I Samuel 6 - Sră Goh 2018

Đài Bơta Ho bal geh cèng brê wơl hơ Israel

¹ Đài Yàng Jehôwa dê neh ơm poh kơnhai tòm ù tiah Philistin.

² Gen làng bol Philistin hòi pơjum ală cau kơiang mơ ală cau bơjơu gru mơ đơs lah: “Ñchi bơta bol he pal lơh mơ Đài Yàng Jehôwa dê taih? Yal tĕ bol hi in git ñchi bol hi pal lơh nàng pơyoa wơl gơ hơ tiah gơ dê.”

³ Bol khai ho lah: “Dilah bol mê kòñ pơyoa wơl Đài Yàng Tom Trồ Israel dê, gen bañ mìng pơyoa dô nơm gơ lơm, mơya pal jòi gùng nàng pơyoa Kơnràñ in dô nơm phan ơn duh khoai bơh tồi glài. Gen bol mê rơp geh bòi, mơ bol mê rơp git ñchi bơh tài Kơnràñ òhềt lòi tê bơh di bol mê.”

⁴ Cau Philistin lùp lah: “Phan ơn bơh tồi glài la ñchi nàng bol he pal ơn Kơnràñ in taih?” Bol khai ho lah: “Pram nơm rùp kòp pluh as mơ màh, pram nơm rùp đe mơ màh jat be khà cau kwang at bồ làng bol Philistin dê, tài bơh bol mê bal mơ ală cau kwang at bồ bol mê dê neh kong ndròm bal dô bơta rung rài.

⁵ Behơ̆ lơh tĕ ală rùp kòp pluh as bal mơ ală rùp đe neh tơnroh ƀòn lơgar, mơ ai bơta gơklŏ Yàng Israel in. Digơlan Kơnràñ rơp lơh nggòc tê Kơnràñ dê hơđang bol mê mơ hơđang ală yàng bol mê dê mơ lơgar bol mê dê.

⁶ Ñchi bơh tài bol mê lơh kơldang nùs kung be làng bol Ejiptơ mơ Pharaôn neh lơh taih? Tơnơ̆ mơ tŭ Kơnràñ neh lơh glài kơnjơ̆ di bol khai gen bol khai neh ò lòi Israel in khat gơboh nàng lik lòt ò ơ?

⁷ Behơ̆ tŭ do, rcang sir tĕ dô nơm rơndeh pa mơ kup bàr nơm kơnrồ me gơs kòn gam pô toh mơ òhềt tŭ lơi tui yô. Kơt tĕ bol gơ di rơndeh, mơya tề ală kơnrồ kòn hơ tiah ndai, ngài bơh bol gơ.

⁸ Gen ai Đài Yàng Jehôwa dê mơ ơn gơ hơđang rơndeh, mơ tòm dô nơm hồp di gah gơ gen ơn tĕ ală rùp mơ màh mơ bol mê pơyoa wơl Yàng Jehôwa in lơh gơs phan ơn duh khoai bơh tồi glài. Pơyoa tĕ gơ mơ lòi gơ lòt gùng gơ dê.

⁹ Mơya kơp sền tĕ, dilah gơ lòt guh hơ đah lơgar tòm gơ dê hơ̆ la đah Bet Semes, gen hơ̆ la Yàng Jehôwa neh đùh bơta rung rài dờng do hơđang bol he. Mơya dilah ò di behơ̆ gen bol he rơp git la ò di tê Kơnràñ neh lơh glài bol he, bơta hơ̆ neh tus is gơ dê lơm.”

¹⁰ Behơ̆ bol khai neh lơh bơta hơ̆, bol khai kup bàr nơm kơnrồ be neh đơs mơ kơt bol gơ di rơndeh, mơ krơ̆ ală kòn bol gơtòm wàng.

¹¹ Bol khai ơn Đài Yàng Jehôwa dê hơđang rơndeh bal mơ hồp gơs ală đe mơ màh mơ ală rùp kòp pluh as.

¹² Gen ală kơnrồ lòt song jat gùng guh hơ Bet Semes, lòt ndang mƀòh ndang, ò wèt đah ma hala đah kiau. Ală cau kwang at bồ làng bol Philistin lòt jat bol gơ tus hơ nhàr ƀòn Bet Semes.

¹³ Tŭ hơ̆ làng bol Bet Semes ơm toès kòi mi tòm thòng. Tòm tŭ bol khai pò mat mơ gŏ Đài, bol khai hòn chò mơ lòt rò gơ.

¹⁴ Rơndeh tus tòm ƀlàng kòi Jôsue Bet Semes dê, mơ ơm dơh wơl tềng hơ̆, di gah dô nơm lŭ dờng. Làng bol koh rơndeh lơh gơs lòng mơ ơn bàr nơm kơnrồ hơ̆ lơh gơs phan ơn duh khoai chu pơrguc Yàng Jehôwa in.

¹⁵ Cau Lebi tơmù Đài Yàng Jehôwa dê bal mơ hồp gơs ală rùp lơh mơ màh mơ ơn bol gơ hơđang dô pơnai lŭ dờng. Tòm ngai hơ̆, làng bol Bet Semes ơn ală phan ơn chu pơrguc mơ ală phan ơn duh khoai Yàng Jehôwa in.

¹⁶ Pram nă cau kwang at bồ làng bol Philistin gŏ jơh ală bơta hơ̆, gen bol khai rê wơl hơ Ekrôn tòm ngai hơ̆.

¹⁷ Do la ală rùp kòp pluh as mơ màh mơ cau Philistin pơyoa Yàng Jehôwa in lơh gơs phan ơn bơh tồi glài: ală ƀòn Asdot, Gaja, Askalôn, Gat mơ Ekrôn, kòp ƀòn dô nơm.

¹⁸ Mơ ntum khà ală đe lơh mơ màh la jat be khà ală ƀòn dờng Philistin dê gơrê bal mơ pram nă cau kwang at bồ, hơ̆ la ală ƀòn dờng kơ̆ cê bal mơ ală ƀòn dềt tòm lơgar. Pơnai lŭ dờng hơđang hơ̆ cau neh tơmù Đài Yàng Jehôwa dê la dô nơm cơng tàng tus di ngai do tòm ƀlàng sre Jôsue cau Bet Semes dê.

¹⁹ Kòn sau Jekônia dê ò hòn chò bal mơ làng bol tòm Bet Semes, tòm tŭ bol khai wă rò Đài Yàng Jehôwa dê, mơ Kơnràñ tơnchơt poh jơt nă cau klau tòm bol khai, tài bơh bol khai neh sền tòm dơlam Đài Yàng Jehôwa dê. Làng bol ñìm rac tài bơh bơta lơh glài kơnjơ̆ Yàng Jehôwa dê gơwèt mơ bol khai.

²⁰ Gen ală làng bol Bet Semes đơs lah: “Ñcau rgơi ntào di đap mat Yàng Jehôwa la Yàng Tom Trồ sàng goh do taih? Kơnràñ rơp lòt tus hơ ñcau nàng bol he rgơi klàs bơh Kơnràñ taih?”

²¹ Gen bol khai sồr cau kong sồr lòt tus hơ cau ơm tòm Kiriat Jearim mơ đơs lah: “Làng bol Philistin neh cèng wơl Đài Yàng Jehôwa dê. Mù tĕ cèng gơ tus hơ tiah bol mê dê.”