I Samuel 9 - Sră Goh 2018

Sol geh sac rwah lơh gơs bơtau

¹ Gơs dô nă cau tòm jơi bơtiàn Benjamin, sơnđan la Kis, kòn klau Abiel, sau Jeror, se Bekôrat, set Aphiah, la dô nă cau pas sơm.

² Khai gơs dô nă kòn klau sơnđan la Sol, gam pơnu mơ niam klau. Ò gơs dô nă cau lơi digùl làng bol Israel niam klau rlau mơ khai; khai ntào bồ khai mơ pơnì jơnhoa rlau mơ jơh ală cau ndai.

³ Tŭ hơ̆ ală alàng Kis bèp Sol dê neh lòt nrah, gen Kis đơs mơ Sol kòn klau khai dê lah: “Cèng tĕ dô nă tòm ală cau duh broă lòt bal mơ mê nàng jòi ală alàng.”

⁴ Behơ̆, khai lòt gan làm tiah kơh mơnơm Epraim dê mơ làm tiah Salisa, mơya bol khai jòi ò bàn ală alàng. Bol khai tus tòm kơnhwàl Saalim, mơya ală alàng kung ò gơs tềng hơ̆. Gen bol khai lòt gan ù tiah Benjamin dê, mơya bol khai jòi ò bàn bol gơ.

⁵ Tòm tŭ bol khai tus hơ ù tiah Jup, gen Sol đơs mơ cau duh broă lòt jat khai lah: “Bol he rê lă rngòt bèp añ ò tai kơlôi bơh roh alàng mơya rơp kơlôi rcang bơh bol he.”

⁶ Mơya cau duh broă ho lah: “Gơs dô nă cau Yàng Tom Trồ dê tòm ƀòn do, khai la dô nă cau geh ki ngàm ngan; jơh ală bơta khai đơs gơlik di ngan. Tŭ do, bol he lòt lă tus tềng hơ̆. Digơlan khai rơp yal bol he in git gùng lơi pal lòt.”

⁷ Sol đơs mơ cau duh broă khai dê lah: “Dilah bol he lòt gen ñchi bol he rơp cèng khai in taih? Phan sa tòm ală kơldung bol he dê neh jơh. Bol he ò gơs phan pà lơi nàng ai cau Yàng Tom Trồ in. Ñchi bol he gơs taih?”

⁸ Cau duh broă ho Sol tai lah: “Do, añ gơs dô pơnah poan kơr priă. Añ rơp ai gơ cau Yàng Tom Trồ in nàng khai sơnio gùng lơi bol he pal lòt.”

⁹ (Lài òr tòm Israel, dilah dô nă cau kòñ lòt hòi lùp Yàng Tom Trồ gen khai rơp đơs lah: “Tus tĕ, bol he lòt lă hơ cau git lài,” tài bơh tòm tŭ hơ̆ cau òs sơnđan cau gơnoar hwơr la cau git lài.)

¹⁰ Sol đơs mơ cau duh broă khai dê lah: “Niam ngan, bol he lòt lă.” Behơ̆ bol khai lòt tus hơ ƀòn dờng la tiah cau Yàng Tom Trồ dê ơm.

¹¹ Tòm tŭ bol khai guh kơh nàng mut tòm ƀòn dờng, bol khai tìp dô êt nă cau ơruh lik lòt nàng bơ̆ dà, gen lùp bol khai lah: “Cau git lài ơm tềng do sơl?”

¹² Bol khai ho lah: “Khai ơm tềng do, khai pa lòt lài mơ ală ồng. Lòt tĕ mhar, khai pa tus tòm ƀòn dờng bơh làng bol rơp ơn phan ơn duh khoai hơđang tiah jơnhoa.

¹³ Tòm tŭ ală ồng mut tòm ƀòn dờng gen ală ồng rơp bàn khai lài mơ tŭ khai guh hơ tiah jơnhoa nàng sa. Làng bol rơp ò sa lài mơ tŭ khai tus, tài bơh khai pal ai lơngai phan ơn hơ̆ in; lồc behơ̆ ală cau geh jà rơp sa. Tŭ do guh tĕ; ală ồng rơp tìp khai tòm jơ do mo.”

