I Yal Yau 12 - Sră Goh 2018

Ală cau ling jat Dabit

¹ Do la ală cau neh lòt tus hơ Dabit tòm Jiklak, tòm tŭ khai ò geh lik lòt khat gơboh, tài bơh Sol kòn klau Kis; bol khai la ală cau tòm mpồl ling jak neh dong Dabit tòm bơta tòmlơh.

² Bol khai la ală cau pañ àtak, mơ rgơi pañ kam hala pañ lŭ mơ tê ma hala tê kiau; bol khai la jơi bơtiàn Benjamin gơp bơtiàn mơ Sol.

³ Cau at bồ la Ahiejer, mơ Jôas bal mơ bàr nă kòn klau Semaa cau Gibea dê; kung gơs Jesiel mơ Pelet ală kòn klau Asmabet sơl; Beraka, Jehu cau Anatôt,

⁴ Ismaia cau Gabaôn, dô nă cau ling tòm mpồl Pe Jơt nă, mơ la cau at bồ mpồl Pe Jơt nă; Jeremi, Jahajiel, Jôhanan, Jôjabat cau Gederah,

⁵ Elusai, Jerimôt, Bealia, Semaria mơ Sephatia cau Haruphit;

⁶ Elkana, Issia, Ajarel, Jôeser mơ Jasôbeam cau Kôra;

⁷ Jôela mơ Jebadia ală kòn klau Jerôham bơh Gedôr.

⁸ Bơh mpồl cau Gadit neh lòt tus hơ Dabit tòm theng kơ̆ cê tòm ƀlàng ngềt ngơt, mơ la ală cau git làm bơta tòmlơh, chài rgơi at khèl mơ tà. Muh mat bol khai dê la be muh mat klìu triă, mơ bol khai sơrbac sơrbang be ală be brê hơđang ală mơnơm.

⁹ Ejer la cau at bồ, Ôbadia la cau at bồ oh, Eliap cau dơ̆ pe,

¹⁰ Mismanna cau dơ̆ poan, Jeremi cau dơ̆ pram,

¹¹ Attai cau dơ̆ prau, Eliel cau dơ̆ poh,

¹² Jôhanan cau dơ̆ phàm, Eljabat cau dơ̆ sin,

¹³ Jeremi cau dơ̆ jơt mơ Makbannai cau dơ̆ jơt dùl.

¹⁴ Ală cau Gat la ală cau kwang at bồ mpồl ling, cau dềt rlau jơh at bồ dô rhiang, cau dờng rlau jơh at bồ dô rbô.

¹⁵ Bol khai la ală cau neh tiă hiòng Jordan tòm kơnhai dùl tòm tŭ dà guh bam jơh bàr gah, mơ bol khai ting bơtrơh jơh ală cau ơm tòm ală thòng, tus hơ đah mattơngai lik mơ tus hơ đah mattơngai mut.

¹⁶ Gơs dô êt cau Benjamin mơ cau Juda neh tus hơ Dabit tòm theng kơ̆ cê.

¹⁷ Dabit lik lòt wă rò bol khai, mơ đơs mơ bol khai lah: “Dilah bol mê tus mơ añ be cau bơyô nàng dong kòl añ, gen nùs añ rơp gơlik gơs dô bă bal mơ bol mê. Mơya dilah bol mê tus nàng tòmdră mơ añ be cau sò tơm añ jê, bulah tê añ jê ò lơh bơta tìs; gen dan ồng pàng bol he dê sền gŏ mơ cahrña bol mê.”

¹⁸ Gen Yàng Hwềng tus hơđang Amasai, cau at bồ mpồl pe jơt nă, mơ khai đơs lah: “Ơ Dabit, bol hi gơrê bal mơ ồng! Ơ kòn klau Jese, bol hi ơm đah mơ ồng! Dan ồng geh lơngap lơngai, lơngap lơngai, Dan ală cau dong kòl ồng kung geh lơngap lơngai! Bơh Yàng Tom Trồ ồng dê la Bơtau rơp dong kòl ồng.” Behơ̆, Dabit dòp rò bol khai mơ bơtào bol khai gơs cau at bồ ală mpồl cau lòt jat khai.

¹⁹ Gơs dô êt cau Manase neh sang lòi mpồl bol khai dê mơ lòt jat Dabit tòm tŭ khai lòt bal mơ cau Philistin nàng tòmlơh mơ Sol. Khai mơ cau jat khai ò dong kòl cau Philistin tài bơh ală cau at bồ Philistin neh tòmbơyai bal bơtrơh tơlik khai, mơ đơs lah: “Khai rơp rê wơl hơ cau tòm khai dê la Sol, mơ khà pal tơm la ală bồ bol he dê.”

