II Yal Yau 3 - Sră Goh 2018

Salômôn bơt bơtào hìu duh khoai

¹ Salômôn sơntòm bơt bơtào hìu duh khoai Yàng Jehôwa dê tòm Jerusalem hơđang mơnơm Môria la tiah Yàng Jehôwa neh tơlik mat mơ Dabit bèp khai dê, di tiah mơ Dabit neh rcang lài, di làn jă kòi Arauna cau Jebusit dê.

² Khai sơntòm bơt bơtào tòm ngai bàr kơnhai bàr nam dơ̆ poan rài at bồ khai dê.

³ Do la ală sơnoa rnoas Salômôn bơt hìu duh khoai Yàng Tom Trồ dê: prau jơt tal jòng mơ bàr jơt tal ơnàng (jat kơr sơnoa was sơnoa yau gơ dê).

⁴ Ƀlàng jơng gùng hìu duh khoai la bàr jơt tal jòng gan gah ơnàng hìu dê, mơ gah jơnhoa dô rhiang bàr jơt tal. Khai ƀềp đah dơlam gơ mơ màh goh ngan.

⁵ Khai pơng ală dơrñang ơdŭ dờng mơ mpàn nho rề, ƀềp gơ mơ màh goh ngan mơ bơka ală rùp chi gòl mơ che rơnjài hơđang gơ.

⁶ Khai bơka hìu duh khoai mơ ală lŭ màng; mơ màh khai ngui la màh Parbaim dê.

⁷ Khai ƀềp hìu mơ màh ală dra đah dơlam rkàng hìu, ală ròc mơ ală jrong mpồng, ală dơrñang mơ ală mpồng, mơ khai pac rùp ceruƀim di ală dơrñang.

⁸ Khai bơt bơtào Tiah Sàng Goh Ngan, jòng ròt gơ ndròm bal mơ jòng ròt hìu duh khoai dê, hơ̆ la bàr jơt tal jòng ròt mơ bàr jơt tal ơnàng. Khai ƀềp đah dơlam prau rhiang talơng màh ngan.

⁹ Ală đìn màh kơr geh pram jơt sieklơ. Khai kung ƀềp màh ală ơdŭ đah đang sơl.

¹⁰ Tòm Tiah Sàng Goh Ngan khai pac dô yô ceruƀim mơ chi mơ ƀềp gơ mơ màh.

¹¹ Ală pơnđar pò song ceruƀim dê la bàr jơt tal. Dô đah pơnđar ceruƀim sơnròp la pram tal jòng mơ gơtòmcik mơ dơrñang hìu duh khoai dê, mơ pơnđar gah ne kung pram tal jòng mơ gơtòmcik mơ pơnđar ceruƀim ne.

¹² Kung ndròm behơ̆, dô nơm pơnđar ceruƀim đah ne la pram tal jòng mơ gơtòmcik dơrñang cang đah ne hìu duh khoai dê, mơ pơnđar đah ne gơ dê kung pram tal jòng mơ gơtòmcik pơnđar ceruƀim sơnròp.

¹³ Ală pơnđar ală ceruƀim do pò song bàr jơt tal. Bol gơ ntào hơđang jơng gơ dê, wèt mat hơ ơdŭ dờng.

¹⁴ Khai lơh ală bài kơrnìng mơ che brài mơ bài che dơmài lơbơn dà tơlir trồ, dà gur mơ dà phồng, jing rùp ceruƀim tòm hơ̆.

¹⁵ Di đap hìu duh khoai khai lơh gơs bàr nơm jrong jơnhoa pe jơt pram tal, kòp jrong gơs bồ hơđang jơnhoa pram tal.

¹⁶ Khai lơh ală che sreng be ală che sreng tòm Tiah Sàng Goh Ngan mơ ơn gơ di bồ ală jrong. Khai kung lơh gơs dô rhiang nơm plai lừu mơ kơt gơ di che sreng.

¹⁷ Khai bơtào ală jrong di đap hìu duh khoai, dô nơm hơ đah đơm mơ dô nơm hơ đah đang. Jrong đah đơm khai sơnđan la Jakin mơ jrong đah đang la Bôas.