I Kôrintô 8 - Sră Goh 2018

Bơh phan ơn duh khoai rùp ràk

¹ Gơwèt hơ phan ơn duh khoai rùp ràk, ngan behơ̆ be cau òs đơs: “kòp nă bol he gơs bơta git jak.” Bơta git jak lơh he in jòng is să he, ai bơta kòñ gơboh gen bơt bơtào.

² Dilah cau lơi kơlôi khai git bơta lơi, ngan cau hơ̆ òhềt git kung be khai pal git.

³ Mơya dilah cau lơi kòñ gơboh dê Yàng Tom Trồ, gen Kơnràñ git cau hơ̆.

⁴ Behơ̆, bơh bơta sa phan duh khoai rùp ràk, bol he git rùp ràk tòm dunnia la ò gơs ngan, gơs mìng dô nă Yàng Tom Trồ lơm.

⁵ Bơh bulah gơs oă cau dòn lah: gơs hwềng hơđang trồ hala tòm ù, kung be gơs oă “hwềng” mơ oă “yàng”,

⁶ mơya đah bol he, gơs mìng dô nă Yàng Tom Trồ lơm la Bèp, la Bơtau crơng gơs jơh ală phan bơh Kơnràñ mơ bol he kis; mơ gơs mìng dô nă Yàng la Yàng Jesu Krist, jơh ală phan bơh Kơnràñ mơ gơlik gơs, mơ bol he kung kis bơh Kơnràñ behơ̆ sơl.

⁷ Bulah behơ̆ ò di kòp nă cau git jơnau song do; mơya gơs cau neh mòng mơ rùp ràk jơl tus di tŭ do, mơ sa phan gam kơlôi be phan neh ơn rùp ràk in, mơ nùs tồr lơbơn lơño bol khai dê gơlik gơs ƀơ̆ ƀơl.

⁸ Ò di bơh phan sa mơ bol he geh đềt mềr mơ Yàng Tom Trồ. Dilah bol he ò sa, kung ò gơhuc bơta lơi; dilah sa kung ò gơlin bơta lơi.

⁹ Bulah behơ̆, kơrhia tĕ, rngòt bơta khat gơboh oh mi dê gơlik gơs dô nơm kai lơh cau lơbơn bơta dòn in gơdùh tòm tồi glài.

¹⁰ Bơh dilah dô nă cau gŏ mê la cau git jak mơ nggui sa tòm bơmồng rùp ràk, gen nùs tồr lơbơn lơño khai dê ò di rơp lơh khai in khin cha mơ sa phan duh khoai rùp ràk ò ơ?

¹¹ Tài bơh hơ̆ bơta git jak mê dê lơh oh mi lơbơn lơño hơ̆ in roh rui, la cau mơ Bơtau Krist neh kong chơt ala.

¹² Behơ̆, tòm tŭ bol mê tìs glài mơ ală oh mi mơ lơh nùs tồr lơbơn lơño bol khai dê gơlik sồt, gen kung tìs glài mơ Bơtau Krist.

¹³ Gen tàng, dilah phan sa lơh oh mi añ in gơtup tìs, gen tòm jơh rài añ ò gơs tŭ lơi sa poac tai, rngòt lơh oh mi añ in gơtup tìs.