I Samuel 28 - Sră Goh 2018

Sol mơ cau ùr bơjơu tòm Endôr

¹ Tòm ală ngai hơ̆ cau Philistin pơjum ală mpồl ling bol khai dê nàng lơh kơlìn tòmlơh mơ Israel. Akis đơs mơ Dabit lah: “Mê pal git lah mê mơ ală cau mê dê rơp lòt bal mơ añ tòm mpồl ling.”

² Dabit đơs lah: “Niam ngan, gen bơtau rơp git ñchi cau duh broă bơtau dê rgơi lơh.” Akis ho wơl mơ Dabit lah: “Niam ngan, añ rơp bơtào mê lơh gơs cau gàr să añ jê jơh rài.”

Sol jòi lùp cau bơjơu

³ Tŭ hơ̆ Samuel neh chơt, mơ jơh Israel neh ñìm rac bơh khai mơ tơp khai tòm Rama, ƀòn tòm khai dê. Sol neh bơtrơh tơlik ală cau bơsìh mơ ală cau gru bơjơu bơh di lơgar.

⁴ Cau Philistin pơjum bal, tus lơh sàl tòm Sunem, tòm tŭ Sol pơjum jơh Israel mơ lơh sàl tòm Gilbôa.

⁵ Tòm tŭ Sol gŏ mpồl ling Philistin gen khai rngòt; mơ nùs khai rơm să rngòt oă ngan.

⁶ Khai hòi lùp Yàng Jehôwa, mơya Yàng Jehôwa ò ho wơl khai in bơh bơta mpau, hala bơh Urim, hala bơh ală cau gơnoar hwơr.

⁷ Gen Sol đơs mơ ală cau duh broă khai dê lah: “Jòi tĕ añ in dô nă cau ùr bơjơu nàng añ rgơi lòt tus lùp khai.” Ală cau duh broă khai dê đơs mơ khai lah: “Ne, gơs dô nă cau bơjơu tòm Endôr.”

⁸ Behơ̆ Sol lơh tànggơ soh ồi ào ndai, khai mơ bàr nă cau lòt tus hơ cau ùr hơ̆ tòm trồ mang. Mơ đơs lah: “Dan hòi dô nơm hwềng añ in mơ hòi tơngguh añ in hwềng cau mơ añ rơp sơnđan ai in.”

⁹ Mơya cau ùr đơs mơ khai lah: “Ngan la ồng git bơta Sol neh lơh. Khai neh tơnroh ală cau bơjơu mơ ală cau bơsìh bơh lơgar. Ñchi bơh tài ồng pơt dă nàng cèng bơta chơt añ in taih?”

¹⁰ Sol srat să mơ khai ai sơnđan Yàng Jehôwa mơ lah: “Di ngan kung be Yàng Jehôwa kis sùm, ai rơp ò kòl lơh glài bơh bơta hơ̆.”

¹¹ Gen cau ùr lùp lah: “Ñcau añ pal hòi tơngguh ồng in taih?” Sol ho lah: “Hòi tĕ Samuel añ in.”

¹² Tòm tŭ cau ùr gŏ Samuel gen khai driau dờng mơ đơs mơ Sol lah: “Ñchi bơh tài ồng pơrlồm añ taih? Ồng la Sol!”

¹³ Cau bơtau đơs mơ khai lah: “Bañ rngòt, ñchi ai gŏ taih?” Cau ùr đơs lah: “Añ gŏ dô nơm hwềng guh bơh ù.”

¹⁴ Sol lùp lah: “Mbe gơlơh muh mat khai dê taih?” Khai đơs lah: “Dô nă cau kra yùp mơ ào jrùh, guh bơh ù.” Behơ̆ Sol git hơ̆ la Samuel, khai tơmbic să blup mat di ù mơ khoai.

¹⁵ Gen Samuel đơs mơ Sol lah: “Ñchi bơh tài mê lơh dơrcul añ mơ hòi añ guh taih?” Sol ho lah: “Añ ơm tòm bơta bòl glar dờng ngan. Bơh cau Philistin lơh kơlìn tòmlơh mơ añ, mơ Yàng Tom Trồ neh sang lòi añ mơ ò ho wơl añ in tai, bulah bơh ală cau gơnoar hwơr hala bơh ală bơta mpau. Behơ̆ añ neh hòi ồng nàng yal añ git ñchi añ pal lơh.”

¹⁶ Samuel đơs lah: “Ñchi bơh tài mê hòi lùp añ bơh Yàng Jehôwa neh sang lòi mê mơ Kơnràñ neh gơlik gơs cau sò tơm mê dê taih?

¹⁷ Yàng Jehôwa neh lơh mê in jat be Kơnràñ neh kơnòm di añ mơ đơs; bơh Yàng Jehôwa neh crè lơgar bơh di tê mê mơ ai cau gơp ƀòn mê in la Dabit.

¹⁸ Tài bơh mê neh ò dòn jat jơnau Yàng Jehôwa mơ ò lơh gơlik gơs bơta gơjrañ dờng Kơnràñ dê tòmdră mơ cau Amalek, gen tàng ngai do Yàng Jehôwa lơh bơta do mê in.

¹⁹ Rlau mơ hơ̆, Yàng Jehôwa rơp jào Israel bal mơ mê tòm tê cau Philistin, mơ ngai hìng mê mơ ală kòn klau mê dê rơp ơm bal mơ añ. Yàng Jehôwa kung rơp jào mpồl ling Israel tòm tê cau Philistin.”

²⁰ Tŭ hơ̆ mo Sol gơpừ bic di ù, rngòt rngơt ngan tài bơh ală jơnau đơs Samuel dê. Khai ò gam pràn tai, bơh khai ò sa phan lơi tòm jơh ngai mơ mang hơ̆.

²¹ Tòm tŭ cau ùr hơ̆ tus rềp di Sol mơ gŏ khai rơm să rngòt oă ngan behơ̆ gen đơs lah: “Do, cau ùr duh broă bơtau dê neh dòn bơr bơtau. Añ neh phi bơta kis añ nàng lơh jat jơnau bơtau neh sồr.

²² Behơ̆ tŭ do, dan bơtau iat jơnau cau ùr duh broă bơtau dê mơ lòi añ yò bơtau in dô êt phan sa nàng bơtau sa tồ gơs pràn nàng lòt gùng bơtau dê.”

²³ Sol ò bài mơ đơs lah: “Añ ò bài sa.” Mơya ală cau duh broă Sol dê dô nùs bal mơ cau ùr hơ̆ pơnđơl ngan khai, gen khai iat jơnau bol khai dê. Khai guh bơh ù mơ nggui di cơnòng.

²⁴ Cau ùr hơ̆ gơs dô nơm kơnrồ kòn lơmă tòm hìu, gen khai sơrbac sơrbang lơh poac gơ. Khai ai kơmbuh phe bơcă klac mơ lơh gơs piang lă ò gơs kañ.

²⁵ Gen khai yò ală phan sa hơ̆ di đap Sol mơ ală cau duh broă khai dê, mơ bol khai sa. Gen bol khai ñă mơ lik lòt tòm mang.