²⁰ Tòm tŭ Dabit lòt tus hơ Jiklak, ală cau Manase neh sang lòi mpồl bol khai dê mơ lòt jat Dabit la: Atna, Jôjabat, Jediael, Mikael, Jôjabat, Elihu mơ Jillethai, la ală cau at bồ ală mpồl dô rbô nă cau tòm Manase.

²¹ Bol khai dong kòl Dabit tòmdră mơ ală mpồl cau phà tòmpìt, bơh bol khai la jơh ală cau ling jak tòmlơh mơ la ală cau at bồ tòm mpồl ling.

²² Bơh ngai do tus hơ ngai ne, gơs oă cau tus dong kòl Dabit jơl tus di tŭ khai gơs dô mpồl ling dờng kung be dô mpồl ling Yàng Tom Trồ dê.

Mpồl ling Dabit dê tòm Hebrôn

²³ Do la ntum khà ală cau ling tòmlơh neh lòt tus hơ Dabit tòm Hebrôn nàng tơrwơl lơgar Sol dê rê Dabit in jat be Yàng Jehôwa neh đơs.

²⁴ Ală cau Juda at khèl mơ tà bol khai dê la prau rbô phàm rhiang nă nàng tòmlơh.

²⁵ Cau Simeôn pràn kơldang mơ jak tòmlơh la poh rbô dô rhiang nă.

²⁶ Cau Lebi gơs poan rbô prau rhiang nă.

²⁷ Jehôyada la cau at bồ hìu nhă Arôn, bal mơ khai la pe rbô poh rhiang nă.

²⁸ Mơ Jadôk la dô nă cau ling pơnu jak tòmlơh bal mơ bàr jơt bàr nă cau at bồ ling tòm hìu nhă khai dê.

²⁹ Cau Benjamin la cau gơp bơtiàn Sol dê gơs pe rbô nă, pơnah oă tòm bol khai ơm song mơ hìu Sol dê jơl tus di tŭ hơ̆.

³⁰ Cau Epraim gơs bàr jơt rbô phàm rhiang nă cau pràn kơldang jak tòmlơh, cau màng ryŭ tòm hìu nhă jơi bơtiàn bol khai dê.

³¹ Nggùl jơi bơtiàn cau Manase dê la phàm rhiang rbô jat sơnđan mat is neh tus nàng bơtào Dabit gơs bơtau.

³² Cau Issaka la cau git wă tŭ tơngai mơ git ñchi bơta Israel pal lơh, gơs bàr rhiang nă cau at bồ bal mơ ală cau gơp bơtiàn bol khai ơm hơđơm gơnoar at bồ bol khai dê.

³³ Cau Jebulun la ală cau ling git làm neh rcang sir nàng tòmlơh, rgơi ngui tơl jơh ală bơta phan tòmlơh nàng dong kòl Dabit, gơs dô nùs ơm song mơ Dabit, gơs pram jơt rbô nă.

³⁴ Cau Neptali gơs dô rbô nă cau at bồ, bal mơ pe jơt poh rbô nă cau at khèl mơ tà.

³⁵ Cau Dan neh rcang sir nàng tòmlơh gơs bàr jơt phàm rbô prau rhiang nă.

³⁶ Cau Aser, la ală cau ling git làm mơ neh rcang sir nàng tòmlơh gơs poan jơt rbô nă.

³⁷ Mơ bơh đah mattơngai lik hiòng Jordan, cau Ruben, cau Gat mơ nggùl jơi bơtiàn cau Manase, àñ tơl jơh ală phan tòmlơh krơi is, gơs dô rhiang bàr jơt rbô nă.

³⁸ Jơh ală cau do la cau ling jak tòmlơh neh duh broă jat tap sèng tòm mpồl ling. Bol khai tus hơ Hebrôn bal mơ nùs lơh nền wil tơl bơtào Dabit gơs bơtau at bồ hơđang jơh Israel. Jơh ală cau Israel ndai kung dô nùs bal tòm bơta bơtào Dabit gơs bơtau.

³⁹ Bol khai ơm pe ngai tềng hơ̆ bal mơ Dabit, sa ñô phan hìu nhă bol khai dê neh rcang bol khai in.

⁴⁰ Ală cau gơp ƀòn bol khai dê ơm ngài kung be cau Issaka, Jebulun mơ Neptali kung tus mơ cèng bal phan sa pơdiang hơđang ngkòi ală alàng, làkđa, alàng ơseh mơ kơnrồ. Gơs lìu làc ală phan neh rcang kung be kơmbuh kòi mi, ƀañ plai ƀal, ƀañ plai ño, tơrnòm, mơñà, kơnrồ mơ belàt, bơh gơs bơta hòn chò tòm Israel.