I Kôrintô 1 - Sră Goh 2018

I. Jơnau wàs gùng ( 1:1-9 ) Jơnau còp să

¹ Pol, cau geh hòi sac lơh gơs cau gơnoar bơto dờng Yàng Krist Jesu dê, bơh nùs kòñ Yàng Tom Trồ, mơ Sôsthen la oh mi,

² pơyoa Hìu Jum Goh Yàng Tom Trồ in tòm Kôrintô, tus hơ ală cau neh gơlik gơs sàng goh tòm Yàng Jesu Krist, geh kòp la ală cau sàng goh, dô bă bal mơ jơh ală cau tòm kòp bă tiah hòi dan di sơnđan Yàng Jesu Krist, la Yàng bol khai dê mơ Yàng bol he dê sơl.

³ Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp bol he dê mơ bơh Yàng Jesu Krist.

Jơnau ưnngài

⁴ Añ bơh oh mi mơ ưnngài Yàng Tom Trồ sùm, tài bơh bơta nđàc Yàng Tom Trồ dê neh ai oh mi in tòm Yàng Krist Jesu.

⁵ Bơh tòm jơh ală bơta oh mi neh geh pas gơs tòm Kơnràñ, tòm jơnau đơs mơ tòm jơh ală bơta git wă —

⁶ kung be jơnau lơh cơng bơh Bơtau Krist neh geh bơtơl pràn digùl oh mi —

⁷ nàng oh mi ò siơ̆u dô bơta ai gòi lơi đah hwềng, tòm tŭ kơp gơn bơta tơlik mat Yàng Jesu Krist bol he dê.

⁸ Yàng Tom Trồ rơp lơh ală oh mi in kơ̆ nền jơl tus di lồi dut nàng oh mi in ò gơs tiah geh lah pơrhơng tòm ngai Yàng Jesu Krist bol he dê.

⁹ Yàng Tom Trồ la Bơtau dòn song; tài bơh Kơnràñ oh mi geh hòi sac tus tòm bơta gơtòmklac bal mơ Kòn Kơnràñ la Yàng Jesu Krist bol he dê.

II. Pol lah pơrhơng bơta cah mpồl tòm Hìu Jum Goh Kôrintô ( 1:10 – 6:20 ) Pal gơs dô bă bal

¹⁰ Ơ oh mi, tŭ do añ rac dan mơ oh mi, bơh tòm sơnđan Yàng Jesu Krist bol he dê, añ dan jơh ală oh mi gơs tĕ dô bă bal tòm jơnau đơs, mơ digùl oh mi kung bañ gơs bơta cah is mpồl, mơya oh mi pal gơtòmklac bal tòm dô nơm nùs kơlôi mơ dô tơnggume lơh nền.

¹¹ Ơ oh mi añ jê, gơs cau tòm hìu Klôe neh yal añ in lah digùl oh mi gơs bơta ò gơtòmsòr bal.

¹² Mơ añ kòñ đơs ală bơta oh mi đơs lah: “Añ gơrê mơ Pol;” hala “Añ gơrê mơ Apôlôs,” hala “Añ gơrê mơ Sepha,” hala “Añ gơrê mơ Bơtau Krist.”

¹³ Bơtau Krist neh kòl cah is sơl? Pol neh kong pơng hơđang chi pơng ala oh mi ơ? Hala oh mi neh ai sơnđan Pol mơ gơs ƀaptem ơ?

¹⁴ Añ ưnngài Yàng Tom Trồ añ òhềt lơh ƀaptem dô nă cau lơi tòm oh mi, mìng lơh Krispus mơ Gaius in,

¹⁵ nàng ò gơs cau lơi rgơi đơs lah oh mi ai sơnđan añ mơ gơs ƀaptem.

¹⁶ Añ kung neh lơh ƀaptem hìu nhă Stephana in; rlau mơ hơ̆ añ ò kah dilah añ neh lơh ƀaptem cau lơi ndai in.

