I Ală Bơtau 5 - Sră Goh 2018

Salômôn rcang bơt bơtào hìu duh khoai

¹ Tŭ hơ̆ Hiram bơtau Tirơ sồr ală cau duh broă khai dê lòt tus hơ Salômôn, tòm tŭ khai kơno Salômôn neh geh bong mơñà gơs bơtau nàng pơrdòn sơbàn bèp khai dê, bơh Hiram sùm sùm la cau bơyô gơwèt mơ Dabit.

² Salômôn pơyoa jơnau tus mơ Hiram lah:

³ “Bơtau git bèp añ jê la Dabit ò rgơi bơt dô nơm hìu sơnđan Jehôwa Yàng Tom Trồ khai in, tài bơh ală bơta kơlìn tòmlơh mơ ală cau sò tơm gùt dar khai, jơl tus di tŭ Yàng Jehôwa neh ơn ală cau sò tơm khai dê hơđơm kơndòl jơng khai dê.

⁴ Mơya tŭ do, Jehôwa Yàng Tom Trồ añ jê neh ai añ in bơta rlô ring lơngai bơh ală đah, ò gơs cau sò tơm, hala bơta rung rài.

⁵ Behơ̆, añ gơs nùs kòñ bơt dô nơm hìu Sơnđan Jehôwa Yàng Tom Trồ añ in, be Yàng Jehôwa neh đơs mơ Dabit bèp añ lah: ‘Kòn klau mê la cau Añ rơp bơtào hơđang sơbàn mê dê rơp bơt dô nơm hìu Sơnđan Añ in.’

⁶ Gen tàng dan bơtau ai gơnoar sồr cau kơl chi nho rề bơh Liban añ in. Ală cau duh broă añ rơp lơh broă bal mơ ală cau duh broă bơtau dê, mơ añ rơp tơm bơtau in jền tơngai jat be bơtau lơh nền bol khai in. Bơh bơtau git lah digùl bol hi ò gơs dô nă cau lơi chài rgơi koh chi kung be cau Sidôn.”

⁷ Tòm tŭ Hiram kơno jơnau Salômôn dê, gen khai chò hòp dờng ngan, mơ đơs lah: “Jòng ro Yàng Jehôwa ngai do, Kơnràñ neh ai Dabit in dô nă kòn klau jak chài nàng at bồ hơđang làng bol dờng do.”

⁸ Hiram pơyoa jơnau mơ Salômôn lah: “Añ neh geh kơno jơnau bơtau sồr đơs mơ añ; mơ añ rơp lơh wil tơl jơh ală bơta bơtau kòñ añ rcang chi nho rề mơ nho.

⁹ Ală cau duh broă añ jê rơp cèng tơmù gơtòm dàlềng bơh di Liban, añ rơp kơt gơ bal dô bă mơ lòi dàlềng pơrdô tus dê tiah lơi bơtau rơp sơnio. Añ rơp hồ che kơt gơ tềng hơ̆, nàng bơtau cèng gơ bơh hơ̆. Mơ bơtau rơp lơh jat bơta añ kòñ mơ rcang sir phan sa hìu nhă añ in.”

¹⁰ Behơ̆, Hiram kư̆ rcang Salômôn in tơl jơh ală chi nho rề mơ chi nho khai kòñ gơs,

¹¹ mơ Salômôn ai Hiram in bàr jơt rbô kor kòi mi lơh gơs phan sa hìu nhă khai in, mơ bàr jơt kor mơñà ôlibe neh pat. Salômôn kư̆ ai Hiram in behơ̆ kòp sơnam.

¹² Yàng Jehôwa ai Salômôn in bơta jak chài jat be Kơnràñ neh ho mơ khai. Hiram mơ Salômôn ơm gơròm niam mơ gơp mơ bơt bơtào dô bơta ho bal.

¹³ Bơtau Salômôn kup tòm jơh Israel ală cau lơh broă, jơh ală la pe jơt rbô nă cau.

¹⁴ Bơtau sồr bol khai lòt tus hơ Liban, tòmgơl cau jơt rbô nă tòm dô kơnhai; tồ bol khai ơm dô kơnhai hơđang mơnơm Liban mơ bàr kơnhai tòm hìu tòm. Adôniram at bồ ală cau kong lơh broă bòl glar do.

¹⁵ Salômôn kung gơs poh jơt rbô nă cau lơh broă kơnjơ̆, mơ phàm jơt rbô nă cau phàt lŭ hơđang mơnơm,

¹⁶ di gah Salômôn gơs pe rbô pe rhiang nă cau sền sơwì hơđang bơta bơt bơtào mơ at bồ ală cau lơh broă.

¹⁷ Tòm gơnoar sồr bơtau dê gen bol khai tò oă lŭ dờng mơ kas màng mơ phàt ngui nàng bơt mơnàng hìu duh khoai.

¹⁸ Behơ̆ ală cau bơt hìu Salômôn mơ cau bơt hìu Hiram dê, mơ ală cau Gibal chài phàt lŭ. Bol khai rcang chi mơ lŭ nàng bơt hìu duh khoai.