II Samuel 7 - Sră Goh 2018

Yàng Tom Trồ ho pơgon mơ Dabit

¹ Tòm tŭ bơtau Dabit neh ơm tòm gơlang khai dê rau, mơ Yàng Jehôwa neh ai khai in ơm rlô lơngai bơh di jơh ală cau sò tơm gùt dar khai,

² gen khai đơs mơ cau gơnoar hwơr Nathan lah: “Sền do, añ ơm tòm gơlang mơ nho rề, mơya Đài Yàng Tom Trồ dê gam ơm tòm dô nơm sàl.”

³ Nathan đơs mơ bơtau lah: “Lơh tĕ, jơh ală bơta bơtau neh kơlôi tòm nùs, bơh Yàng Jehôwa ơm bal mơ bơtau.”

⁴ Mơya kung tòm mang hơ̆ gơs jơnau Yàng Jehôwa đơs mơ Nathan lah:

⁵ “Lòt tĕ yal mơ Dabit, cau duh broă Añ jê lah: Yàng Jehôwa đơs be do: ‘Mê la cau rơp bơt dô nơm hìu nàng Añ in ơm ơ?

⁶ Añ neh ò ơm tòm dô nơm hìu lơi bơh ngai Añ cèng làng bol Israel lik bơh di lơgar Ejiptơ jơl tus di ngai do, mơya Añ neh lòt bơh tiah do tus hơ tiah ne tòm dô nơm sàl mơ Sàl Ing Duh Khoai.

⁷ Tiah lơi Añ neh lòt digùl jơh làng bol Israel, gơs tŭ lơi Añ neh đơs dô jơnau lơi mơ dô nă cau lơi tòm ală cau kwang at bồ Israel dê, la ală cau Añ neh sồr ê gàr Israel làng bol Añ jê mơ đơs lah: Ñchi bơh tài bol mê ò bơt Añ in dô nơm hìu mơ chi nho rề sơl ơ?’

⁸ Behơ̆ tŭ do, đơs tĕ mơ Dabit, cau duh broă Añ jê lah: ‘Yàng Jehôwa Gơnap Gơnoar Dờng Làm Jơh đơs be do: Añ neh tă mê bơh di ƀlàng ñhơt, bơh tiah mê ê mpồl belàt, nàng mê lơh gơs cau bơtau at bồ làng bol Israel Añ jê.

⁹ Añ neh ơm bal mơ mê tiah lơi mê lòt, mơ neh tơnroh jơh ală cau sò tơm mê dê bơh di đap mê. Tŭ do Añ rơp lơh sơnđan mê gơlik dờng màng kung be ală sơnđan ală cau dờng màng rlau jơh tòm plai ù.

¹⁰ Mơ Añ rơp sac rwah dô bă tiah làng bol Israel Añ in, mơ Añ rơp tam bol khai, nàng bol khai in ơm tòm tiah tòm bol khai dê, mơ ò gơs tŭ lơi gam kong cau lơh dơrcul tai. Ală cau iơh bơsak rơp ò rồn bơklơn bol khai tai kung be lài òr,

¹¹ bơh di tŭ Añ neh bơtào ală cau kwang at bồ hơđang làng bol Israel Añ jê. Añ kung rơp ai mê in rlô lơngai bơh di jơh ală cau sò tơm mê dê. Rlau mơ hơ̆, Yàng Jehôwa neh đơs loh mơ mê lah Yàng Jehôwa rơp lơh mê in dô nơm hìu.

¹² Tòm tŭ ală ngai mê dê neh wil tơl, mơ mê rơp bic mơ ală ồng pàng mê dê, Añ rơp tơngguh kòn mê nàng pơrdòn sơbàn mê, la kòn rơp lik bơh să jan mê, mơ Añ rơp bơt bơtào lơgar bơtau khai dê.

¹³ Khai rơp bơt dô nơm hìu Sơnđan Añ in, mơ Añ rơp bơtào sơbàn lơgar bơtau khai dê gam sùm sùm.

¹⁴ Añ rơp lơh gơs bèp khai dê, mơ khai rơp lơh gơs kòn klau Añ jê. Tòm tŭ khai tìs glài, Añ rơp lơh glài khai mơ gai mơ mơng kòn mơnus dê, pù lơh jê sồt bơh kòn mơnus.

¹⁵ Mơya Añ rơp ò tă bơta kòñ gơboh kơ̆ dơn Añ jê bơh di khai, kung be Añ neh tă gơ bơh di Sol la cau Añ neh tă tơlik bơh di đap mê.

