I Kôrintô 11 - Sră Goh 2018

¹ Đòm tĕ krơh añ, kung be añ đòm krơh Bơtau Krist sơl.

IV. Bơto bơh bơta pơjum duh khoai Yàng ( 11:2 – 14:40 ) Bơta gòm bồ cau ùr tòm tŭ duh khoai Yàng

² Añ jòng ro oh mi tài bơh oh mi kah añ sùm tòm jơh ală bơta mơ prap gàr ală jơnau añ neh bơto sồr oh mi.

³ Bulah behơ̆ añ kòñ ală oh mi git lah: Bơtau Krist la bồ kòp nă cau klau dê, mơ cau klau la bồ cau ùr dê, mơ Yàng Tom Trồ la bồ Bơtau Krist dê.

⁴ Kòp nă cau klau lơi hòi dan hala đơs hwơr mơ gòm bồ gen lơh ƀàssìl bồ he.

⁵ Mơya kòp nă cau ùr lơi hòi dan hala đơs hwơr mơ ò gòm bồ, gen lơh ƀàssìl bồ he, bơh ò gơkrơi kung be khai neh koah bồ sơl.

⁶ Bơh dilah cau ùr ò gòm bồ gen kung lòi khai siat sŏ: Mơya dilah cau ùr ai bơta siat sŏ hala koah bồ lơh ƀàssìl gen gòm tĕ bồ.

⁷ Ngan, cau klau ò di gòm bồ, tài bơh khai pơnđàng wơl rùp să mơ bơta gơklŏ Yàng Tom Trồ dê; mơya cau ùr la pơnđàng wơl bơta gơklŏ cau klau dê.

⁸ Bơh cau klau ò di gơlik bơh cau ùr, mơya cau ùr gơlik bơh cau klau.

⁹ Cau klau kung ò di geh crơng gơs tài bơh cau ùr, mơya cau ùr geh crơng gơs tài bơh cau klau.

¹⁰ Tài bơh ală cau gơnrơh, gen tàng cau ùr pal gòm bồ, nàng sơnio khai pal ơm hơđơm gơnoar bau klau khai dê.

¹¹ Bulah behơ̆, tòm Yàng gen cau ùr pal càng cau klau; cau klau kung pal càng cau ùr.

¹² Kung be cau ùr neh lik bơh cau klau, gen cau klau kung deh bơh cau ùr, mơ jơh ală bơta gơlik gơs bơh Yàng Tom Trồ.

¹³ Să tòm oh mi sền sơwì tĕ: Dilah cau ùr hòi dan mơ Yàng Tom Trồ mơ ò gòm bồ, hơ̆ la di sơl ơ?

¹⁴ Jat bơta òs gơ dê ò di bơto oh mi lah: Dilah cau klau lòi sŏ jòng, gen lơh khai in ƀàssìl ò ơ?

¹⁵ Mơya dilah cau ùr lòi sŏ jòng, hơ̆ la hàng mơnĕ khai in, bơh neh ai sŏ khai in nàng lơh phan gòm.

¹⁶ Mơya dilah cau lơi kòñ tòm pơndang, gen bol hi ò gơs bơta òs mòng behơ̆, mơ ală Hìu Jum Goh Yàng Tom Trồ dê kung ò gơs sơl.

Pơjum Sa Kah Yàng

¹⁷ Jơnau añ bơto sồr do, ò di la jòng ro oh mi, bơh oh mi pơjum ò di la geh kwơ rlau, mơya gơlik iơh rlau.

¹⁸ Lài ngan añ kơno lah tòm tŭ oh mi pơjum tòm Hìu Jum Goh, gen gơs bơta cah is mpồl digùl oh mi; añ kung dòn dô êt bơh bơta hơ̆.

¹⁹ Ngan tòm oh mi pal gơs bơta cah is mpồl, nàng ràng tơlik tòm ală oh mi ñcau la cau dòn song.

²⁰ Behơ̆ tòm tŭ oh mi pơjum bal, ò di la sa kah Yàng tai,

²¹ tài bơh tòm tŭ sa, kòp nă sa pơnah is he dê lài, tian gơs cau do jơgloh, cau ne bơñul.

²² Oh mi ò gơs hìu nàng ñô sa ơ? Hala oh mi sền òsơp di Hìu Jum Goh Yàng Tom Trồ dê mơ lơh ƀàssìl ală cau ò gơs phan lơi ơ? Ñchi añ kòñ đơs mơ ală oh mi taih? Jòng ro oh mi bơh ală broă do sơl? Ngan, añ ò jòng ro ò!

²³ Bơh ală jơnau añ neh yal oh mi in la jơnau añ neh dòp bơh Yàng, hơ̆ la tòm mang Yàng Jesu neh kong cau pơrlơ̆ dră, gen Kơnràñ ai piang lă,

²⁴ ưnngài mơ dơrkă mơ đơs lah: “Do la să jan Añ, bơh bol mê mơ kong gơcrè; lơh tĕ bơta do nàng kah Añ.”

²⁵ Kung behơ̆ tơnơ̆ neh sa mho, Kơnràñ ai mơngàn mơ đơs lah: “Mơngàn do la bơta ho bal pa tòm mhàm Añ. Tŭ lơi bol mê hùc, lơh tĕ bơta do nàng kah Añ.”

²⁶ Behơ̆ tŭ lơi oh mi sa piang lă do, mơ hùc mơngàn do, gen oh mi bơto yal bơta chơt Yàng dê jơl tus di tŭ Kơnràñ tus wơl.

²⁷ Behơ̆ cau lơi ò di pal mơ sa piang lă mơ hùc mơngàn Yàng dê, gen gơkòl glài tòmdră mơ să jan mơ mhàm Yàng dê.

²⁸ Behơ̆ kòp nă pal sơwì is să he, gen sồng rgơi sa piang lă mơ hùc mơngàn hơ̆.

²⁹ Bơh cau lơi ò git kơlôi cah is bơh să Kơnràñ mơ sa piang lă mơ hùc mơngàn hơ̆, hơ̆ la sa mơ hùc bơta cahrña să tòm khai in.

³⁰ Tài bơh hơ̆ tòm oh mi gơs oă cau lơbơn lơño, kòp jê, mơ cau ƀà neh chơt.

³¹ Dilah bol he sền sơwì is să he lài, gen bol he ò kòl cahrña.

³² Mơya tòm tŭ bol he neh kong cahrña, hơ̆ la kong Yàng lơh glài tơmàl nàng bol he in klàs di bơta lơh nền glài bal mơ dunnia.

³³ Behơ̆, ơ oh mi añ jê, tòm tŭ oh mi pơjum bal nàng sa, gen pal gơn tĕ bal mơ gơp.

³⁴ Dilah cau lơi jơgloh, gen sa lài tòm hìu; nàng tòm tŭ oh mi pơjum bal, gen ò kòl tòm bơta cahrña. Mơ ală broă ndai, tòm tŭ añ tus gen rơp rơndap wơl.