¹⁷ Bơh Bơtau Krist neh sồr añ lòt ò di nàng lơh ƀaptem, mơya nàng bơto yal Jơnau Niam; ò di kơnòm di jơnau đơs jak chài kòn mơnus dê, rngòt chi pơng Bơtau Krist dê ò gơlik gơs gơnap gơnoar.

Bơtau Krist gơnap gơnoar mơ bơta jak chài Yàng Tom Trồ dê

¹⁸ Bơh bơta bơto yal bơh chi pơng gơwèt mơ ală cau roh rui, bơta hơ̆ la tùl gơla, mơya gơwèt mơ bol he la cau geh dong klàs, bơta hơ̆ la gơnap gơnoar Yàng Tom Trồ dê.

¹⁹ Bơh neh cih lah: “Añ rơp tơnroh bơta jak chài ală cau jak chài dê, Mơ Añ rơp tă sang bơta git wă ală cau bơtê oă dê.”

²⁰ Ntềng đah cau jak chài taih? Ntềng đah cau bơtê oă taih? Ntềng đah cau jak pơndang rài do dê taih? Ò di la Yàng Tom Trồ neh lơh bơta jak chài dunnia do gơlik tùl gơla ò ơ?

²¹ Bơh di tŭ bơta jak chài Yàng Tom Trồ dê, dunnia ò git Yàng Tom Trồ bơh bơta jak chài is bol khai dê. Sơlơ̆u wơl, Yàng Tom Trồ lơh nền ngui bơta geh kòp la tùl gơla jơnau bơto yal bol he dê nàng dong klàs ală cau dòn.

²² Bơh cau Juda dan tềl krơi, mơ cau Grek jòi bơta jak chài,

²³ mơya bol he bơto yal bơh Bơtau Krist kong pơng hơđang chi pơng, be phan gơtup jơng gơwèt hơ cau Juda, gơwèt hơ cau làng bol bơdìh la bơta tùl gơla;

²⁴ mơya gơwèt hơ ală cau geh hòi sac, cau Juda hala cau Grek, gen Bơtau Krist la gơnap gơnoar Yàng Tom Trồ dê mơ la bơta jak chài Yàng Tom Trồ dê.

²⁵ Bơh bơta sền be tùl gơla Yàng Tom Trồ dê la jak chài rlau mơ kòn mơnus dê, mơ bơta lơi sền be lơbơn lơño Yàng Tom Trồ dê la pràn kơldang rlau mơ kòn mơnus.

²⁶ Ơ oh mi, sền sơwì tĕ bơta hòi sac oh mi dê, ò gơs oă cau tòm oh mi la jak chài jat sơnoa rnoas kòn mơnus dê, ò gơs oă cau gơs gơnoar pràn, ò gơs oă cau dờng màng.

²⁷ Mơya Yàng Tom Trồ neh sac ală phan tùl gơla dunnia dê nàng lơh ƀàssìl ală cau jak chài in; mơ Yàng Tom Trồ neh sac ală bơta lơbơn lơño dunnia dê nàng lơh ƀàssìl ală bơta pràn kơldang,

²⁸ Yàng Tom Trồ neh sac ală bơta dềt rhền, ală bơta kòl sền òsơp, mơ ală bơta ò gơs dunnia dê, nàng tơnroh ală bơta dunnia kơlôi la dờng màng,

²⁹ nàng ò gơs dô nă cau lơi geh jòng să di đap Yàng Tom Trồ.

³⁰ Kơnràñ la tòm ryas bơta kis tòm Yàng Krist Jesu, Kơnràñ neh gơlik gơs bơta jak chài bol he in bơh Yàng Tom Trồ, mơ bơta song ring, bơta gơlik gơs sàng goh mơ bơta tơwài glài.

³¹ Jat be jơnau Sră Goh neh cih lah: “Cau lơi jòng să, gen jòng să tĕ tòm Yàng.”