I Samuel 17 - Sră Goh 2018

Dabit mơ Gôliat

¹ Tŭ hơ̆ làng bol Philistin pơjum ală mpồl ling bol khai dê nàng tòmlơh; bol khai pơjum tòm Sukôt gơrê bal mơ Juda, mơ bol khai bơtào sàl digùl Sukôt mơ Aseka, tòm Ephes Dammim.

² Sol mơ cau Israel pơjum bal mơ bơtào sàl tòm thòng Ela, mơ rơndap tiah tòmlơh mơ cau Philistin.

³ Cau Philistin ơm hơđang mơnơm đah do, ai Israel ơm hơđang mơnơm đah ne, gơs thòng digùl bol khai.

⁴ Dô nă cau jak tòmlơh sơnđan la Gôliat cau Gat, lik bơh di sàl cau Philistin; khai jơnhoa rlau mơ sin tal.

⁵ Khai ndau di bồ dô nơm sơgơn mơ kòng, soh ào lòs tòmlơh gơs ngkàp kơnjơ̆ pram rbô sieklơ kòng.

⁶ Jơng khai pùt mơ kòng, gơs dô nơm tà dờng mơ kòng triau đah ngkòi khai dê.

⁷ Ngkơr đào khai dê dờng ndròm be dô nơm mơng cau tàñ ồi mơ cồng gơ mơ lòs kơnjơ̆ prau rhiang sieklơ. Cau at khèl khai dê lòt di đap khai.

⁸ Gôliat ntào hòi driau mơ ală mpồl ling Israel lah: “Ñchi bơh tài bol mê tus mơ rcang tòmlơh taih? Añ ò di la dô nă cau Philistin, mơ bol mê ò di la cau duh broă Sol dê ò ơ? Sac rwah tĕ dô nă cau bol mê in mơ sồr khai mù hơ do mơ añ.

⁹ Dilah khai rgơi tòmlơh mơ tơnchơt añ gen bol hi rơp gơs cau dĭ bol mê in; mơya dilah añ pha rlau mơ tơnchơt khai gen bol mê rơp lơh gơs dĭ bol hi in mơ duh broă bol hi.”

¹⁰ Cau Philistin đơs tai lah: “Ngai do añ đơs pơrlòng mơ ală mpồl ling Israel dê; sồr tĕ dô nă cau tus mơ añ nàng bol hi tòmlơh bal.”

¹¹ Tòm tŭ Sol mơ jơh ală cau Israel kơno ală jơnau cau Philistin dê, gen bol khai gơdô nùs mơ rngòt ngan.

¹² Dabit la kòn klau dô nă cau Ephrat sơnđan la Jese, bơh ƀòn Betlehem tòm Juda. Jese gơs phàm nă kòn klau, mơ tòm pah rài Sol khai neh kra mơ jòng sơnam rau.

¹³ Pe nă kòn klau dờng Jese dê neh lòt jat Sol tòm tiah tòmlơh. Kòn klau tơnhoa sơnđan la Eliap, kòn klau dơ̆ bàr la Abinadap, mơ kòn klau dơ̆ pe la Samma.

¹⁴ Dabit la kòn put; pe nă kòn klau dờng lòt jat Sol,

¹⁵ mơya Dabit neh rê bơh tiah Sol nàng ê belàt bèp khai dê tòm Betlehem.

¹⁶ Cau Philistin lik ntào ràng să khai behơ̆ drim mơ mho tòm poan jơt ngai.

¹⁷ Jese đơs mơ Dabit kòn klau khai dê mơ lah: “Cèng tĕ dô epha gar ceh mơ jơt pơnai piang lă do, mơ lòt mhar tus hơ tiah sàl ală bi mê dê.

¹⁸ Kung cèng tĕ bal jơt pơnai dơngi dà toh do nàng ơn cau kwang at bồ mpồl ling bol khai dê.

¹⁹ Bol khai ơm mơ Sol bal mơ jơh ală cau Israel tòm thòng Ela, tòmlơh mơ cau Philistin.”

²⁰ Dabit guh bơh drim jào belàt dô nă cau in ê gàr, khai ai ală phan mơ lòt jat be Jese neh sồr khai. Khai tus di tiah sàl tòm tŭ mpồl ling lik lòt hơ tiah tòmlơh, driau dờng jơnau kơlìn.

²¹ Israel mơ làng bol Philistin neh rơndap tiah tòmlơh bol khai dê, mpồl ling do tòmdră mơ mpồl ling ne.

²² Dabit lòi ală phan khai dê cau sền gàr phan sa in, ntoat tus di tiah tòmlơh mơ lùp còp ală bi khai dê.

²³ Tòm tŭ khai tòmbơhbơr mơ ală bi khai dê, gen cau Philistin jak tòmlơh bơh ƀòn Gat la Gôliat lik lòt bơh di nhàr tòmlơh khai dê mơ driau dờng ală jơnau đơs pơrlòng be lài mơ Dabit kơno ală jơnau hơ̆.

