I Timôthe 6 - Sră Goh 2018

Broă tòm cau dĭ gơna dê

¹ Jơh ală cau ơm tòm yô dĭ gơna sền tĕ di cau tòm he la pal ki ngàm tòm jơh ală bơta, tồ sơnđan Yàng Tom Trồ mơ gùng duh khoai ò gơkòl cau đơs tràl sơrbil.

² Cau lơi gơs cau tòm la cau dòn jat, gen ò di ai kai bơh la oh mi mơ sền òsơp di khai; mơya pal sơlo duh broă lin rlau tai, bơh cau dòp geh tơngai broă he dê la cau dòn jat mơ la cau he kòñ gơboh. Hơ̆ la ală bơta mê pal bơto sồr mơ bơto tơngkah.

Kơrhia ală cau bơto ma blac

³ Dilah gơs cau lơi bơto gùng duh khoai ndai, ò jat gùng duh khoai song Yàng Jesu Krist bol he dê, mơ jơnau bơto sồr jat bơta duh rngòt,

⁴ gen cau hơ̆ la jòng is să he, ò git wă dô êt lơi; mơya khai gơs nùs òs pơndang mơ tòm pơndang bal bơh ală jơnau đơs, tài bơh hơ̆ gơlik gơs bơta ƀoah tòmlah, tòmpìt tòmhà, bơrsèl tơnhial, pin iơh,

⁵ mơ bơta tòm pơndang bal ală cau gơs nùs kơlôi ƀơ̆ iơh, ò gơs jơnau song, sền bơta duh rngòt be la bơta jòi cồng nha.

⁶ Mơya nùs duh rngòt bal mơ bơta hừh nùs, hơ̆ la bơta cồng nha dờng.

⁷ Bơh bol he ò cèng phan lơi tòm tŭ mut tòm dunnia, mơ bol he kung ò rgơi cèng phan lơi tòm tŭ lik sơl,

⁸ mơya dilah bol he gơs phan sa phan soh, gen hừh nùs rau.

⁹ Mơya cau kòñ bơta pas sơm gen gơtơmut tòm bơta ơniai, gơkòl yar dă, gơdùh tòm oă bơta hàm kòñ is, bơrngơl gơla sơbơng roh, la bơta lơh cau in gơtơnkram tòm bơta roh lơm mơ roh rui.

¹⁰ Bơh bơta hàm hà jền priă la tòm ryas jơh ală bơta iơh bơsak dê, gơs cau tài bơh ting jat gơ gen tàng kòl gơ pơrlồm sang lòi bơta dòn, hwềng nùs kong oă bơta moat jrùng jê sồt.

Bơto tơngkah Timôthe

¹¹ Mơya, ơ kòn la cau Yàng Tom Trồ dê, pleh tĕ di ală bơta hơ̆, mơ jòi jat bơta song ring, bơta duh rngòt, bơta dòn, bơta kòñ gơboh, bơta ơt ơl, bơta niam lơnhơn.

¹² Tòmlơh tĕ bơta tòmlơh niam bơta dòn dê; sơmbat kơ̆ di bơta kis gam sùm sùm, bơh mê neh geh hòi sac tus hơ bơta hơ̆, mơ kung bơh hơ̆ mơ mê neh yal tơlik bơta yal tơlik niam di đap oă cau lơh cơng.

¹³ Di đap Yàng Tom Trồ la Bơtau ai bơta kis jơh ală phan in mơ di đap Yàng Jesu Krist la Bơtau neh lơh cơng bơh bơta yal tơlik niam di đap Bônsơ Pilat, añ bơto mê kràñ cê,

¹⁴ prap gàr tĕ bơta sồr lam dô bă wil tơl mơ ò gơs tiah geh lah pơrhơng, jơl tus di tơngai Yàng Jesu Krist bol he dê tơlik mat,

¹⁵ la di di tơngai mơ Bơtau gơnoar dờng gơs mìng dô nă lơm mơ pal jòng ro rơp yal tơlik, la Bơtau ală bơtau dê, mơ Yàng ală yàng dê,

¹⁶ mìng dô nă Kơnràñ gơs bơta ò tŭ lơi chơt, ơm tòm bơta àng cau ò rgơi tus rềp, ò gơs cau lơi sền gŏ Kơnràñ mơ kung ò rgơi gŏ Kơnràñ sơl. Dan bơta màng ryŭ gơnap gơnoar gam sùm sùm gơrê jơh mơ Kơnràñ! Amen.

Bơto cau pas gơs in

¹⁷ Bơto tĕ kràñ cê cau pas gơs ơm tòm dunnia do bañ pơnhừ să mơ bañ ơn nùs gơn kơnòm di phan mơna ò kơ̆ nền, mơya pal ơn tĕ nùs gơn kơnòm di Yàng Tom Trồ, la Bơtau ai gòi jơh ală phan lìu làc bol he in dòp geh dô bă hòn chò.

¹⁸ Bơto kràñ cê bol khai in pal lơh bơta niam, pas gơs tòm broă niam, rcang sir ai gòi mơ chò hòp tòmpà phan he dê cau in ƀà,

¹⁹ nàng bol khai in tơrgòm dô nơm mơnàng niam tòm rài tơnơ̆, tồ sơmbat kơ̆ di bơta kis la bơta kis ngan.

Jơnau nting lồi dut

²⁰ Ơ Timôthe, kơrmap gàr tĕ bơta neh jào mê in, pleh tĕ di ală jơnau gơlềng gơlàng ƀơ̆ ƀơl jat dunnia, mơ ală bơta sòdră bơta git jak dê, la bơta git jak mìng gơs sơnđan gòi.

²¹ Gơs cau neh sơnđan is la gơs bơta git jak hơ̆, gen tàng neh tìs di gùng bơta dòn rau. Dan bơta nđàc ơm bal mơ mê.