I Samuel 12 - Sră Goh 2018

Samuel tơngac làng bol mơ rê rlô kra

¹ Samuel đơs mơ jơh Israel lah: “Añ neh iat jơh ală jơnau bol mê neh đơs mơ añ, mơ añ neh bơtào dô nă bơtau hơđang at bồ hơđang bol mê.

² Tŭ do bol mê gơs dô nă bơtau la cau lam bồ bol mê. Ai đah pơnah mơ añ gen să kra mơ kò sŏ, mơya ală kòn klau añ jê gam ơm mơ bol mê. Añ neh tề lam bol mê bơh tŭ añ gam pơnu jơl tus di ngai do.

³ Do añ, lơh cơng tĕ tòmdră mơ añ di đap Yàng Jehôwa mơ di đap cau geh bong mơñà Kơnràñ dê. Añ neh kup kơnrồ cau lơi sơl? Añ neh kup alàng cau lơi sơl? Añ neh pơrlồm cau lơi sơl? Añ neh rồn bơklơn cau lơi sơl? Añ neh dòp phan loă nàng lơh jơngo mat añ jê bơh gơ sơl? Lơh cơng tĕ tòmdră mơ añ mơ añ rơp tơm wơl gơ bol mê in.”

⁴ Bol khai ho lah: “Ồng neh ò pơrlồm hala rồn bơklơn bol hi. Ồng neh ò tă ai dô nơm phan lơi bơh di tê dô nă cau lơi.”

⁵ Samuel đơs mơ bol khai lah: “Dan Yàng Jehôwa lơh cơng tòmdră mơ bol mê, mơ cau geh bong mơñà Kơnràñ dê lơh cơng tòm ngai do la bol mê ò bàn phan lơi tòm tê añ.” Bol khai đơs lah: “Dan Kơnràñ lơh cơng.”

⁶ Gen Samuel đơs mơ làng bol lah: “Yàng Jehôwa la cơng tàng, la Bơtau neh pồ bơtào Môise mơ Arôn mơ neh cèng ală ồng pàng bol mê dê lik bơh di Ejiptơ.

⁷ Gen tàng tŭ do, ntào tĕ tềng do nàng añ yă bol mê di đap Yàng Jehôwa, mơ añ rơp yal loh bol mê in bơh jơh ală broă gơnap gơnoar mơ Yàng Jehôwa neh lơh nàng dong tă bol mê mơ ală ồng pàng bol mê dê.

⁸ Tòm tŭ Jakôp mù hơ Ejiptơ, làng bol hơ̆ rồn bơklơn bol khai, gen ồng pàng bol mê dê hòi driau mơ Yàng Jehôwa, mơ Kơnràñ neh sồr Môise mơ Arôn, la ală cau neh cèng ală ồng pàng bol mê dê lik bơh di Ejiptơ mơ neh ai bol khai in ơm tòm tiah do.

⁹ Mơya bol khai neh hŭi Jehôwa Yàng Tom Trồ bol khai dê, gen Kơnràñ neh tac bol khai tòm tê Sisera la kwang at bồ mpồl ling bơtau Jabin dê tòm Hajor, mơ tòm tê cau Philistin, mơ tòm tê bơtau Môap mơ bol hơ̆ neh tòmlơh mơ bol khai.

¹⁰ Gen bol khai rac dan mơ Yàng Jehôwa mơ đơs lah: ‘Bol hi neh tìs glài, bol hi neh sang lòi Yàng Jehôwa, mơ neh duh broă Baal mơ Astarte. Mơya tŭ do dan dong tă bol hi bơh di tê ală cau sò tơm di bol hi, gen bol hi rơp duh broă Kơnràñ.’

¹¹ Gen Yàng Jehôwa sồr Jerubaal, Barak, Jepthe, mơ Samuel lòt dong tă bol mê bơh di ală cau sò tơm bol mê bơh ală đah nàng bol mê geh ơm lơngap lơngai.

