I Samuel 2 - Sră Goh 2018

Jơnau hòi dan Anne dê

¹ Gen Anne hòi dan mơ đơs lah: “Nùs añ hừh hơh tòm Yàng Jehôwa; bơta pràn kơldang añ jê geh yò tơngguh tòm Yàng Tom Trồ añ jê. Bơr añ dơñŏ tơnhial di ală cau sò tơm añ jê, bơh añ hòn chò tòm bơta pha lin añ jê.

² Ò gơs cau lơi sàng goh be Yàng Jehôwa, ò gơs cau lơi rlau mơ Kơnràñ; ò gơs Pơnai Lŭ lơi ndròm be Yàng Tom Trồ bol he dê.

³ Bañ đơs tai ală jơnau pơnhừ să oă ir, bañ lòi jơnau jòng să lik bơh di bơr mê dê; bơh Yàng Jehôwa la Yàng Tom Trồ bơta git wă dê, mơ Kơnràñ kơr ală broă lơh.

⁴ Ală àtak ală cau pràn kơldang dê neh pă, mơya ală cau òsô geh tơnsoh bơta pràn kơldang.

⁵ Ală cau geh hòm lòt lơh ơpah nàng geh phan sa, mơya ală cau jơgloh geh lơmă bơh phan tòmpìt geh. Cau ùr kơnền neh deh poh nă kòn, mơya cau ùr gơs oă kòn gen jê sồt moat jrùng.

⁶ Yàng Jehôwa tơnchơt mơ hòi kis wơl; Kơnràñ cèng tơmù tòm bơtô ƀồc mơ cèng tơngguh wơl.

⁷ Yàng Jehôwa lơh rƀah lơòi mơ ai pas gơs; Kơnràñ tơnliah cau, mơ Kơnràñ yò tơngguh cau.

⁸ Kơnràñ yò tơngguh cau rƀah bơh di kơmbuh ù; Kơnràñ yò tơngguh cau siơ̆u siar bơh di gơnru bùh; Kơnràñ ơn bol khai nggui bal mơ ală kòn cau bơtau, mơ ai bol khai in pơrdòn dô nơm sơbàn màng ryŭ. Bơh ală jrong plai ù dê la bal mơ Yàng Jehôwa, Kơnràñ neh ơn lơgar dunnia hơđang gơ.

⁹ Kơnràñ rơp sền gàr jơng ală cau sàng goh Kơnràñ dê; mơya ală cau iơh bơsak rơp gơkòl tơnroh tòm klam jơngo; hơ̆ ò di bơh bơta pràn kơldang mơ cau geh pha lin rlau.

¹⁰ Ală cau tòmdră di Yàng Jehôwa rơp kong lề lac; bơh đang trồ Kơnràñ rơp tơndùh ntơr kơnàs hơđang bol khai. Yàng Jehôwa rơp cahrña ală tiah lồi dut plai ù dê; Kơnràñ rơp ai bơta pràn kơldang cau bơtau Kơnràñ in, mơ yò tơngguh gơnoar cau geh bong mơñà Kơnràñ dê.”

¹¹ Gen Elkana rê hìu tòm Rama, mơya cau kơnòm dềt ơm duh broă Yàng Jehôwa, di đap mat Heli la cau gơnoar ơn phan duh khoai.

Ală kòn klau iơh bơsak Heli dê

¹² Tŭ hơ̆ ală kòn klau Heli dê la ơlă ơlai; bol khai ò wèt sền di Yàng Jehôwa,

¹³ hala bơh broă ală cau gơnoar ơn phan duh khoai pal lơh gơwèt mơ làng bol: tòm tŭ gơs cau lơi ơn phan pơdơng duh khoai, cau duh broă cau gơnoar ơn phan duh khoai dê pal tus, tòm tŭ poac gam gơm, tòm tê at cơnhŏ pe sề;

¹⁴ mơ khai jră cơnhŏ pe sề tòm glah, tòm chàng, tòm glah crah, hala glah ƀung; mơ cơnhŏ sề kwĕ tơngguh gen poac hơ̆ rơp gơrê bal mơ cau gơnoar ơn phan duh khoai. Hơ̆ la bơta bol khai lơh gơwèt mơ jơh làng bol Israel neh tus tềng hơ̆.

¹⁵ Mơya, lài mơ tŭ chu dơngi, gen cau duh broă cau gơnoar ơn phan duh khoai dê tus đơs mơ cau ơn phan pơdơng lah: “Ai cau gơnoar ơn phan duh khoai in poac nàng buh; bơh khai ò dòp poac gơm bơh di mê, mơya mìng poac ris lơm.”

¹⁶ Dilah cau hơ̆ đơs mơ khai lah: “Lòi cau chu dơngi gơ dê lài, gen sồng ai tĕ phan lơi mê kòñ,” gen cau duh broă đơs lah: “Ò, mê pal ai mo tŭ do, dilah mê ò ai, gen añ rơp ngui pràn nàng tòmpìt gơ.”

¹⁷ Tồi glài ală cau pơnu do la dờng ngan di đap mat Yàng Jehôwa, bơh bol khai sền òsơp di phan ơn duh khoai Yàng Jehôwa dê.

Kơnòm klau Samuel tòm Silô

¹⁸ Samuel duh broă di đap Yàng Jehôwa; khai la dô nă kơnòm klau soh dô nơm Ephot mơ bài che dơmài lơbơn.

¹⁹ Kòp nam mè khai òs jing khai in dô nơm ào jrùh dềt, mơ cèng ai khai in tòm tŭ mò guh bal mơ bau klau nàng ơn phan duh khoai kòp nam.

