II Samuel 23 - Sră Goh 2018

Ală jơnau đơs lồi dut Dabit dê

¹ Do la ală jơnau đơs lồi dut Dabit dê: “Jơnau đơs Dabit dê, kòn klau Jese, hơ̆ la jơnau đơs cau geh Yàng Tom Trồ yò tơngguh, cau geh bong mơñà bơh Yàng Tom Trồ Jakôp dê, cau jak đơs chò Israel dê.

² Hwềng Yàng Jehôwa dê neh kơnòm di añ mơ đơs; jơnau đơs Kơnràñ dê ơm di lơmpiat añ.

³ Yàng Tom Trồ Israel dê neh đơs, Pơnai Lŭ dờng Israel dê neh đơs mơ añ lah: ‘Tòm tŭ cau lơi at bồ làng bol dô bă song ring, hơ̆ la khai at bồ tòm bơta duh rngòt di Yàng Tom Trồ,

⁴ kung be bơta àng àng drim, be mattơngai lik tòm àng drim ò gơs mhwal, àng gơcrà bơh mìu hơđang ù in hòn ñhơt.’

⁵ Hìu añ ò di behơ̆ di đap Yàng Tom Trồ ò ơ? Bơh Kơnràñ neh bơt bơtào dô bơta ho bal gam sùm sùm mơ añ, Jơh ală bơta neh geh rơndap mơ sền gàr. Kơnràñ rơp ò lơh gơlik cồng nha bơta dong kòl añ jê, mơ jơh ală bơta kơp kòñ añ jê ò ơ?

⁶ Mơya jơh ală cau iơh bơsak kung be lò kong sang ngài; bơh bol khai ò rgơi ai tê tơrgòm gơ.

⁷ Cau pal ai phan ngui mơ lòs hala ngkơr tà nàng kwĕ gơ; mơ jơh bol gơ kong chu jơh tòm ồs.”

Ală cau gơnoar pràn Dabit dê

⁸ Do la sơnđan mat ală cau gơnoar pràn Dabit dê: Jôsep Basebet, cau Tahkemôn, at bồ mpồl Pe nă; khai ngui tà tòmlơh mơ phàm rhiang nă cau, mơ tơnchơt jơh tòm dô dơ̆ lĕ.

⁹ Tơnơ̆ mơ khai gen gơs Eleajar kòn klau Dôdô, sau Ahôhi. Khai neh ơm bal mơ Dabit tòm tŭ bol khai pơrlòng ală cau Philistin la cau neh pơjum bal tềng hơ̆ nàng tòmlơh. Ală cau Israel ruc wơl,

¹⁰ mơya khai ơm kơ̆ di tiah khai dê mơ tòmlơh pha mơ cau Philistin jơl tus di tŭ mpàng tê khai lơgah mơ gơlik gơlte, gơđềt bal mơ ngkơr đào khai dê. Tòm ngai hơ̆, Yàng Jehôwa ai cau Israel in geh pha lin dờng ngan. Mpồl ling rê wơl mơ Eleajar, mơya mìng ai phan bơh di cau neh chơt lơm.

¹¹ Tơnơ̆ mơ cau hơ̆ gơs Samma, kòn klau Age cau Hara. Tòm tŭ cau Philistin neh pơjum bal tòm dô bă tiah gơs sre tam oă ngan khoah, gen mpồl ling Israel ntoat dô bơh di bol khai.

¹² Mơya Samma ntào kơ̆ digùl sre. Khai dong tò gơ mơ tơnchơt cau Philistin, mơ Yàng Jehôwa ai cau Israel in geh pha lin rlau dờng ngan.

¹³ Tòm kơnhai toès, tòm mpồl pe jơt nă cau kwang at bồ ling, gơs pe nă mù tus mơ Dabit di rgồng lŭ Adulam, tòm tŭ dô mpồl ling Philistin lơh sàl ơm tòm thòng Rephaim.

¹⁴ Tòm tŭ hơ̆ Dabit ơm tòm theng kơ̆ cê, mơ mpồl ling Philistin ơm tòm Betlehem.

¹⁵ Dabit kòñ gơs dà hùc gen đơs lah: “Añ kơp kòñ gơs cau lơi rgơi ai añ in hùc dà bơh tơrlung dà di gah mpồng ƀòn Betlehem!”

