II Yal Yau 2 - Sră Goh 2018

Rcang ală bơta nàng bơt hìu duh khoai

¹ Bơtau Salômôn lơh nền bơt dô nơm hìu duh khoai Sơnđan Yàng Jehôwa dê mơ dô nơm gơlang bơtau să tòm khai in.

² Khai kup poh jơt rbô nă cau lơh broă kơnjơ̆ mơ phàm jơt rbô nă cau nàng phàt lŭ hơđang ală ƀòn kơh mơnơm, bal mơ pe rbô prau rhiang nă cau at bồ hơđang bol khai.

Tòmklac bal mơ Hiram bơtau Tirơ dê

³ Salômôn pơyoa jơnau Hiram bơtau Tirơ in lah: “Kung be bơtau neh pơyoa Dabit bèp añ in chi nho rề bò, nàng bơt dô nơm gơlang khai in ơm.

⁴ Tŭ do añ rcang nàng bơt dô nơm hìu duh khoai Sơnđan Jehôwa Yàng Tom Trồ añ in, mơ ơn is hìu hơ̆ Kơnràñ in nàng chu kơlhô ƀô bơlhu di đap Kơnràñ, mơ nàng ơn pràng piang lă sùm kòp ngai, ơn phan ơn chu pơrguc kòp drim mơ kòp mho, tòm ală ngai Saƀat, ală ngai Dùl Lik, mơ ală ngai pơjum sa neh lơh nền Jehôwa Yàng Tom Trồ bol he dê. Hơ̆ la ală bơta pơjum gam sùm sùm Israel in.

⁵ Hìu duh khoai mơ añ rơp bơt la dờng ngan, bơh Yàng Tom Trồ bol hi dê la dờng rlau jơh mơ ală yàng ndai.

⁶ Mơya ñcau rgơi bơt dô nơm hìu Kơnràñ in taih? Bơh ală tap trồ, bulah la ală tap trồ jơnhoa rlau jơh, kung ò rgơi prap Kơnràñ. Gen añ la ñcau mơ bơt dô nơm hìu Kơnràñ in, mìng be la dô bă tiah nàng ơn ală phan ơn pơdơng di đap Kơnràñ lơm sơl ơ?

⁷ Tŭ do pơyoa tĕ añ in dô nă cau chài tŏ tiar màh, priă, kòng mơ lòs, mơ chài lơh bài dà gur, dà phồng mơ dà tơlir trồ, mơ git làm lơh ală broă pac sềr bal mơ ală cau chài rgơi lơh broă, neh ơm bal mơ añ tòm Juda mơ tòm Jerusalem, la ală cau mơ Dabit bèp añ neh rcang lài.

⁸ Dan pơyoa añ in chi nho rề bò, chi nho mơ chi pơnggŏ bơh mơnơm Liban, bơh añ git la ală cau dĭ bơtau dê la cau chài rgơi kơl chi tòm Liban. Ală cau dĭ añ jê rơp lơh broă bal mơ ală cau dĭ bơtau dê,

⁹ nàng rcang lài añ in chi tơngkah tơngkañ ngan, bơh hìu mơ añ rơp bơt pal dờng mơ crih crài ngan.

¹⁰ Añ rơp rcang ală cau duh broă bơtau in la ală cau koh chi bàr jơt rbô kor kơmbuh kòi mi, bàr jơt rbô kor kòi mac, bàr jơt rbô bat tơrnòm mơ bàr jơt rbô bat mơñà ôlibe.”

¹¹ Hiram bơtau Tirơ cih sră ho wơl Salômôn in lah: “Tài bơh Yàng Jehôwa kòñ gơboh di làng bol Kơnràñ dê gen Kơnràñ neh bơtào ồng gơs bơtau at bồ bol khai.”

¹² Mơ Hiram cih bơtơl lah: “Pal jòng ro Jehôwa Yàng Tom Trồ Israel dê la Bơtau neh crơng gơs trồ mơ tiah! Kơnràñ neh ai bơtau Dabit in dô nă kòn klau jak chài, ai khai in bơta git jak mơ bơta git sền sơwì, la cau rơp bơt dô nơm hìu duh khoai Yàng Jehôwa in mơ dô nơm gơlang să tòm khai in.

¹³ Añ pơyoa Huram Abi tus hơ bơtau, khai la dô nă cau chài rgơi ngan,

¹⁴ mè khai la bơh cau Dan mơ bèp khai bơh cau Tirơ. Khai neh geh bơtê nàng lơh broă tŏ tiar màh, priă, kong lòs, lŭ mơ chi, mơ lơh bài dà gur, bài dà tơlir trồ, mơ bài dà phồng mơ bài che dơmài lơbơn. Khai git làm jơh ală bơta pac sềr mơ rgơi lơh gơs ală phan lơi neh jào khai in lơh. Khai rơp lơh broă bal mơ ală cau chài lơh broă bơtau dê mơ ală cau rcang lài bơh cau tòm añ jê la Dabit bèp bơtau dê.

¹⁵ Tŭ do dan cau tòm añ jê pơyoa ală cau duh broă bơtau in kòi mi mơ kòi mac, mơñà ôlibe mơ tơrnòm mơ bơtau neh ho,

¹⁶ mơ bol hi rơp koh ală chi lơi pal càng bơh mơnơm Liban, bol hi rơp kơt gơ bal dô bă mơ lòi dàlềng pơrdô gơ tus hơ Jôppa. Bơtau rgơi cèng gơ tus hơ Jerusalem.”

¹⁷ Salômôn kòp khà jơh ală cau làng bơdìh ơm tòm lơgar Israel, tơnơ̆ mơ bơta kòp khà làng bol mơ Dabit bèp khai neh lơh, mơ neh gơs dô rhiang pram jơt pe rbô prau rhiang nă.

¹⁸ Poh jơt rbô nă tòm bol khai ơn nàng lơh broă kơnjơ̆ mơ phàm jơt rbô nă cau phàt lŭ tòm ală ƀòn kơh mơnơm, gơs pe rbô prau rhiang nă cau at bồ hơđang làng bol lơh broă.