II Yal Yau 7 - Sră Goh 2018

Salômôn ơn hìu duh khoai Yàng in

¹ Tòm tŭ Salômôn neh sir hòi dan, ồs dùh bơh đang trồ mơ chu pơrguc phan ơn chu mơ ală phan ơn duh khoai, mơ bơta gơklŏ Yàng Jehôwa dê bềng lìu hìu duh khoai.

² Ală cau gơnoar ơn phan duh khoai ò rgơi mut tòm hìu duh khoai Yàng Jehôwa dê, tài bơh bơta gơklŏ Yàng Jehôwa dê bềng lìu tòm hìu Kơnràñ dê.

³ Tòm tŭ jơh làng bol Israel gŏ ồs mơ bơta gơklŏ Yàng Jehôwa dê mù tòm hìu duh khoai, gen bol khai tơmbic să drup muh mat tòm mơnàng hìu duh khoai, duh khoai mơ ưnngài Yàng Jehôwa lah: “Bơh Yàng la niam; mơ bơta kòñ gơboh kơ̆ dơn Kơnràñ dê gam sùm sùm.”

⁴ Gen cau bơtau mơ jơh làng bol ơn phan ơn duh khoai di đap Yàng Jehôwa.

⁵ Mơ bơtau Salômôn ơn dô nơm phan ơn duh khoai bàr jơt bàr rbô nơm kơnrồ mơ dô rhiang bàr jơt rbô nơm belàt mơ be. Behơ̆ bơtau mơ jơh làng bol ơn hìu duh khoai Yàng Tom Trồ in.

⁶ Ală cau gơnoar ơn phan duh khoai ntào di tiah bol khai dê, ală cau Lebi kung lơh behơ̆, bal mơ ală kơñi mơ bơtau Dabit neh lơh gơs nàng jòng ro mơ ưnngài Yàng Jehôwa. Bơta kòñ gơboh kơ̆ dơn Kơnràñ dê gam sùm sùm. Tòm tŭ Dabit ơn bơta jòng ro tòm bơta duh broă bol khai dê. Ală cau gơnoar ơn phan duh khoai ntào tòm toh mat mơ cau Lebi mơ uh kơlwòk bol khai dê, mơ jơh cau Israel ơm ntào.

⁷ Salômôn ơn is tiah digùl ƀlàng di đap hìu duh khoai Yàng Jehôwa dê, mơ tềng hơ̆ khai ơn ală phan ơn chu ơn dơngi ală phan ơn bơta ring lơngai, tài bơh cơnòng mơ kòng ơn phan duh khoai mơ khai neh lơh gơs ò rgơi ơn jơh ală phan ơn chu pơrguc, ală phan ơn mơ kòi mbo mơ ală pơnah dơngi.

⁸ Di di tŭ hơ̆ Salômôn pơjum sa tòm poh ngai, mơ jơh Israel bal mơ khai, dô mpồl jơnum gal ngan, bơh Lebo Hamat tus di thòng Ejiptơ.

⁹ Tòm ngai dơ̆ phàm bol khai gam dô bơta pơjum bal dờng màng, bơh bol khai neh pơjum ơn cơnòng duh khoai tòm poh ngai mơ bơta pơjum sa tòm poh ngai tai.

¹⁰ Tòm ngai bàr jơt pe kơnhai poh, khai sồr làng bol rê hìu bol khai dê, nùs hòn chò mơ hwềng nùs niam; tài bơh bơta niam mơ Yàng Jehôwa ràng tơlik Dabit in, mơ Salômôn in mơ jơh làng bol Israel in.

Yàng Jehôwa tơlik mat dơ̆ bàr mơ Salômôn

¹¹ Behơ̆ Salômôn neh lơh sir hìu duh khoai Yàng Jehôwa dê mơ gơlang khai dê, jơh ală bơta Salômôn neh rcang rơndap nàng lơh tòm hìu Yàng Jehôwa mơ tòm gơlang khai dê, neh gơlik gơs cồng nha niam ngan.

¹² Gen Yàng Jehôwa tơlik mat mơ khai tòm trồ mang mơ đơs lah: “Añ neh kơno jơnau hòi dan mê dê mơ neh sac rwah tiah do să tòm Añ in lơh gơs dô nơm hìu duh khoai nàng ơn phan duh khoai.

¹³ Tòm tŭ Añ kal ală tap trồ nàng ò gơs mìu hala ai jơnau gơnoar sồr ală srah nting sa loan tòm lơgar, hala sồr bơta kòp jê pluh plàng tus digùl làng bol Añ jê,

¹⁴ dilah làng bol Añ jê la làng bol geh hòi mơ sơnđan Añ rơp tơnliah să bol khai dê mơ hòi dan jòi jat muh mat Añ mơ pơrlac sang gùng dà iơh bơsak bol khai dê, gen Añ rơp iat bơh hơđang trồ mơ rơp toh glài bol khai in mơ rơp sơmbòi lơgar bol khai dê.

¹⁵ Tŭ do gar mat Añ rơp pò mơ tồr Añ rơp kơrhia ơm iat ală jơnau hòi dan tòm tiah do.

¹⁶ Bơh tŭ do añ neh sac rwah mơ ơn is sàng goh hìu duh khoai do tồ Sơnđan Añ rơp ơm tềng hơ̆ sùm sùm. Mat Añ mơ nùs Añ rơp ơm sùm sùm tềng hơ̆.

¹⁷ Pơnah mơ mê, dilah mê lòt di đap Añ kung be Dabit bèp mê neh lơh, mơ lơh jat jơh ală jơnau Añ sồr, mơ prap gàr ală bơta lơh nền mơ bơta boh lam Añ jê,

¹⁸ gen Añ rơp bơtào kơ̆ sơbàn bơtau mê dê kung be Añ neh ho bal mơ Dabit bèp mê dê tòm tŭ Añ đơs lah: ‘Mê rơp ò tŭ lơi siơ̆u dô nă cau at bồ hơđang Israel.’

¹⁹ Mơya dilah mê pơrlac mơ sang lòi ală bơta lơh nền mơ jơnau sồr mơ Añ neh ai mê in mơ lik lòt duh broă ală yàng ndai mơ duh khoai bol gơ,

²⁰ gen Añ rơp tă tơlik Israel bơh di lơgar mơ Añ neh ai bol khai in, mơ rơp sang lòi hìu duh khoai mơ añ neh ơn is Sơnđan Añ in. Añ rơp lơh gơ in gơlik gơs dô jơnau dơñŏ tơnhial mơ dô nơm phan sền òsơp digùl jơh ală làng bol.

²¹ Mơ bulah hìu duh khoai do la niam màng ryŭ ngan, jơh ală cau lòt gan rơp ai lơh krơi mơ đơs lah: ‘Ñchi bơh tài Yàng Jehôwa neh lơh dô bơta behơ̆ lơgar do in mơ hìu duh khoai do in taih?’

²² Làng bol rơp ho lah: ‘Hơ̆ la tài bơh bol khai neh sang lòi Yàng Jehôwa la Yàng Tom Trồ ală ồng pàng bol khai dê, la Bơtau neh tă cèng bol khai lik bơh di Ejiptơ, mơ bol khai neh dòp rò ală yàng ndai, duh khoai mơ duh broă bol gơ; gen tàng Kơnràñ neh cèng jơh ală bơta rung rài do hơđang bol khai.’”