²⁴ Tòm tŭ cau Israel gŏ cau hơ̆ gen jơh tơl nă bol khai rngòt rngơt ngan mơ ntoat dô.

²⁵ Ală cau Israel neh đơs lah: “Bol mê gŏ mbe cau hơ̆ kư̆ tơlik mat behơ̆ sơl? Khai tơlik mat nàng đơs jơnau pơrlòng mơ Israel. Cau bơtau rơp ai oă phan mơna cau lơi in tơnchơt cau hơ̆, mơ kung rơp ai kòn ùr khai dê cau hơ̆ in bau, mơ hìu nhă bèp cau hơ̆ dê rơp geh klàs boh dia tòm Israel.”

²⁶ Gen Dabit lùp ală cau ơm rềp mơ khai lah: “Ñchi rơp lơh di cau rgơi tơnchơt cau Philistin do mơ tă sang bơta ƀàssìl bơh Israel? Cau Philistin ò siat gơltau do la ñcau mơ khin đơs pơrlòng ală mpồl ling Yàng Tom Trồ kis sùm sùm dê taih?”

²⁷ Bol khai yal wơl khai in jơnau bol khai neh đơs, mơ đơs mơ khai lah: “Hơ̆ la bơta rơp lơh cau lơi in rgơi tơnchơt cau hơ̆.”

²⁸ Tòm tŭ Eliap, bi tơnhoa Dabit dê kơno khai đơs mơ ală cau hơ̆, gen Eliap gơhào gơjrañ ngan mơ lùp Dabit lah: “Ñchi bơh tài mê mù hơ do taih? Mê neh lòi cau lơi in ê gàr dô êt belàt hơ̆ tòm ƀlàng ngềt ngơt taih? Añ git bơta pơnhừ să mê dê, mơ nùs mê iơh bơsak la mbe lơi; mê neh tus tềng do mìng nàng sền bơta tòmlơh lơm.”

²⁹ Dabit đơs lah: “Ñchi añ neh lơh taih? Añ ò rgơi lùp dô jơnau sơl ơ?”

³⁰ Gen khai wơlke lòt tus hơ ală cau ndai mơ lùp kung be lài; mơ cau ho wơl khai in kung be lài sơl.

³¹ Ală jơnau Dabit neh đơs gen gơs cau kơno mơ yal wơl Sol in, mơ Sol sồr cau hòi Dabit.

³² Dabit đơs mơ Sol lah: “Bañ gơs dô nă cau lơi gơplơ̆ nùs bơh jơnau cau Philistin do; cau duh broă bơtau dê rơp lòt tòmlơh mơ khai.”

³³ Sol ho lah: “Mê ò rgơi lòt tòmlơh mơ cau Philistin do, mê mìng la dô nă cau kơnòm dềt, mơ khai la dô nă cau jak tòmlơh bơh di tŭ khai gam pơnu.”

³⁴ Mơya Dabit đơs mơ Sol lah: “Cau duh broă bơtau dê òs ê belàt bèp añ jê. Tŭ lơi gơs dô nơm klìu triă hala dô nơm jơgơu tus kap dô nơm belàt kòn bơh di mpồl,

³⁵ gen añ ting jat gơ, lơh gơ mơ dong tă belàt bơh di bơr gơ. Tòm tŭ gơ brồ lơh añ gen añ sơmbat di sơnò tềp gơ, lơh gơ mơ tơnchơt gơ.

³⁶ Cau duh broă bơtau dê neh tơnchơt klìu triă mơ jơgơu, gen cau Philistin ò siat gơltau do rơp gơlik gơs kung be dô nơm tòm bol gơ, bơh khai neh đơs jơnau pơrlòng ală mpồl ling Yàng Tom Trồ gam kis sùm sùm dê.

³⁷ Yàng Jehôwa la Bơtau neh dong tă añ bơh di nđias klìu triă mơ bơh di nđias jơgơu gen Kơnràñ rơp dong tă añ bơh di tê cau Philistin do.” Sol đơs mơ Dabit lah: “Lòt tĕ, dan Yàng Jehôwa ơm bal mơ mê.”

³⁸ Gen Sol ai ào lòs tòmlơh khai dê tơnsoh Dabit in. Khai tơnsoh ào lòs tòmlơh Dabit in mơ tơndau dô nơm sơgơn kòng di bồ khai.

³⁹ Dabit kơt đào khai dê di ào tòmlơh mơ lòng lòt gùt dar tài bơh khai ò mòng soh ală phan hơ̆. Gen khai đơs mơ Sol lah: “Añ ò rgơi lòt tòm ală phan do tài bơh añ ò mòng soh gơ.” Behơ̆ khai hồ ală phan hơ̆.

⁴⁰ Lồc behơ̆, khai at gai jra khai dê tòm tê, sac rwah pram pơnai lŭ sơngào bơh di croh dà mơ ơn tòm kơldung khai òs ngui tòm tŭ ê belàt, at sơna sơrbì lŭ tòm tê khai dê mơ tus rềp di cau Philistin.

