tòm Jerusalem gam sùm sùm,

26 ală cau Lebi ò càng tùng hìu duh khoai tai hala phan ngui lơi ndai tòm broă gơ dê.”

27 Jat ală jơnau bơto yal lồi dut Dabit dê gen ală cau Lebi geh kòp khà bơh cau bàr jơt sơnam mơ dờng rlau.

28 Broă tòm ală cau Lebi dê la dong kòl ală kòn sau Arôn dê tòm bơta duh broă tòm hìu duh khoai Yàng Jehôwa dê, hơ̆ la rcang gàr ală ƀlàng hìu, ală ơdŭ, bơta lơh sàng goh jơh ală phan neh ơn is sàng goh, mơ ală broă ndai tòm hìu Yàng Tom Trồ dê.

29 Bol khai pal rcang piang lă pơdơng hơđang cơnòng, sac rwah kơmbuh phe nàng ơn duh khoai, ală ƀañ ò gơs kañ, ƀañ buh ơn pơdơng mơ ală phan ơn pơdơng bơcă mơ mơñà, mơ jơh ală phan was kơr.

30 Bol khai rơp ntào kòp àng drim nàng ưnngài mơ jòng ro Yàng Jehôwa. Bol khai kung lơh behơ̆ tòm kòp mho

31 mơ tòm tŭ phan ơn chu pơrguc ơn Yàng Jehôwa in tòm ală ngai Saƀat, ală bơta pơjum sa kơnhai pa mơ ală ngai pơjum sa neh lơh nền, jat be khà pal càng bol khai dê òs duh broă di đap Yàng Jehôwa.

32 Behơ̆ bol khai pal prap gàr ală broă geh jào bơh Sàl Tòm Mat, Tiah Sàng Goh, mơ pal dong kòl ală kòn sau Arôn la oh mi bol khai dê, nàng duh broă tòm hìu duh khoai Yàng Jehôwa dê.

© 2018 United Bible Societies. All rights reserved.

Bible Society Vietnam
Lean sinn:



Sanasan