II Timôthe 2 - Sră Goh 2018

Cau ling jak Yàng Krist Jesu dê

¹ Behơ̆ ơ kòn, pràn kơldang tĕ tòm bơta nđàc tòm Yàng Krist Jesu.

² Ală bơta mê neh kơno bơh añ di đap oă cau lơh cơng, jào tĕ ală cau di pal gơn kơnòm in, la ală cau chài rgơi bơto sồr cau ndai.

³ Kong bòl glar tĕ bal mơ añ be dô nă cau ling jak Yàng Krist Jesu dê.

⁴ Ò gơs dô nă cau lơi ơm ling mơ gam gơkòl broă rài do, lơh behơ̆ tồ niam nùs cau tòm hòi khai.

⁵ Dô nă cau tòmpơrlòng dilah ò jat bơta boh lam, gen ò geh sơgơn bơtau.

⁶ Cau lơh sre kong bòl glar lơh broă gen pal dòp geh cồng nha sơnròp ngan.

⁷ Kơlôi sơnơng tĕ di jơnau añ đơs do, bơh Yàng rơp ai mê in git wă jơh ală bơta.

⁸ Kah tĕ Yàng Jesu Krist deh bơh jơi bơtiàn bơtau Dabit, Bơtau neh kis wơl bơh bơta chơt jat be Jơnau Niam añ jê.

⁹ Bơh Jơnau Niam hơ̆ tàng añ kong bòl glar, tian gơs kòl cap be cau tìs glài; mơya jơnau Yàng Tom Trồ dê ò kòl cap ò.

¹⁰ Behơ̆ tàng tài bơh ală cau neh geh sac rwah mơ añ kong jơh ală bơta, tồ bol khai in kung geh bơta dong klàs tòm Yàng Krist Jesu, bal mơ bơta gơklŏ gam sùm sùm.

¹¹ Jơnau do la nền cê ngan: Dilah bol he neh chơt bal mơ Kơnràñ, gen kung rơp kis bal mơ Kơnràñ sơl;

¹² Dilah bol he kong jai, gen kung rơp at bồ bal mơ Kơnràñ; Dilah bol he pơndang sang Kơnràñ, gen Kơnràñ kung rơp pơndang sang bol he sơl;

¹³ Dilah bol he ò dòn song, mơya Kơnràñ kư̆ dòn song sùm, bơh Kơnràñ ò rgơi pơndang sang is Kơnràñ dê.

Dô nă cau duh broă niam nùs Yàng Tom Trồ

¹⁴ Hơ̆ la bơta mê pal tơngkah bol khai in mơ bơto kràñ cê bol khai in di đap Yàng lah bañ tòm pơndang bơh jơnau đơs, bơh bơta hơ̆ la ò kwơ, mìng gơlơh iơh di cau iat.

¹⁵ Jơh nùs tĕ tơlik mat nàng niam nùs Yàng Tom Trồ, be dô nă cau lơh broă ò ƀàssìl yal tơlik jơnau song dê dô bă song ngan.

¹⁶ Mơya pal pleh tĕ di ală jơnau gơlềng gơlàng ƀơ̆ ƀơl jat dunnia, bơh ală cau đơs jơnau hơ̆ sơlo gơtơntìs tai tòm bơta ò duh rngòt,

¹⁷ mơ jơnau đơs bol khai dê be toh mồr sa rề. Tòm mpồl hơ̆ gơs Himene mơ Philetus,

¹⁸ bol khai neh tìs di gùng jơnau song, mơ đơs lah bơta kis wơl neh rlau rau, mơ lơh gơprah bơta dòn cau ƀà dê.

¹⁹ Bulah behơ̆ mơnàng kơ̆ wền Yàng Tom Trồ dê gam ntào kơ̆ sùm, gơs tap ƀang kì lah: “Yàng git cau gơrê bal mơ Kơnràñ;” mơ “Kòp nă cau lơi yal tơlik sơnđan Yàng gen pal pleh tĕ di bơta ò song ring.”

²⁰ Tòm dô nơm hìu dờng ò di gơs mìng ală gri mơ màh mơ priă lơm ò, mơya kung gơs gri mơ chi mơ ù sơl; phan ƀà ngui tòm broă dờng màng, phan ƀà tai ngui tòm broă ò dờng màng.

²¹ Dilah cau lơi lơh goh is să he bơh di ală broă iơh bơsak hơ̆, gen rơp be gri dờng màng geh gơlik gơs sàng goh, gơs kwơ cau tòm in mơ neh rcang sir ală broă niam in.

²² Kung pleh tĕ dê nùs hàm kòñ is cau kơnòm să dê, nàng jòi jat bơta song ring, bơta dòn, bơta kòñ gơboh mơ bơta ring lơngai mơ dô nùs bal mơ ală cau gơs nùs sàng goh hòi dan mơ Yàng dong kòl.

²³ Tòmdră tĕ mơ ală jơnau tòm pơndang bơrngơl gơla ò kwơ bơh git lah ală bơta hơ̆ mìng gơlik gơs bơta tòmpìt tòmhà lơm.

²⁴ Mơ tai, dĭ gơna Yàng dê ò di tòmpìt tòmhà, mơya pal ơm niam lơnhơn gơwèt mơ jơh ală cau, chài rgơi bơto sồr, kong ơt ơl,

²⁵ ai bơta niam lơnhơn nàng bơto pơniam wơl ală cau jak pơrlơ̆ dră. Kơp kòñ Yàng Tom Trồ rơp ai bol khai in bơta gơjrañ sang glài nàng git wă jơnau song,

²⁶ mơ bol khai git kah nàng dong he lik klàs bơh dă cà ràk kup nàng lơh jat nùs kòñ gơ dê.