I Kôrintô 15 - Sră Goh 2018

V. Bơta kis wơl ( 15:1-58 ) Yàng Jesu Krist kis wơl

¹ Ơ oh mi, añ tơngkah wơl oh mi in Jơnau Niam añ neh bơto yal oh mi in, mơ oh mi neh dòp rau, mơ oh mi kung gam ntào kơ̆ tòm jơnau hơ̆.

² Dilah oh mi prap kơ̆ jơnau añ neh bơto yal oh mi in, gen oh mi kung kơnòm di Jơnau Niam hơ̆ mơ geh dong klàs, dilah ò, gen bơta dòn oh mi dê la ò kwơ.

³ Bơta dờng màng sơnròp ngan, añ neh yal ală oh mi in jơnau añ kung neh dòp geh, hơ̆ la Bơtau Krist neh kong chơt bơh glài bol he dê, jat be jơnau Sră Goh;

⁴ Kơnràñ neh kong tơp, tus di ngai pe Kơnràñ neh geh kis wơl, jat be jơnau Sră Goh;

⁵ mơ Kơnràñ neh tơlik să mơ Sepha, tơnơ̆ tơlik să mơ jơt bàr nă cau gơnoar bơto dờng.

⁶ Lồc behơ̆, tòm dô dơ̆ lĕ Kơnràñ tơlik să di đap rlau mơ pram rhiang nă cau dòn; oă cau tòm bol khai gam kis, mơya kung gơs cau ƀà neh bic rau.

⁷ Gen Kơnràñ tơlik să mơ Jakơ, lồc behơ̆ tơlik să mơ jơh ală cau gơnoar bơto dờng,

⁸ mơ lồi dut, Kơnràñ kung tơlik să mơ añ be dô nă kòn deh ò tơl kơnhai.

⁹ Bơh añ la dềt rlau jơh tòm ală cau gơnoar bơto dờng, ò di pal sơnđan la cau gơnoar bơto dờng, tài bơh añ neh kup kơryan Hìu Jum Goh Yàng Tom Trồ dê.

¹⁰ Mơya añ do la cau be lơi, hơ̆ la kơnòm di bơta nđàc Yàng Tom Trồ dê, mơ bơta nđàc Kơnràñ neh ai añ in ò di la ò kwơ. Pơrlơ̆ wơl, añ kong bòl glar lơh broă rlau jơh mơ bol hơ̆; mơya ò di la bơh añ, hơ̆ la bơh bơta nđàc Yàng Tom Trồ dê neh ơm mơ añ.

¹¹ Behơ̆, bulah añ hala bol khai, hơ̆ la jơnau bol hi bơto yal, mơ ală oh mi neh dòn.

Bơta kis wơl cau chơt dê

¹² Dilah oh mi geh bơto yal lah Bơtau Krist neh geh kis wơl bơh bơta chơt, gen mbe lơh tòm oh mi gơs cau đơs lah ò gơs bơta kis wơl ală cau chơt dê taih?

¹³ Dilah ò gơs bơta kis wơl ală cau chơt dê, gen Bơtau Krist kung neh ò geh kis wơl sơl;

¹⁴ mơ dilah Bơtau Krist neh ò geh kis wơl, gen bơta bơto yal bol hi dê gơlik ò kwơ, mơ bơta dòn oh mi dê kung ò kwơ sơl.

¹⁵ Dilah ală cau chơt ò geh kis wơl, gen Yàng Tom Trồ ò lơh Bơtau Krist in kis wơl; ngan bol hi gơlơh be cau lơh cơng ma blac bơh Yàng Tom Trồ, tài bơh bol hi neh lơh cơng lah: Yàng Tom Trồ neh lơh Bơtau Krist in kis wơl.

¹⁶ Bơh dilah ală cau chơt ò geh kis wơl, gen Bơtau Krist kung neh ò geh kis wơl sơl;

¹⁷ mơ dilah Bơtau Krist neh ò geh kis wơl, gen bơta dòn oh mi dê ò gơs kwơ, mơ oh mi gam ơm tòm bơta tồi glài oh mi dê.

¹⁸ Gen ală cau neh bic tòm Bơtau Krist kung kong roh rui rau.

¹⁹ Dilah bol he gơs bơta gơn kơnòm tòm Bơtau Krist mìng tòm rài kis do, gen bol he la cau pal nđàc sơngit rlau jơh mơ ală cau tòm dunnia.