²⁰ Gen Heli ai lơngai Elkana mơ bau khai in mơ đơs lah: “Dan Yàng Jehôwa ai mê in ală kòn bơh cau ùr do nàng ala kòn mơ khai neh ơn Yàng Jehôwa in.” Gen bol khai rê wơl hơ hìu bol khai dê.

²¹ Yàng Jehôwa kah tus di Anne, khai bun mơ deh pe nă kòn klau mơ bàr nă kòn ùr. Mơ kơnòm dềt Samuel rhòi dờng di đap Yàng Jehôwa.

²² Tŭ hơ̆ Heli neh kra ngan, khai neh kơno jơh ală bơta ală kòn klau khai dê lơh di jơh làng bol Israel, mơ mbe bol khai bic mơ ală cau ùr duh broă di mpồng mut hơ Sàl Tòm Mat.

²³ Behơ̆ khai đơs mơ bol khai lah: “Ñchi bơh tài bol mê lơh ală bơta behơ̆ taih? Añ neh kơno jơh làng bol đơs bơh ală broă iơh bol mê dê.

²⁴ Ò di lơh behơ̆, ơ ală kòn klau añ jê, hơ̆ ò di la jơnau yal niam mơ añ kơno jơnau pơnro làm tòm làng bol Yàng Jehôwa dê.

²⁵ Dilah dô nă cau tìs glài tòmdră mơ dô nă cau ndai, gen gơs cau đơs ala cau glài hơ̆ mơ Yàng Jehôwa; mơya dilah dô nă cau tìs glài tòmdră mơ Yàng Jehôwa gen ñcau rơp đơs ala khai in taih?” Bulah behơ̆, bol khai ò bài iat jơnau bèp bol khai dê, bơh hơ̆ la nùs kòñ Yàng Jehôwa dê nàng tơnchơt bol khai.

²⁶ Tŭ hơ̆ kơnòm dềt Samuel jơh să jan geh dờng mơ geh bơta nđàc gơwèt mơ Yàng Jehôwa mơ kòn mơnus sơl.

Jơnau đơs hwơr tòmdră mơ hìu Heli dê

²⁷ Gơs dô nă cau Yàng Tom Trồ dê tus hơ Heli mơ đơs mơ khai lah: “Yàng Jehôwa neh đơs be do: ‘Añ neh yal tơlik să tòm Añ mơ hìu nhă ồng pàng mê dê tòm Ejiptơ, tòm tŭ bol khai ơm lơh dĭ hìu Pharaôn in.

²⁸ Añ neh sac rwah ồng pàng mê dê bơh digùl jơh ală jơi bơtiàn Israel dê nàng lơh gơs cau gơnoar ơn phan duh khoai Añ jê, nàng guh hơ cơnòng duh khoai Añ jê, nàng chu kơlhô, mơ nàng soh dô nơm ephot di đap mat Añ. Añ kung neh ai hìu ồng pàng mê in jơh ală phan ơn duh khoai chu pơrguc bơh di làng bol Israel.

²⁹ Ñchi bơh tài bol mê hàm kòñ sa ală phan ơn duh khoai Añ jê mơ ală phan ơn mơ Añ neh sồr ơn taih? Mơ mê ki ngàm di ală kòn klau mê dê rlau mơ Añ, neh lơh să tòm bol mê in lơmă bơh sa ală pơnah niam rlau jơh tòm kòp nơm phan ơn làng bol Israel Añ jê taih?’

³⁰ Gen tàng Jehôwa Yàng Tom Trồ Israel dê đơs be do: ‘Añ neh ho lah hìu mê mơ hìu ồng pàng mê rơp duh broă di đap Añ sùm sùm.’ Mơya tŭ do Yàng Jehôwa đơs lah: ‘Bơta hơ̆ ngài ngan bơh di Añ! Bơh cau lơi ki ngàm di Añ gen Añ rơp ki ngàm di bol khai, ai ală cau lơi sền òsơp di Añ gen bol khai rơp kong sền òsơp.

³¹ Tŭ tơngai rơp tus tòm tŭ Añ rơp tơnroh bơta pràn mê dê mơ bơta pràn hìu ồng pàng mê dê, nàng ò gơs dô nă cau lơi tòm hìu mê dê rơp kis tus di kra bồ.

³² Gen tòm bơta gơlòng bòl glar bol mê rơp sền mơ nùs hàm kòñ di jơh ală bơta pas gơs rơp geh ai pà hơđang Israel; mơ ò gơs dô nă cau lơi tòm hìu mê rơp kis jòng sơnam.

³³ Cau lơi tòm hìu mê dê mơ Añ ò tă tơlik bơh di cơnòng duh khoai Añ jê rơp lòi gam wơl mìng nàng jùt dà mat, mơ lơh nùs mê in moat jrùng, mơ jơh ală cau tòm hìu mê dê rơp chơt bơh đào.

³⁴ Bơta neh lơh nền rài kis bàr nă kòn klau mê dê, hơ̆ la Hôpni mơ Phineas, rơp lơh gơs tềl mê in, bàr nă bol khai rơp chơt bal tòm dô ngai.

³⁵ Añ rơp bơtào tơngguh Añ in dô nă cau gơnoar ơn phan duh khoai dòn song, khai rơp lơh ală bơta jat nùs mơ bơta kơlôi Añ jê. Añ rơp bơtào kơ̆ hìu khai dê, mơ khai rơp duh broă di đap cau geh bong mơñà Añ jê sùm sùm.

³⁶ Gen kòp nă cau gam wơl tòm hìu mê dê rơp lòt tus cùn khoai di đap khai nàng geh dô pet priă mơ dô pet piang lă, mơ rơp đơs lah: “Dan bơtào añ tòm dô nơm broă cau ơn phan duh khoai dê, tồ añ geh sa dô pet piang lă.”’”