¹⁶ Behơ̆ pe nă cau ling jak tòmlơh hơ̆ lòt gan di mpồl ling Philistin, ƀơ̆ dà tòm tơrlung di gah mpồng ƀòn Betlehem mơ cèng brê Dabit in. Khai ò bài hùc mơya rsìh dà hơ̆ di đap Yàng Jehôwa,

¹⁷ mơ đơs lah: “Ơ Yàng Jehôwa! Añ ò hùc dà do. Dà do ò gơkrơi kung be mhàm ală cau neh phi bơta kis bol khai dê nàng dòp geh ò ơ?” Mơ Dabit ò bài hùc dà hơ̆. Hơ̆ la broă lơh tiơng pơnro pe nă cau ling jak tòmlơh hơ̆ dê.

¹⁸ Abisai, oh Jôap, kòn klau Jeruyah, la cau lam bồ pe nă cau ling jak tòmlơh hơ̆. Khai ngui tà khai dê tòmlơh mơ tơnchơt pe rhiang nă cau, tài behơ̆ khai gơs tiơng pơnro kung be pe nă cau ne.

¹⁹ Khai ò di neh geh tiơng pơnro rlau mơ pe nă cau ne ò ơ? Khai gơlik gơs cau lam bồ bol khai, bulah khai ò geh kòp bal tòm mpồl bol khai.

²⁰ Benayah kòn klau Jehôyada tòm Kapjeel la dô nă cau ling tòmlơh khin cha, lơh gơs ală broă tiơng pơnro dờng. Khai neh tơnchơt bàr nă cau Môap pràn kơldang rlau jơh. Tòm dô ngai mìu piar ne, khai mù tòm dô nơm brong jrô mơ tơnchơt dô nơm klìu triă.

²¹ Khai kung tơnchơt dô nă cau Ejiptơ dờng jơnhoa. Bulah cau Ejiptơ at tà tòm tê, Benayah gơs mìng dô nơm gai lồng. Benayah tă ai tà hơ̆ bơh di tê cau Ejiptơ, mơ tơnchơt khai mơ tà tòm cau hơ̆ dê.

²² Hơ̆ la ală broă tiơng pơnro Benayah dê, kòn klau Jehôyada; khai geh tiơng pơnro kung be pe nă cau ling jak tòmlơh ne.

²³ Khai geh tiơng pơnro rlau mơ kòp nă cau tòm mpồl pe jơt nă, mơya ò kòp bal mơ mpồl pe nă. Dabit bơtào khai at bồ mpồl ling gàr să bơtau dê.

²⁴ Tòm mpồl pe jơt nă gơs Asael oh klau Jôap dê, Elhanan kòn klau Dôdô bơh Betlehem,

²⁵ Samma cau Harôt, Elika tòm Harôt,

²⁶ Helet tòm Phelet, Ira kòn klau Ike bơh Tekôa,

²⁷ Abiejer bơh Anatôt, Mebunai cau Husa,

²⁸ Jalmôn bơh Ahô, Maharai cau Netôpha,

²⁹ Helep kòn klau Baana cau Netôpha, Ittai kòn klau Ribai bơh Gibea, tòm Benjamin,

³⁰ Benayah cau Phirathôn, Hidai bơh ală thòng Gaas dê,

³¹ Abialbôn cau Arbathit, Asmabet cau Bahurim,

³² Eliaba cau Saalbôn, ală kòn klau Jasen dê, Jônathan

³³ kòn klau Samma cau Hara, Sama ơm Hara; Ahiam kòn klau Sara cau Hararit,

³⁴ Eliphelet kòn klau Ahasbai cau Maakah, Eliam kòn klau Ahitôphel cau Gilô,

³⁵ Hejrô cau Karmel, Phaarai cau Arbite,

³⁶ Igal kòn klau Nathan bơh Jôba, kòn klau Hagri,

³⁷ Jelek cau Ammôn, Naharai cau Beerôt la cau àñ phan tòmlơh Jôap dê, kòn klau Jeruyah,

³⁸ Ira cau Ithe, Garep cau Ithe,

³⁹ mơ Uria cau Hetit. Jơh ală la pe jơt poh nă.