I Timôthe 2 - Sră Goh 2018

Hòi dan jơh tơl nă cau in

¹ Behơ̆ sơnròp ngan añ bơto tơngkah lah: Pal rac dan, hòi dan, hòi dan ala, mơ ưnngài jơh tơl nă cau in,

² ală cau bơtau in, mơ jơh ală cau gơnoar at bồ in, nàng bol he in geh kis dô bă ring lơngai mơ lơngap lơngai tòm bơta duh rngòt mơ dòn duh tòm jơh ală bơta.

³ Hơ̆ la bơta niam mơ geh niam nùs Yàng Tom Trồ la Yàng Dong Klàs bol he dê.

⁴ Kơnràñ kòñ jơh tơl nă cau geh dong klàs mơ tus hơ bơta git wă jơnau song.

⁵ Bơh gơs mìng dô nă Yàng Tom Trồ lơm, mơ gơs mìng dô Bơtau Đơng Kừh ơm digùl Yàng Tom Trồ mơ jơi kòn mơnus, hơ̆ la Yàng Jesu Krist la mơnus.

⁶ Kơnràñ neh phi să lơh gơs phan ơn tơwài glài tơl nă cau in, hơ̆ la bơta gơs cơng tàng neh geh ràng tơlik tòm toh di tơngai pơgon.

⁷ Tài bơh cơng tàng hơ̆, añ neh geh bơtào lơh gơs cau bơto Jơnau Niam mơ cau gơnoar bơto dờng, añ đơs song, ò đơs blac, lơh gơs cau bơto làng bol bơdìh in bơh bơta dòn mơ jơnau song.

⁸ Behơ̆ añ kòñ ală cau klau pò tê sàng goh hơđang nàng hòi dan tòm kòp bă tiah, bañ gơs bơta gơjrañ mañ mơ bơta tòm pơndang bal.

Cau ùr tòm Hìu Jum Goh

⁹ Kung behơ̆ sơl, añ kòñ ală cau ùr sơmpô să mơ ồi ào dô bă ƀa liă, git jơnau mơ kràñ cê, ò bơka sŏ, ò ngui màh, lŭ kràng màng hala ồi ào kas jền nàng sơmpô să,

¹⁰ mơya ai broă niam nàng sơmpô să, sồng di pal mơ cau ùr sơnđan is să he la cau ùr duh rngòt di Yàng Tom Trồ.

¹¹ Cau ùr pal ơm mŏ mŏ nàng bơtê, mơ pal dòn duh tòm jơh ală bơta.

¹² Añ ò ai gơnoar cau ùr in bơto sồr, kung ò geh at bồ hơđang cau klau sơl, mơya pal ơm mŏ mŏ.

¹³ Bơh Adam neh geh mòn gơs lài, gen sồng tus di Eba.

¹⁴ Mơ tai, ò di Adam kòl pơrlồm, mơya cau ùr kòl pơrlồm mơ tìs glài.

¹⁵ Bulah behơ̆, cau ùr rơp geh dong tă tòm bơta deh kòn, dilah kư̆ ơm tòm bơta dòn, bơta kòñ gơboh, mơ bơta gơlik gơs sàng goh, bal mơ bơta pơndêt să.