⁴¹ Cau Philistin tus rềp hơ Dabit, cau at khèl khai dê lòt lài mơ khai.

⁴² Khai sền sơwì Dabit mơ gŏ Dabit mìng la dô nă cau kơnòm, muh mat dum dum, mơ niam klau, gen sền òsơp di khai.

⁴³ Khai đơs mơ Dabit lah: “Añ la dô nơm so sơl ơ nàng mê at gai mơ tus mơ añ?” Mơ khai ai sơnđan ală yàng khai dê mơ srat rma Dabit.

⁴⁴ Khai đơs lah: “Tus tĕ hơ añ do, añ rơp ai poac mê ală sềm hơđang trồ in, mơ ală phan poan jơng tòm ƀlàng in!”

⁴⁵ Dabit đơs mơ cau Philistin lah: “Mê at đào at tà tus mơ añ, mơya añ lòt tòmdră mơ mê ai sơnđan Yàng Jehôwa Gơnap Gơnoar Làm Jơh, la Yàng Tom Trồ ală mpồl ling Israel dê, la Bơtau mơ mê neh sền òsơp.

⁴⁶ Ngai do Yàng Jehôwa rơp jào mê tòm tê añ, añ rơp lơh mê gơpừ di tiah mơ koh bồ mê. Ngai do añ rơp ai ƀồc mpồl ling cau Philistin dê ală sềm hơđang trồ in mơ ală phan poan jơng tòm ù in; mơ jơh lơgar dunnia rơp git lah gơs dô nă Yàng Tom Trồ tòm Israel.

⁴⁷ Jơh ală mpồl ling neh pơjum tềng do rơp git lah Yàng Jehôwa ò ngui đào mơ tà nàng dong tă; tài bơh bơta tòmlơh do la tòmlơh mơ Yàng Jehôwa, mơ Kơnràñ rơp jào jơh tơl nă bol mê tòm tê bol hi dê.”

⁴⁸ Tòm tŭ cau Philistin lòt tus rềp rlau nàng brồ lơh Dabit, gen Dabit ntoat mhar tus hơ nhàr tòmlơh nàng tìp mơ cau hơ̆.

⁴⁹ Dabit cok tê tòm kơldung khai dê mơ ai dô pơnai lŭ, khai ngui sơna sơrbì lŭ mơ sơrbì gơ di di bìng liang cau Philistin. Lŭ hơ̆ mut tòm bìng liang khai dê, mơ khai gơpừ blup mat di ù.

⁵⁰ Behơ̆ Dabit ngui sơna sơrbì lŭ mơ dô pơnai lŭ mơ geh pha lin rlau mơ Gôliat, tòmpừ khai di tiah mơ tơnchơt khai, mơ ò gơs dô nơm đào tòm tê.

⁵¹ Behơ̆ Dabit ntoat tus mơ ntào hơđang cau Philistin. Khai at đào cau Philistin dê mơ tă gơ bơh di sơmprồm gơ dê. Tơnơ̆ mơ tŭ Dabit neh tơnchơt cau Philistin rau gen Dabit ai đào koh bồ cau Philistin dê. Tòm tŭ làng bol Philistin gŏ cau pràn kơldang khin cha mơ jak tòmlơh bol khai dê neh chơt rau gen bol khai ntoat dô.

⁵² Gen cau Israel mơ cau Juda brồ tus hơđap mơ ting jat cau Philistin jơl tus di gùng mut tòm ƀòn Gat mơ tus di ală mpồng ƀòn Ekrôn. Ală cau Philistin gơkòl jê sồt gơpừ rò gùng bơh Saaraim tus hơ Gat mơ Ekrôn.

⁵³ Cau Israel rê wơl bơh ting jat cau Philistin gen bol khai phà tòmpìt sàl bol hơ̆ dê.

⁵⁴ Dabit ai bồ Gôliat cèng gơ tus hơ Jerusalem, mơya khai ơn ală phan tòmlơh Gôliat dê tòm sàl khai dê.

⁵⁵ Tòm tŭ Sol sền gŏ Dabit lik lòt tòmlơh mơ cau Philistin hơ̆ gen khai lùp Apner la cau kwang at bồ mpồl ling lah: “Ơ Apner, cau pơnu hơ̆ la kòn ñcau taih?” Apner ho lah: “Ơ cau bơtau, di ngan kung be bơtau kis, añ ò git.”

⁵⁶ Cau bơtau đơs lah: “Jòi lùp tĕ nàng git cau pơnu hơ̆ la kòn ñcau dê.”

⁵⁷ Tòm tŭ Dabit pa rê wơl bơh bơta tơnchơt cau Philistin gen Apner rò khai mơ lam tus di đap Sol, Dabit gam at tòm tê khai bồ cau Philistin dê.

⁵⁸ Sol lùp khai lah: “Ơ cau pơnu, mê la kòn ñcau taih?” Dabit ho lah: “Añ la kòn klau cau duh broă bơtau dê la Jese ơm tòm Betlehem.”