I Yal Yau 22 - Sră Goh 2018

Dabit rcang bơt Hìu duh khoai

¹ Gen Dabit đơs lah: “Tềng do rơp gơs hìu Jehôwa Yàng Tom Trồ dê, mơ tềng do rơp gơs cơnòng ơn phan chu pơrguc bơh Israel.”

² Dabit ai jơnau sồr pơjum tơrgòm ală cau làng bol bơdìh gam ơm tòm lơgar Israel, mơ Dabit bơtào ală cau phàt lŭ rcang gơs lŭ neh phàt nàng bơt hìu Yàng Tom Trồ dê.

³ Khai rcang sir oă ngan lòs nàng lơh gơs đìn pơng ală mpồng dờng mơ ală phan ngui tòm hìu, mơ gơs oă kòng tian gơs ò rgơi kơr,

⁴ mơ gơs oă chi pơnàng tian gơs ò jai kòp, bơh cau Sidôn mơ cau Tirơ neh cèng Dabit in oă ngan chi pơnàng Dabit in.

⁵ Dabit đơs lah: “Salômôn kòn klau añ la dô nă cau kơnòm să mơ ò git làm, mơ hìu rơp geh bơt Yàng Jehôwa in pal ryŭ ryơm ngan, tiơng pơnro mơ àng gơklŏ di đap mat jơh ală làng bol. Gen tàng añ rơp rcang sir jơh ală phan nàng bơt hìu hơ̆.” Behơ̆ Dabit jơh nùs rcang sir ală bơta lài mơ tŭ khai chơt.

Dabit jào broă Salômôn mơ ală cau at bồ Israel in bơt hìu duh khoai

⁶ Gen khai hòi Salômôn kòn klau khai dê mơ bơto jào broă khai in bơt hìu Yàng Jehôwa in la Yàng Tom Trồ Israel dê.

⁷ Dabit đơs mơ Salômôn lah: “Ơ kòn klau añ jê, añ neh gơs nùs kòñ bơt dô nơm hìu Sơnđan Jehôwa Yàng Tom Trồ añ in.

⁸ Mơya gơs jơnau Yàng Jehôwa đơs mơ añ lah: ‘Mê neh lơh gơhòr oă mhàm mơ neh tòmlơh tòm oă bơta tòmlơh. Mê rơp ò bơt Sơnđan Añ in dô nơm hìu, tài bơh mê neh lơh gơhòr oă mhàm tòm ù di đap mat Añ.

⁹ Mơya mê rơp gơs dô nă kòn klau, khai rơp gơs dô nă cau ring lơngai mơ lơngap lơngai, mơ Añ rơp ai khai in bơta rlô lơngap lơngai bơh di jơh ală cau sò tơm khai dê bơh kòp đah. Sơnđan khai rơp la Salômôn, mơ Añ rơp ai Israel in bơta lơngap lơngai mơ ring lơngai tòm rài khai.

¹⁰ Khai la cau rơp bơt dô nơm hìu Sơnđan Añ in. Khai rơp lơh gơs kòn klau Añ jê, mơ Añ rơp lơh gơs bèp khai dê. Añ rơp bơt bơtào kơ̆ sơbàn lơgar khai dê hơđang Israel gam sùm sùm.’

¹¹ Tŭ do, ơ kòn klau añ jê, dan Yàng Jehôwa ơm bal mơ kòn, mơ dan kòn in geh bơtoah bơtoài mơ bơt hìu Jehôwa Yàng Tom Trồ kòn dê jat be Kơnràñ neh đơs bơh kòn.

¹² Dan Yàng Jehôwa ai kòn in bơta jak chài mơ bơta git wă tòm tŭ Kơnràñ jào gơnoar kòn in at bồ hơđang Israel, nàng kòn prap gàr bơta boh lam Jehôwa Yàng Tom Trồ kòn dê.

¹³ Gen kòn rơp geh bơtoah bơtoài dilah kòn kơrhia lơh jat ală jơnau sồr mơ bơta boh lam mơ Yàng Jehôwa neh kơnòm di Môise ai Israel in. Lơh tĕ pràn kơldang mơ khin cha. Bañ rngòt mơ bañ gơplơ̆ nùs.

¹⁴ Añ neh kong bòl glar jê sồt oă ngan nàng rcang lài hìu duh khoai Yàng Jehôwa in dô rhiang rbô talơng màh, dô tơlak sa talơng priă, kòng mơ lòs gen oă ngan ò jai kơr, bơh neh gơs oă ngan, bal mơ chi mơ lŭ tai sơl. Mơ kòn rgơi ơn bơtơl tai mơ ală phan hơ̆.

¹⁵ Kòn gơs oă cau lơh broă la cau chài phàt lŭ, cau chài bơt lŭ mơ cau chài lơh chi, bal mơ ală cau chài lơh tơl ală broă ndai

¹⁶ mơ màh mơ priă, mơ kòng mơ lòs, ntum khà ală cau lơh broă hơ̆ la oă ngan ò jai kòp. Tŭ do, rơp sơntòm lơh broă tĕ, mơ Yàng Jehôwa rơp ơm bal mơ kòn.”

¹⁷ Dabit kung ai jơnau sồr jơh ală cau at bồ Israel dong kòl Salômôn kòn klau khai dê.

¹⁸ Dabit đơs mơ bol khai lah: “Jehôwa Yàng Tom Trồ bol mê dê ò di ơm bal mơ bol mê ò ơ? Kơnràñ ò di neh ai bol mê in rlô lơngap lơngai bơh di kòp đah ơ? Bơh Kơnràñ neh jào añ in jơh ală làng bol ơm tòm lơgar, mơ lơgar kong dòn duh Yàng Jehôwa mơ làng bol Kơnràñ dê.

¹⁹ Tŭ do, ơn tĕ nùs nhơm mơ hwềng soàn bol mê dê nàng jòi jat Jehôwa Yàng Tom Trồ bol mê dê. Lòt tĕ bơt hìu sàng goh Jehôwa Yàng Tom Trồ dê, tồ Đài Ho Bal Yàng Jehôwa dê mơ ală phan sàng goh Yàng Tom Trồ dê geh cèng tơmut tòm dô nơm hìu neh bơt sơnđan Yàng Jehôwa in.”