¹² Mơya tòm tŭ bol mê gŏ Nahas bơtau làng bol Ammôn dê lòt tus tòmdră mơ bol mê, gen bol mê neh đơs mơ añ lah: ‘Ò, bol hi kòñ gơs dô nă bơtau at bồ hơđang bol hi,’ bulah Jehôwa Yàng Tom Trồ bol mê dê la Bơtau at bồ bol mê.

¹³ Sền tĕ do la cau bơtau mơ bol mê neh sac rwah, la cau mơ bol mê neh dan. Sền ne, Yàng Jehôwa neh bơtào dô nă bơtau hơđang bol mê.

¹⁴ Dilah bol mê duh rngòt di Yàng Jehôwa, duh broă Kơnràñ, dòn bơr Kơnràñ, mơ ò tòmdră mơ ală jơnau sồr Kơnràñ dê, mơ dilah bol mê bal mơ cau bơtau at bồ hơđang bol mê lòt jat Jehôwa Yàng Tom Trồ bol mê dê hơ̆ rơp la niam.

¹⁵ Mơya dilah bol mê ò ai tồr iat jơnau Yàng Jehôwa dê, mơ tòmdră mơ ală jơnau sồr Kơnràñ dê, gen tê Kơnràñ rơp tòmdră mơ bol mê bal mơ bơtau bol mê dê.

¹⁶ Behơ̆ tŭ do, ntào tĕ tềng do mơ sền broă dờng mơ Yàng Jehôwa rơp lơh di đap mat bol mê dê.

¹⁷ Tŭ do ò di la kơnhai toès kòi mi ò ơ? Añ rơp hòi dan mơ Yàng Jehôwa nàng Kơnràñ rơp ai ntơr kơnàs mơ mìu; mơ bol mê rơp đal git bơta iơh bơsak mơ bol mê neh lơh di đap mat Yàng Jehôwa la dờng ngan, bơh neh dan dô nă bơtau bol mê in.”

¹⁸ Gen Samuel hòi dan mơ Yàng Jehôwa, mơ tòm ngai hơ̆ Yàng Jehôwa neh lơh nggồr ntơr kơnàs mơ dùh mìu. Behơ̆ jơh làng bol nsràng rngòt di Yàng Jehôwa mơ di Samuel.

¹⁹ Jơh làng bol đơs mơ Samuel lah: “Dan ồng hòi dan mơ Jehôwa Yàng Tom Trồ ồng dê ala ală cau duh broă ồng in tồ bol hi ò chơt, bơh bol hi neh bơtơl hơđang jơh ală bơta tồi glài bol hi dê dô bơta iơh bơsak tai, bơh neh dan dô nă bơtau at bồ.”

²⁰ Behơ̆, Samuel ho wơl mơ làng bol lah: “Bañ rngòt, bol mê neh lơh jơh ală bơta iơh bơsak do, bulah behơ̆ bañ wèt sang Yàng Jehôwa, mơya jơh tĕ nùs duh broă Yàng Jehôwa.

²¹ Bañ wèt jat ală rùp ràk ò kwơ; bol gơ ò lơh bơta lơi niam bol mê in, hala dong tă bol mê, tài bơh bol gơ la ò kwơ.

²² Bơh sơnđan dờng ryŭ Yàng Jehôwa dê gen Kơnràñ rơp ò sang lòi làng bol Kơnràñ dê, tài bơh Kơnràñ neh niam nùs dòp rò bol mê lơh gơs làng bol Kơnràñ dê.

²³ Ai añ gen añ rơp ò tŭ lơi tìs glài tòmdră mơ Yàng Jehôwa mơ ò hòi dan bol mê in. Mơ añ rơp bơto bol mê in git gùng niam mơ song.

²⁴ Mìng duh rngòt tĕ Yàng Jehôwa mơ jơh nùs dòn song duh broă Kơnràñ dê; sền sơwì tĕ bơh ală broă dờng mơ Kơnràñ neh lơh bol mê in.

²⁵ Mơya dilah bol mê kư̆ lơh bơta iơh bơsak, gen bol mê rơp gơkòl tơnroh bal mơ bơtau at bồ bol mê dê.”