I Samuel 27 - Sră Goh 2018

Dabit ơm digùl cau Philistin

¹ Dabit đơs tòm nùs khai dê lah: “Gơs dô ngai lơi, añ rơp gơkòl tơnroh bơh tê Sol dê. Bơta niam rlau jơh añ in la dô pleh hơ lơgar cau Philistin. Gen Sol rơp roh bơta gơn kơnòm, ò jòi añ tai tòm dơlam nhàr lơgar Israel, mơ añ rơp lik klàs bơh tê khai.”

² Behơ̆ Dabit lik lòt bal mơ prau rhiang nă cau ơm bal mơ khai tus hơ Akis, kòn Maôk bơtau Gat dê.

³ Dabit mơ ală cau khai dê ơm mơ Akis tòm Gat. Khai bal mơ mpồl khai dê, kòp nă bal mơ hìu nhă khai dê, Dabit mơ bàr nă bau ùr khai dê la Ahinôam bơh Jejreel mơ Abigail bơh Karmel, ùr bơnrau Nabal dê.

⁴ Tòm tŭ Sol geh cau yal lah Dabit neh dô pleh tòm Gat gen khai ò ting jat Dabit tai.

⁵ Gen Dabit đơs mơ Akis lah: “Dilah añ geh bơta nđàc di đap kơnràñ, dan ai añ in dô bă tiah tòm dô nơm ƀòn dềt nàng añ ơm tềng hơ̆. Ñchi bơh tài cau duh broă kơnràñ dê pal ơm tòm gơlang bal mơ bơtau taih?”

⁶ Behơ̆ ngai hơ̆ Akis ai ƀòn Jiklak Dabit in, gen tàng ƀòn Jiklak neh gơrê bal mơ ală bơtau Juda dê tus di ngai do.

⁷ Tŭ tơngai Dabit neh ơm tòm lơgar Philistin la dô nam mơ poan kơnhai.

⁸ Tŭ hơ̆ Dabit bal mơ ală cau khai dê guh brồ lơh cau Gesurit, cau Girjit, mơ cau Amalek. Bơh rài yau ală làng bol do ơm tòm ù tiah tòm gùng tus hơ Sur mơ tus hơ lơgar Ejiptơ.

⁹ Dabit brồ lơh ƀòn lơi gen khai ò lòi kis dô nă cau klau hala dô nă cau ùr lơi, mơya khai kup cèng ală belàt, ală kơnrồ, ală alàng, ală làkđa mơ ală ồi ào, gen rê wơl hơ Akis.

¹⁰ Tòm tŭ Akis lùp lah: “Ngai do mê lòt brồ lơh tiah lơi taih?” Gen Dabit ho lah: “Tòm Negep Juda dê” hala “Tòm Negep Jerameel dê” hala “Tòm Negep cau Kenit dê.”

¹¹ Dabit ò lòi kis dô nă cau klau hala dô nă cau ùr lơi nàng cèng tus hơ Gat, bơh khai kơlôi lah: “Rngòt bol hơ̆ rơp yal tơlik bơh bol he mơ đơs lah: ‘Hơ̆ la bơta Dabit neh lơh.’” Mơ hơ̆ la bơta mơ Dabit òs lơh tòm tŭ khai kis tòm lơgar Philistin.

¹² Akis dòn kơnòm di Dabit, mơ khai kơlôi is lah: “Khai neh lơh să tòm khai gơlik gơs cù kìr di đap làng bol khai dê la Israel, gen tàng khai rơp lơh gơs cau duh broă añ jê sùm sùm.”