I Pier 1 - Sră Goh 2018

Jơnau Còp Să

¹ Pier, la cau gơnoar bơto dờng Yàng Jesu Krist dê, pơyoa ală cau geh sac rwah ơm nrah nring in tòm lơgar Pontus, Galati, Kapadôs, Asia mơ Bithini,

² oh mi la cau geh sac rwah, jat be bơta git lài Yàng Tom Trồ dê la Bèp, mơ geh gơlik gơs làng bol sàng goh bơh Yàng Hwềng Goh, tồ dòn bơr Yàng Jesu Krist mơ geh lơh goh bơh mhàm Kơnràñ dê. Dan bơta nđàc mơ bơta lơngap lơngai sơlo geh bơtơl oă hơđang oh mi.

Gơn kơnòm tòm bơta gơlòng bòl glar

³ Jòng ro Yàng Tom Trồ, Bèp Yàng Jesu Krist la Yàng bol he dê. Bơh bơta kòñ nđàc tơngkah tơngkañ Kơnràñ dê mơ bol he geh deh wơl pa, tồ gơs bơta gơn kơnòm kis, kơnòm di bơta kis wơl bơh bơta chơt Yàng Jesu Krist dê,

⁴ mơ dòp geh sre brê ò roh rui, ò ƀơ̆ ƀơl, ò ro jrùh, prap lòi hơđang trồ oh mi in,

⁵ la ală cau bơh bơta dòn geh sền gàr kơnòm di gơnap gơnoar Yàng Tom Trồ dê, jơl tus di bơta dong klàs tus, la bơta neh rcang sir rơp geh yal tơlik tòm ngai lồi dut.

⁶ Hòn chò tĕ bơh bơta hơ̆, bulah tŭ do oh mi pal kong li bơta gơlòng bòl glar tòm dô êt jŏ,

⁷ nàng bơta dòn oh mi dê tơnơ̆ mơ tŭ neh kong jai bơta gơlòng rau, gen gơlik màng rlau mơ màh òs roh rui, bulah gơ neh kong lòng tòm ồs rau. Gen lơh bơta dòn oh mi dê di pal geh bơta jòng ro, gơklŏ, màng ryŭ tòm tŭ Yàng Jesu Krist tơlik mat.

⁸ Kơnràñ la Bơtau oh mi ò gŏ mơya kòñ gơboh, bulah tŭ do oh mi ò tìp Kơnràñ, mơya dòn Kơnràñ mơ hòn chò dờng ngan, mơ ò rgơi yal.

⁹ Bơh oh mi dòp geh cồng nha bơh bơta dòn dê, la bơta dong klàs hwềng soàn he.

Dong klàs neh geh yal lài

¹⁰ Bơh bơta dong klàs hơ̆, ală cau gơnoar hwơr neh sền sơwì nền cê, mơ yal lài bơh bơta nđàc mơ Yàng Tom Trồ rơp ai oh mi in.

¹¹ Bol khai sơwì tồ git tŭ lơi, mơ mbe lơi bơta hơ̆ rơp tus. Do la bơta mơ Hwềng Bơtau Krist dê ơm tòm bol khai neh sơnio, đơs lài bơh bơta jê sồt bòl glar Bơtau Krist pal kong mơ bơh bơta gơklŏ jat tơnơ̆.

¹² Yàng Tom Trồ neh yal tơlik bol khai in lah, ò duh broă să tòm he in, mơya la duh broă oh mi in; be ală bơta bol khai neh bơto mơ oh mi neh kơno tŭ do, bơh ală cau bơto yal Jơnau Niam oh mi in neh kơnòm di gơnap gơnoar Yàng Hwềng Goh geh sồr bơh đang trồ; do kung la ală bơta mơ cau gơnrơh kung kơp kòñ git wă.

Bơto Tơngkah Bơh Bơta Lơh Lòt Sang Goh

¹³ Behơ̆, oh mi gơs tĕ nùs kơlôi be cau kơt but lơh broă, drơng kơp, gơn kơnòm wil tơl di bơta nđàc rơp ai oh mi in tòm tŭ Yàng Jesu Krist tơlik mat.

¹⁴ Oh mi be kòn sau jak dòn bơr, gen bañ đòm jat ală bơta hàm kòñ is lài òr, la tŭ oh mi gam bơrngơl gơla.

¹⁵ Mơya be Bơtau neh hòi sac oh mi la Bơtau sàng goh, gen oh mi kung pal gơs sang goh tòm jơh ală bơta lơh lòt he dê,

¹⁶ bơh Sră Goh neh cih lah: “Bol mê pal gơs sàng goh, bơh añ la sàng goh.”

¹⁷ Dilah oh mi hòi dan mơ sơnđan Kơnràñ la Bèp, la Bơtau ò sền òsơp di cau lơi mơ cahrña kòp nă cau jat be broă lơh bol khai dê, gen ai tĕ nùs duh rngòt nàng lơh lòt tòm tŭ ơm ing tòm rài do.

¹⁸ Bơh oh mi git lah ò di bơh phan òs roh rui be priă hala màh mơ oh mi neh geh tơwài lik klàs bơh bơta lơh lòt ò kwơ mơ ồng pàng lòi wơl he in ò,

¹⁹ mơya bơh mhàm màng Bơtau Krist dê, kung be mhàm belàt kòn dê ò sồt rmàñ, ò tềl ƀơ̆.

²⁰ Kơnràñ neh geh lơh nền lài mơ tŭ crơng gơs trồ tiah, mơya tus di tŭ tơngai lồi dut do sồng geh ràng tơlik tài bơh ală oh mi.

²¹ Bơh Kơnràñ mơ oh mi dòn nền di Yàng Tom Trồ la Bơtau neh lơh Kơnràñ in kis wơl bơh bơta chơt, mơ ai bơta gơklŏ Kơnràñ in, tồ bơta dòn mơ bơta gơn kơnòm oh mi dê geh ơm tòm Yàng Tom Trồ.

²² Oh mi neh dòn jat jơnau song mơ lơh sàng goh hwềng nùs he dê, tồ kòñ gơboh di oh mi he dô bă song ngan, gen kòñ gơboh tĕ bal mơ gơp dô bă jơh nùs đềt mềr.

²³ Oh mi neh geh deh wơl pa, ò di bơh gar sơntìl ồm lề, mơya bơh gar sơntìl ò ồm lề, hơ̆ la jơnau kis gam sùm mơ nền cê Yàng Tom Trồ dê.

²⁴ Bơh, “Jơh ală jơi poac să kung be ñhơt. Mơ bơta gơklŏ gơ dê be bơkào ñhơt. Ñhơt ro, bơkào jrùh;

²⁵ Mơya jơnau đơs Yàng dê gam sùm sùm.” Mơ jơnau hơ̆ la Jơnau Niam neh geh bơto yal oh mi in.