¹⁶ Hìu mê mơ lơgar bơtau mê dê rơp geh bơtào kơ̆ nền gam sùm sùm di đap mê; sơbàn mê rơp geh bơtào kơ̆ gam sùm sùm.’”

¹⁷ Nathan neh yal jơh ală jơnau hơ̆ bal mơ jơh ală bơta gơtơnggŏ hơ̆ Dabit in.

Jơnau hòi dan Dabit dê

¹⁸ Gen bơtau Dabit lòt tus mơ nggui di đap Yàng Jehôwa mơ đơs lah: “Khoai Jehôwa Yàng Tom Trồ, añ la ñcau mơ hìu nhă añ la ñchi mơ Kơnràñ neh tề lam añ tus di ngai do taih?

¹⁹ Bulah behơ̆, hơ̆ la dô bơta dềt rhền di đap mat Yàng; khoai Jehôwa Yàng Tom Trồ, Yàng kung neh đơs bơh hìu cau duh broă Yàng dê bơh ală ngai jŏ jòng rơp tus. Khoai Jehôwa Yàng Tom Trồ, dan jơnau bơto sồr do gơlik gơs làng bol in.

²⁰ Ñchi jơnau Dabit gam kòñ đơs tai mơ Yàng taih? Bơh Yàng git cau duh broă Yàng dê, ơ Jehôwa Yàng Tom Trồ.

²¹ Tài bơh jơnau Yàng ho jat nùs kòñ Yàng dê, gen Yàng neh lơh broă dờng do, nàng cau duh broă Yàng rgơi git bơta hơ̆.

²² Gen tàng, Yàng la dờng ngan, ơ Jehôwa Yàng Tom Trồ, bơh ò gơs Yàng lơi ndròm be Yàng, mơ ò gơs Yàng Tom Trồ lơi rlau mơ mìng dô nă Yàng, jat be jơh ală bơta tồr bol hi neh kơno.

²³ Gơs làng bol lơi ndai be làng bol Yàng dê, be làng bol Israel sơl ơ? Gơs làng bol lơi ndai tòm plai ù mơ Yàng Tom Trồ neh lòt nàng tơwài be dô nơm làng bol mơ tơmoh mơ sơnđan să tòm Kơnràñ dê, lơh ală broă dờng mơ pal rngòt rngơt ngan bol khai in, hơ̆ la ting bơtrơh bơh di đap làng bol Kơnràñ dê ală làng bol mơ ală yàng bol khai dê.

²⁴ Mơ Yàng neh bơtào kơ̆ làng bol Israel să tòm Yàng in be la làng bol Yàng dê gam sùm sùm. Đah mơ Yàng, ơ Yàng Jehôwa, Yàng neh gơlik gơs Yàng Tom Trồ bol khai dê.

²⁵ Mơ tŭ do, ơ Jehôwa Yàng Tom Trồ, dan Yàng prap gàr gam sùm sùm jơnau Yàng neh ho bơh cau duh broă Yàng dê mơ bơh hìu khai dê. Dan Yàng lơh tĕ be Yàng neh ho.

²⁶ Tồ sơnđan Yàng geh jòng ro gam sùm sùm, tòm jơnau cau đơs lah: ‘Yàng Jehôwa Bơtau Hơđang Rlau Jơh la Yàng Tom Trồ hơđang Israel!’ Mơ hìu cau duh broă Yàng dê la Dabit rơp geh bơtào kơ̆ di đap Yàng!

²⁷ Đah mơ Yàng, ơ Yàng Jehôwa Gơnap Gơnoar Dờng Làm Jơh la Yàng Tom Trồ Israel dê, Yàng neh yal tơlik jơnau do cau duh broă Yàng in mơ đơs lah: ‘Añ rơp bơt mê in dô nơm hìu.’ Gen tàng, cau duh broă Yàng dê geh nùs khin cha hòi dan mơ Yàng ală jơnau do.

²⁸ Mơ tŭ do, Ơ Jehôwa Yàng Tom Trồ, Yàng la Yàng Tom Trồ, ală jơnau đơs Kơnràñ dê la song ngan, mơ Yàng neh ho ală bơta niam do mơ cau duh broă Yàng dê.

²⁹ Tŭ do, dan Yàng niam nùs ai lơngai hìu cau duh broă Yàng in, nàng gơ kư̆ pơnjat gam sùm sùm di đap mat Yàng; bơh Yàng, ơ Yàng Jehôwa Bơtau Hơđang Rlau Jơh, Yàng neh đơs, mơ bơta lơngai Yàng dê; hìu cau duh broă Yàng dê rơp dòp geh lơngai gam sùm sùm.”