I Kôrintô 12 - Sră Goh 2018

Ală bơta ai gòi Yàng Hwềng Goh dê

¹ Ơ oh mi, añ ò kòñ oh mi ò git bơh ală bơta ai gòi đah hwềng.

² Oh mi git lah tòm tŭ oh mi gam la cau làng bol bơdìh gen neh kòl rùp ràk ò gơs bơta kis ne hwài lòt tìs gùng.

³ Tài bơh hơ̆ añ yal oh mi in git lah ò gơs cau lơi bơh Yàng Hwềng Yàng Tom Trồ dê tề lam mơ đơs lah: “Jesu pal srat sơntơm;” mơ kung ò gơs cau lơi đơs lah; “Jesu la Yàng,” dilah ò bơh Yàng Hwềng Goh tề lam.

⁴ Gơs ală bơta ai gòi ò di la ndròm bal, mơya gơs mìng dô nă Yàng Hwềng.

⁵ Ală gơnoar broă ò di la ndròm bal, mơya gơs mìng dô nă Yàng.

⁶ Ală broă lơh ò di la ndròm bal, mơya gơs mìng dô nă Yàng Tom Trồ la Bơtau lơh jơh ală broă tòm jơh ală cau.

⁷ Mơya Yàng Hwềng geh ràng tơlik tòm kòp nă cau, nàng kòp nă cau in gơlik gơs kwơ.

⁸ Behơ̆, cau do kơnòm di Yàng Hwềng ai bềng jơnau jak chài, cau ne kơnòm di Yàng Hwềng hơ̆ ai bềng jơnau git jak,

⁹ ai cau ndai kung kơnòm di Yàng Hwềng hơ̆ ai bơta dòn, gơs cau ndai tai kung kơnòm di dô nă Yàng Hwềng hơ̆ ai gơnoar sơmbòi kòp jê;

¹⁰ Yàng Hwềng ai cau do in gơnap gơnoar lơh broă crih crài, cau ne bơto yal jơnau Yàng Tom Trồ, cau dă git kơlôi cah is ală hwềng, cau ndai rgơi git oă jơnau đơs ndai, mơ cau ndai tai rgơi git sơpơ̆bơr ală jơnau hơ̆.

¹¹ Mơya gơs mìng dô nă Yàng Hwềng lơh jơh ală broă hơ̆, mơ tòmpà kòp nă cau in jat nùs kòñ Kơnràñ dê.

Gơs dô nơm să jan mơ oă pơnah tòm Bơtau Krist

¹² Mơ tai, be să jan la dô nơm mơ gơs oă pơnah, mơ jơh ală pơnah hơ̆ la bal tòm să jan, bulah gơs oă pơnah, gơs mìng dô nơm să lơm; mơ Bơtau Krist kung behơ̆ sơl.

¹³ Bulah bol he la cau Juda hala cau làng bol bơdìh, hala dĭ gơna hala cau geh khat gơboh, jơh ală bol he neh gơs ƀaptem tòm dô nă Yàng Hwềng nàng gơlik gơs dô nơm să jan; jơh ală bol he neh geh hùc bơh dô nă Yàng Hwềng lơm.

¹⁴ Bơh să jan ò di la dô pơnah, mơya oă pơnah.

¹⁵ Dilah jơng đơs lah: “Tài bơh añ ò di la tê, gen tàng añ ò di bal mơ să,” gen ò di bơh bơta hơ̆ mơ jơng ò di bal mơ să.

¹⁶ Dilah tồr đơs lah: “Tài bơh añ ò di la mat, gen tàng añ ò di bal mơ să,” gen ò di bơh bơta hơ̆ mơ tồr ò di bal mơ să.

¹⁷ Dilah jơh să jan la mat, gen ñchi kòñ ai nàng iat taih? Dilah jơh să la tồr, gen ñchi kòñ ai nàng git ƀô taih?

¹⁸ Mơya ngan Yàng Tom Trồ neh rơndap kòp pơnah tòm să jan, jat nùs kòñ Kơnràñ dê.

¹⁹ Dilah jơh ală bol gơ la dô pơnah lơm, gen ntềng đah să jan taih?

²⁰ Ngan, bulah oă pơnah mơya gơs mìng dô nơm să jan lơm.

²¹ Mat ò rgơi đơs mơ tê lah: “Añ ò càng mê;” hala bồ ò rgơi đơs mơ jơng lah: “Añ ò càng bol mê.”

²² Pơrlơ̆ wơl, ală pơnah tòm să jan sền gơlơh be lơbơn rlau, gen la pal càng rlau tai.

²³ Pơnah lơi tòm să jan mơ bol he sền la ò dờng màng, gen bol he lơh gơ in gơlik gơs dờng màng rlau; pơnah lơi ò hàng mơnĕ, gen lơh gơlik gơs hàng mơnĕ rlau.

²⁴ Ai pơnah lơi neh hàng mơnĕ rau, gen ò càng sơmpô tai. Mơya Yàng Tom Trồ neh rơndap să jan dô bă bal, ai pơnah lơi ò dờng màng gơlik dờng màng rlau,

²⁵ nàng ò gơs bơta cah is tòm să jan; pơrlơ̆ wơl, ală pơnah pal kơlôi rcang bal mơ gơp.

²⁶ Behơ̆, dilah dô pơnah lơi kong jê sồt, gen jơh ală pơnah ndai kong jê sồt bal mơ gơ, hala dilah dô pơnah lơi geh jòng ro, gen jơh ală pơnah ndai kung hòn chò bal mơ gơ.

²⁷ Mơ tai, oh mi la să jan Bơtau Krist dê, mơ kòp nă cau la dô pơnah is.

²⁸ Yàng Tom Trồ neh bơtào rơndap tòm Hìu Jum Goh, sơnròp la cau gơnoar bơto dờng, bàr la cau gơnoar hwơr, pe la cau bơto sồr, gen tus di cau lơh broă crih crài, tus di cau geh bơta ai gòi bơta sơmbòi kòp jê, mơ dong kòl, at bồ, mơ git oă jơnau đơs ndai.

²⁹ Jơh ală cau la cau gơnoar bơto dờng ơ? Jơh ală cau la cau gơnoar hwơr ơ? Jơh ală cau la cau bơto sồr ơ? Jơh ală cau gơs gơnap gơnoar lơh broă crih crài ơ?

³⁰ Jơh ală cau geh bơta ai gòi bơta sơmbòi kòp jê ơ? Jơh ală cau đơs oă jơnau đơs ndai ơ? Jơh ală cau git sơpơ̆bơr ală jơnau đơs ơ?

³¹ Mơya jơh nùs kơp kòñ tĕ ală bơta ai gòi dờng rlau. Mơ do añ rơp sơnio oh mi in dô nơm gùng niam rlau jơh.