I Timôthe 3 - Sră Goh 2018

Nùs nhơm ală cau gơs gơnoar broă tòm Hìu Jum Goh

¹ Dilah gơs cau kơp kòñ lơh gơs cau gơnoar bơto, hơ̆ la kòñ dô nơm broă niam, hơ̆ la jơnau nền cê ngan.

² Behơ̆ cau gơnoar bơto pal ngan ò gơs tiah geh lah pơrhơng, la cau klau gơs mìng dô nă bau ùr lơm, git kơrhia, ngac ngar, geh ki ngàm, git wă rò nac, mơ git bơto sồr niam.

³ Ò tơhìr tơrnòm alak, ò lơh rhung rhang, mơya pal sơrmah sơrmài; ò jòi jơnau, mơ ò hàm hà jền priă;

⁴ pal git at bồ niam hìu nhă he, kơrmap gàr kòn sau he dòn duh dô bă kràñ cê tòm jơh ală bơta;

⁵ bơh dilah cau lơi ò git at bồ hìu nhă tòm he dê, gen mbe rgơi sền gàr Hìu Jum Goh Yàng Tom Trồ dê taih?

⁶ Cau pa dòn jat ò di lơh gơs cau gơnoar bơto, rngòt khai jòng is să he mơ dùh tòm bơta lơh glài jàm lòi cà ràk in mòn.

⁷ Cau gơnoar bơto pal geh cau bơdìh lơh cơng niam bơh khai, rngòt khai kòl cau bơtat bơtròh mơ yar dă cà ràk dê.

Cau dong gàr tòm Hìu Jum

⁸ Ală cau dong gàr hìu jum kung pal kràñ cê, ò đơs bàr jơnau, ò jròk ñô tơrnòm alak, ò hàm hà cồng nha ƀơ̆ ƀơl,

⁹ mơya pal kơrmap gàr bơta ndơp ndơr bơta dòn dê bal mơ nùs tồr sàng goh.

¹⁰ Ală cau hơ̆ kung pal kong bơta lòng lài sơl, dilah ò gơs tiah geh lah pơrhơng, gen sồng lòi bol khai lơh gơs cau dong gàr hìu jum.

¹¹ Cau ùr kung behơ̆ sơl, pal kràñ cê, ò di đơs iơh, pal git kơrhia mơ dòn song tòm jơh ală bơta.

¹² Cau dong gàr hìu jum pal la cau klau gơs mìng dô nă bau ùr lơm, pal git at bồ niam kòn sau mơ hìu nhă tòm he dê.

¹³ Bơh cau lơi lơh niam tòm gơnoar broă dong gàr hìu jum, gen geh màng ryŭ mơ nùs khin cha ngan tòm bơta dòn tòm Yàng Krist Jesu.

Bơta jrô ndơp tòm gùng bơta dòn dê

¹⁴ Añ kơp kòñ mhar lòt tus hơ kòn, mơya añ cih ală bơta do lài,

¹⁵ rngòt dilah añ òbat tus, gen mê kung git lơh mbe lơi tòm hìu Yàng Tom Trồ, hơ̆ la Hìu Jum Goh Yàng Tom Trồ gam kis sùm dê, la jrong mơ mơnàng jơnau song dê.

¹⁶ Cau lơi kung dòp lah bơta ndơp ndơr bơta duh rngòt dê la dờng ngan: Bơtau neh geh yal tơlik tòm poac să, Neh geh Yàng Hwềng kòp la song ring, Neh geh cau gơnrơh sền gŏ, Neh geh bơto yal ală làng bol in, Neh geh dunnia dòn dòp, Neh geh cèng tơngguh tòm bơta gơklŏ.