II Samuel 8 - Sră Goh 2018

Ală bơta tòmlơh pha lin rlau Dabit dê

¹ Tơnơ̆ hơ̆, Dabit tòmlơh mơ cau Philistin mơ geh pha rlau mơ kup bol khai kong duh, Dabit tă gơnoar at bồ Methek Ammah dê bơh tê cau Philistin.

² Dabit kung tòmlơh pha rlau mơ cau Môap, sồr bol khai bic jơh tòm ù mơ was bol khai mơ dô dang che rnoas. Khai was bàr che rnoas ală cau hơ̆ rơp kòl sreh tơnchơt, mơ was dô che rnoas gen lòi kis ală cau hơ̆. Behơ̆ cau Môap pal kong duh broă Dabit mơ dap dia khai in.

³ Rlau mơ hơ̆, Dabit neh tòmlơh mơ Hadadejer kòn klau Rehôp, bơtau Jôba, tòm tŭ khai lòt nàng ai wơl gơnoar at bồ hơđang kơnhwàl rò gah hiòng Ơphrat.

⁴ Dabit kup dô rbô rơndeh poh rhiang nă cau ling hào ơseh khai dê, mơ bàr jơt rbô ling lòt jơng. Dabit koh ară jơng jơh ală ơseh hwài rơndeh tòmlơh, mơya lòi tơl dô rhiang nơm ơseh hwài rơndeh tòmlơh lơm.

⁵ Tòm tŭ cau Aram bơh Damas tus dong kòl Hadadejer, bơtau Jôba dê, gen Dabit tơnchơt bàr jơt bàr rbô nă cau tòm bol khai.

⁶ Khai bơtào ală theng kơp gàr kơ̆ cê tòm ƀòn dờng Damas lơgar Aram, mơ cau Aram kong duh broă Dabit, mơ pal kong dap dia, Yàng Jehôwa ai Dabit in bơta pha rlau tòm ală tiah khai lòt tus.

⁷ Dabit tă ală khèl mơ màh bơh di ală cau kwang duh broă Hadadejer mơ cèng gơ hơ Jerusalem.

⁸ Bơh di Betah mơ Berôthai la bàr nơm ƀòn dờng gơrê bal mơ Hadadejer, bơtau Dabit tòmpìt ai oă ngan kòng sơl.

⁹ Tòm tŭ Thôi, bơtau Hamat, kơno lah bơtau Dabit neh tòmlơh pha mơ jơh dô mpồl ling Hadadejer dê,

¹⁰ gen khai sồr Jôram, kòn klau khai dê, tus hơ Dabit nàng lùp còp mơ jơnau hòn chò jòng ro khai neh tòmlơh pha rlau mơ Hadadejer, bơh Hadadejer òs tòmlơh mơ Thôi. Jôram cèng bal ală phan ơn mơ priă, mơ màh mơ kòng.

¹¹ Bơtau Dabit ơn is ală phan do sàng goh Yàng Jehôwa in, bal mơ priă mơ màh khai neh ơn is bơh di ală làng bol neh kong boh dia khai in,

¹² hơ̆ la cau Edôm, cau Môap, cau Ammôn, cau Philistin, mơ cau Amalek, mơ ală phan tòmpìt ai bơh di Hadadejer, kòn klau Rehôp, bơtau Jôba.

¹³ Dabit geh tiơng pơnro ngan tơnơ̆ mơ tŭ khai rê wơl bơh bơta tòmlơh mơ tơnchơt jơt phàm rbô nă cau Edôm tòm Thòng Boh.

¹⁴ Khai bơt ală theng kơp gàr kơ̆ cê tòm làm lơgar Edôm, mơ jơh làng bol Edôm kong duh Dabit. Yàng Jehôwa ai Dabit in bơta pha rlau tòm ală tiah khai neh lòt tus.

Ală cau kwang dong broă Dabit

¹⁵ Dabit at bồ làm jơh Israel, lơh jat jơnau song mơ ring bal gơwèt mơ jơh làng bol khai dê.

¹⁶ Jôap kòn klau Jeruyah la kwang dờng at bồ mpồl ling; Jehôsaphat kòn klau Ahilut la kwang cih bơta yal yau lơgar dê;

¹⁷ Jadôk kòn klau Ahitup, mơ Ahimelek kòn klau Abiatha la ală cau gơnoar ơn phan duh khoai; Jeruyah la cau gơnoar cih;

¹⁸ Benayah kòn klau Jehôyada la kwang at bồ cau Kerethit mơ cau Phelethit; mơ ală kòn klau Dabit la kwang bơyai broă cau bơtau dê.