Yàng Jesu Krist la plai bồ sơnam bơta kis wơl dê

²⁰ Mơya do, Bơtau Krist neh geh kis wơl bơh bơta chơt rau, la plai bồ sơnam ală cau bic dê.

²¹ Tài bơh dô nă cau mơ gơs bơta chơt, kung tài bơh dô nă cau mơ gơs bơta kis wơl ală cau chơt dê.

²² Kung be tòm Adam jơh ală cau pal chơt, kung behơ̆ sơl tòm Bơtau Krist jơh ală cau rơp geh kis wơl.

²³ Mơya jat bơta rơndap kòp nă is he dê: Bơtau Krist la plai bồ sơnam, gen ală cau gơrê bal mơ Bơtau Krist rơp kis wơl tòm tŭ Kơnràñ tus wơl.

²⁴ Mơ tŭ lồi dut tus, la tŭ Kơnràñ rơp jào lơgar Yàng Tom Trồ in la Yàng Bèp, tơnơ̆ mơ tŭ Kơnràñ neh tơnroh jơh ală gơnoar at bồ, gơnoar pràn mơ gơnap gơnoar.

²⁵ Bơh Kơnràñ pal at bồ jơl tus di tŭ Yàng Tom Trồ “ơn jơh ală cau sò tơm hơđơm mpàng jơng Kơnràñ dê.”

²⁶ Cau sò tơm lồi dut rơp kong tơnroh hơ̆ la bơta chơt.

²⁷ Bơh Sră Goh cih lah: “Yàng Tom Trồ ơn jơh ală phan hơđơm jơng Bơtau Krist.” Mơya tòm tŭ Kơnràñ đơs lah: “Jơh ală phan pal dòn duh Kơnràñ, gen loh làng lah ò kòp să tòm Yàng Tom Trồ la Bơtau neh ơn jơh ală phan dòn duh Bơtau Krist.”

²⁸ Mơya tòm tŭ jơh ală phan neh ơn hơđơm bơta at bồ Bơtau Krist dê, gen să tòm Kơnràñ la Kòn kung rơp dòn duh Yàng Tom Trồ la Bơtau neh ơn jơh ală phan hơđơm Kơnràñ, mơ Yàng Tom Trồ rơp at bồ wil tơl hơđang jơh ală bơta.

²⁹ Dilah ò behơ̆, gen ñchi kwơ cau gơs ƀaptem ala cau chơt in taih? Dilah ngan ală cau chơt ò geh kis wơl, gen ñchi bơh tài gơs cau tài bơh bol khai mơ gơs ƀaptem taih?

³⁰ Ñchi bơh tài bol hi kung kong sơbơng roh kòp jơ taih?

³¹ Ơ oh mi, bơta jòng să añ gơs bơh oh mi tòm Yàng Krist Jesu la Yàng bol he dê, mơ añ đơs nền lah añ chơt kòp ngai.

³² Dilah jat bơta òs kơlôi kòn mơnus dê añ neh tòmlơh mơ phan jàñ bơsak tòm Ephesô, gen ñchi kwơ añ in taih? Dilah ală cau chơt ò geh kis wơl, gen bol he “Sa ñô tĕ, bơh ngai hìng bol he rơp chơt.”

³³ Bañ lòi cau pơrlồm he: “bơyô iơh lơh ƀơ̆ ƀơl nùs nhơm niam he dê.”

³⁴ Kơlôi kah tĕ, mơ lơh lòt dô bă di pal, bañ tìs glài tai, bơh gơs cau ƀà ò git bơh Yàng Tom Trồ dô êt lơi; añ đơs bơta hơ̆ tồ oh mi in ƀàssìl.

Să jan kis wơl

³⁵ Mơya gơs cau rơp lùp lah: “Mbe cau chơt rgơi kis wơl taih? Ai să jan mbe lơi nàng tus taih?”

³⁶ Ơ cau tùl gơla ne, phan lơi mê sih, dilah ò chơt lài gen kung ò kis wơl sơl.

³⁷ Phan lơi mê sih, hơ̆ ò di la rùp să rơp gơs, mơya mìng la gar, be gar kòi hala gar ndai,

³⁸ mơya Yàng Tom Trồ ai gơ in rùp să jat nùs Kơnràñ kòñ; kòp nơm gar sơntìl ai rùp să is gơ dê.