¹⁴ Bol khai lòt tus hơ ƀòn dờng, mơ tòm tŭ bol khai pa mut tòm ƀòn dờng gen gŏ Samuel lòt tòm gùng tus hơ đah bol khai guh hơ tiah hơđang.

¹⁵ Mơ tai tòm ngai lài mơ tŭ tus Sol, Yàng Jehôwa neh yal tơlik Samuel in git lah:

¹⁶ “Ngai hìng pơgap tòm jơ do, Añ rơp sồr dô nă cau klau bơh lơgar Benjamin tus mơ mê. Bong mơñà tĕ khai nàng lơh gơs cau at bồ hơđang làng bol Israel Añ jê. Khai rơp dong tă làng bol Añ jê klàs bơh di tê làng bol Philistin. Añ neh wèt sền di làng bol Añ jê, bơh jơnau hòi driau bol khai dê neh tus hơ Añ.”

¹⁷ Tòm tŭ Samuel gŏ Sol gen Yàng Jehôwa đơs mơ khai lah: “Do la cau mơ Añ neh yal mê in; khai rơp at bồ làng bol Añ jê.”

¹⁸ Sol tus rềp hơ Samuel di mpồng ƀòn mơ lùp lah: “Dan ồng yal añ in git ntềng đah hìu cau git lài dê taih?”

¹⁹ Samuel ho lah: “Añ do la cau git lài, lòt tĕ lài mơ añ tus hơ tiah jơnhoa, bơh ngai do mê rơp sa bal mơ añ, mơ tòm àng drim añ rơp lòi mê lòt mơ rơp yal mê in git jơh ală bơta tòm nùs mê dê.

²⁰ Ai ală alàng mê dê neh roh pe ngai rau, bañ kơlôi rcang bơh bol gơ, bơh neh jòi bàn rau. Mơ tai, jơh ală bơta dờng màng tòm Israel neh geh lòi ñcau in taih? Hơ̆ ò di la lòi mê mơ jơh hìu bèp mê dê ò ơ?”

²¹ Sol ho lah: “Añ mìng la dô nă cau Benjamin, bơh dô jơi bơtiàn dềt rlau jơh tòm Israel ò ơ? Mơ hìu nhă añ la dềt rlau jơh tòm jơh ală mpồl hìu nhă tòm jơi bơtiàn Benjamin ò ơ? Ñchi bơh tài ồng đơs mơ añ bơta do taih?”

²² Gen Samuel lam khai mơ cau duh broă khai dê mut tòm ơdŭ mơ ai bol khai in nggui di tiah hơđap jơh ală cau geh jà, bol khai pơgap pe jơt nă.

²³ Samuel đơs mơ cau lơh phan sa lah: “Cèng tĕ pơnah phan sa mơ añ neh ai mê in la pơnah añ neh sồr mê ơn is.”

²⁴ Behơ̆ cau lơh phan sa ai dô bơnô bal mơ poac mơ ơn gơ di đap Sol. Samuel đơs lah: “Do la pơnah neh prap lòi mê in. Sa tĕ, tài bơh gơ neh geh ơn is mê in di di tŭ neh lơh nền, nàng mê in sa bal mơ ală cau nac.” Behơ̆ Sol sào bal mơ Samuel tòm ngai hơ̆.

²⁵ Tơnơ̆ mơ tŭ bol khai mù bơh di tiah jơnhoa mơ tus tòm ƀòn dờng, dô nơm cơnòng neh rcang Sol in hơđang rkàng hìu, mơ khai tòmpừ să bic.

²⁶ Tòm tŭ àng drim, Samuel hòi Sol tus hơđang rkàng hìu mơ đơs lah: “Guh tĕ mơ añ rơp jun mê lòt gùng mê dê.” Sol guh, mơ jơh bàr nă khai mơ Samuel lik lòt bal tòm gùng.

²⁷ Tòm tŭ bol khai mù tus hơ gah ƀòn dờng gen Samuel đơs mơ Sol lah: “Sồr tĕ cau duh broă lòt lài mơ bol he, mơ tòm tŭ khai neh lòt rau, mê ơm wơl tềng do tòm dô ơthoa nàng añ yal mê in git jơnau Yàng Tom Trồ dê.”