I Samuel 7 - Sră Goh 2018

¹ Behơ̆ ală cau Kiriat Jearim tus ai Đài Yàng Jehôwa dê, mơ cèng gơ mut tòm hìu Abinadap hơđang dòr. Bol khai ơn is Eleajar, kòn klau khai dê nàng sền gàr Đài Yàng Jehôwa dê.

² Bơh ngai hơ̆ Đài Yàng Jehôwa dê ơm ing jŏ ngai tòm Kiriat Jearim, tòm bàr jơt nam, mơ jơh hìu Israel ñìm rac pơt wòl mơ jòi jat Yàng Jehôwa.

Samuel gơs kwang cahrña

³ Samuel đơs mơ jơh hìu Israel lah: “Dilah ală bol mê jơh nùs rê wơl hơ Yàng Jehôwa, gen sang tĕ ală yàng lơgar bơdìh mơ Astarte bơh digùl bol mê, ơn tĕ song nùs bol mê dê Yàng Jehôwa in, mơ mìng duh broă Kơnràñ lơm, gen Kơnràñ rơp dong tă bol mê bơh di tê cau Philistin.”

⁴ Behơ̆ Israel sang jơh ală Baal mơ Astarte bol khai dê, mơ bol khai mìng duh broă Yàng Jehôwa lơm.

⁵ Gen Samuel đơs lah: “Hòi pơjum tĕ jơh Israel tòm Mispa, mơ añ rơp hòi dan mơ Yàng Jehôwa bol mê in.”

⁶ Behơ̆ bol khai neh pơjum bal tòm Mispa, mơ bơ̆ dà mơ tuh gơ di đap Yàng Jehôwa. Bol khai ơt sa tòm ngai hơ̆, mơ đơs lah: “Bol hi neh tìs glài tòmdră mơ Yàng Jehôwa.” Mơ Samuel la cau cahrña Israel tòm Mispa.

⁷ Tòm tŭ cau Philistin neh kơno la làng bol Israel neh pơjum tòm Mispa, gen ală cau kwang at bồ bol khai dê guh nàng tòmlơh mơ Israel. Mơ tòm tŭ Israel kơno bơta hơ̆ gen bol khai rngòt di cau Philistin.

⁸ Bol khai đơs mơ Samuel lah: “Bañ dơh rac dan mơ Jehôwa Yàng Tom Trồ bol hi dê bol hi in, mơ hòi dan nàng Kơnràñ rơp dong tă bol hi klàs bơh di tê cau Philistin.”

⁹ Behơ̆ Samuel kup dô nơm kòn belàt gam pô mơ ơn gơlơh gơs phan ơn chu pơrguc Yàng Jehôwa in. Khai rac dan mơ Yàng Jehôwa Israel in mơ Yàng Jehôwa dòp jơnau khai.

¹⁰ Tòm tŭ Samuel gam ơn phan ơn chu pơrguc hơ̆, gen cau Philistin tus rềp nàng brồ lơh Israel. Mơya Yàng Jehôwa lơh ntơr kơnàs nggồr dờng ngan tòm ngai hơ̆ tòmdră mơ cau Philistin, lơh bol khai in nsràng rngòt mơ bol khai ntoat dô bơh di đap Israel.

¹¹ Mơ ală cau Israel lik bơh Mispa, ting jat cau Philistin mơ tơnchơt bol khai rò gùng lòt tus hơ đah ne Betkar.

¹² Gen Samuel ai dô nơm lŭ mơ bơtào gơ digùl Mispa mơ Jesanah, mơ tơmoh sơnđan gơ la Ebenejer, mơ khai đơs lah: “Yàng Jehôwa neh dong bol he jơl tus di tŭ do.”

¹³ Behơ̆ cau Philistin gơkòl duh broă mơ ò mut tòm ù tiah cau Israel tai; tê Yàng Jehôwa tòmdră mơ cau Philistin jơh rài Samuel dê.

¹⁴ Ală ƀòn dờng cau Philistin neh tòmpìt bơh cau Israel neh geh ai wơl Israel in bơh Ekrôn tus hơ Gat, mơ Israel dong tă ƀòn lơgar gùt dar klàs bơh di gơnoar at bồ cau Philistin dê. Mơ kung gơs bơta ring lơngai digùl cau Israel mơ cau Amôrit sơl.

¹⁵ Samuel cahrña Israel jơl jơh rài kis khai dê.

¹⁶ Kòp nam khai lòt bơh Betel tus hơ Gilgal mơ Mispa, cahrña Israel tòm jơh ală tiah hơ̆.

¹⁷ Gen khai rê wơl hơ Rama la tiah gơs hìu ơm khai dê, tềng hơ̆ khai kung cahrña Israel, mơ khai bơt bơtào dô nơm cơnòng duh khoai Yàng Jehôwa in tềng hơ̆.