³⁹ Jơh ală poac să ò di la ndròm bal, mơya poac să kòn mơnus krơi is, poac să phan poan jơng krơi is, poac să jơi sềm krơi is, poac să jơi ka krơi is.

⁴⁰ Kung gơs rùp să bal mơ trồ mơ rùp să bal mơ ù; mơya rùp să bal mơ trồ gơs bơta gơklŏ krơi is, mơ rùp să bal mơ ù gơs bơta gơklŏ krơi is.

⁴¹ Mattơngai gơs bơta gơklŏ krơi is gơ dê, kơnhai gơs bơta gơklŏ krơi is gơ dê, sơmañ gơs bơta gơklŏ krơi is gơ dê; sơmañ do mơ sơmañ ne kung gơs bơta gơklŏ krơi is sơl.

⁴² Bơta kis wơl ală cau chơt dê kung behơ̆ sơl. Să jan neh sih la òs ồm lề, geh kis wơl la ò ồm lề;

⁴³ neh sih la òsơp òso, geh kis wơl la gơklŏ; neh sih la lơbơn lơño, geh kis wơl la pràn kơldang;

⁴⁴ neh sih la să jan poac mhàm, geh kis wơl la să jan đah hwềng. Dilah gơs să jan poac mhàm, kung gơs să jan đah hwềng sơl.

⁴⁵ Bơh Sră Goh cih lah: “Cau sơnròp la Adam neh gơlik gơs jơi geh bơta kis; Adam lồi dut gơlik gơs hwềng ai gòi bơta kis.”

⁴⁶ Mơya ò di bơta đah hwềng gơs lài, mơ la bơta đah poac să gơs lài, tơnơ̆ gen sồng tus bơta đah hwềng.

⁴⁷ Cau sơnròp lik bơh ù la kơmbuh ù, cau bàr tus bơh trồ.

⁴⁸ Cau bal mơ ù la be lơi, gen ală cau bal mơ ù kung behơ̆ sơl; cau bal mơ trồ la be lơi, gen ală cau bal mơ trồ kung behơ̆ sơl.

⁴⁹ Bol he neh dòp rùp să bơh ù, gen bol he kung rơp dòp rùp să bơh trồ sơl.

⁵⁰ Ơ oh mi, añ đơs be do lah poac mơ mhàm ò geh pơrdòn lơgar Yàng Tom Trồ; bơta òs ồm lề kung ò geh pơrdòn bơta ò ồm lề.

⁵¹ Do añ yal oh mi in dô bơta ndơp ndơr: Bol he ò bic jơh, mơya jơh ală bol he rơp geh gơlik gơs să pa,

⁵² tòm dô êt, tòm dô kơnđip mat, tòm tŭ uh kơlwòk lồi dut. Bơh kơlwòk rơp ntas, gen ală cau chơt rơp geh kis wơl ò ồm lề, mơ bol he rơp geh gơlik gơs să pa.

⁵³ Bơh să jan òs ồm lề do pal soh să jan ò ồm lề, mơ să jan òs chơt do pal soh să jan ò tŭ lơi chơt.

⁵⁴ Tòm tŭ să jan òs ồm lề do neh soh să jan ò ồm lề, mơ să jan òs chơt do neh soh să jan ò tŭ lơi chơt, gen rơp gơlik di ngan be jơnau neh cih lah: “Bơta chơt neh kòl bơta pha lin rlau sa loan.”

⁵⁵ “Ơ bơta chơt, ntềng đah bơta pha lin rlau mê dê taih? Ơ bơta chơt, ntềng đah bơta bih khih mê dê taih?”

⁵⁶ Bơta bih khih bơta chơt dê la tồi glài, gơnap gơnoar tồi glài dê la bơta boh lam.

⁵⁷ Mơya ưnngài Yàng Tom Trồ, Kơnràñ ai bol he in bơta pha lin rlau bơh Yàng Jesu Krist la Yàng bol he dê.

⁵⁸ Behơ̆, ơ oh mi kòñ gơboh añ jê, kơ̆ nùs tĕ, bañ lơh wil wơl, lơh tĕ broă Yàng dô bă tơngkah tơngkañ sùm, bơh oh mi git lah bơta bòl glar lơh broă oh mi dê tòm Yàng ò di la ò kwơ.