II Samuel 22 - Sră Goh 2018

Bơta đơs chò Dabit dê

¹ Dabit đơs ală jơnau đơs chò do Yàng Jehôwa in, tòm tŭ Yàng Jehôwa neh dong klàs khai bơh di tê ală cau sò tơm khai dê, mơ klàs bơh di tê Sol.

² Khai đơs lah: “Yàng Jehôwa la pơnai lŭ añ jê, la theng kìng crŭ añ jê, mơ la Bơtau dong klàs añ jê;

³ Yàng Tom Trồ añ jê, pơnai lŭ añ jê, tòm Kơnràñ añ kìng crŭ să añ, Kơnràñ la khèl đo añ jê mơ la ngke bơta dong klàs añ jê. Kơnràñ la theng kơ̆ nền añ jê, la tiah añ kìng crŭ, la bơtau dong klàs añ; Kơnràñ dong añ klàs bơh di ală cau jàñ bơsak.

⁴ Añ hòi dan di Yàng Jehôwa la Bơtau di pal geh jòng ro, mơ añ neh geh dong klàs bơh di ală cau sò tơm di añ.

⁵ Ală ryà dà bơta chơt dê neh gơrwàng añ, Ală hiòng dà pràn bơta tơnroh sò tơm di añ.

⁶ Ală che bơtô ƀồc dê neh kơt pùt gùt dar añ, ală dă bơta chơt dê neh pơt nàng kup añ.

⁷ Tòm bơta rung rài añ neh hòi dan di Yàng Jehôwa; Añ neh hòi driau mơ Yàng Tom Trồ añ jê. Bơh di hìu duh khoai Yàng dê, Kơnràñ neh kơno jơnau añ, jơnau hòi dan añ jê neh tus di tồr Kơnràñ dê.

⁸ Plai ù gơrơm mơ gơlơnggơr, ală mơnàng ală tap trồ dê gơlơnggac lơnggơr, gơrơm tài bơh Kơnràñ gơhào gơjrañ.

⁹ Ñhŭ neh gơlik bơh di trồm muh Kơnràñ; ồs sa roh neh lik bơh di bơr Kơnràñ, ồs rnga sa hơng bơh Kơnràñ.

¹⁰ Kơnràñ crè ală tap trồ mơ mù, bơta klam jơngo cik ơm hơđơm jơng Kơnràñ.

¹¹ Kơnràñ hào hơđang ceruƀim mơ par; Kơnràñ tơlik mat hơđang ală pơnđar càl dê.

¹² Kơnràñ ai bơta klam jơngo jơm gòm gùt dar Kơnràñ, ală mhwal jù lơh gơs dô bă tiah tơrgòm dà.

¹³ Bơh bơta àng gơcrà di đap Kơnràñ ồs rnga sa hơng.

¹⁴ Yàng Jehôwa lơh kơnàs ntơr bơh hơđang trồ; Bơtau Hơđang Rlau Jơh tơlik sap đơs Kơnràñ dê.

¹⁵ Kơnràñ pañ kam mơ lơh gơprah ală cau sò tơm, tơlik puhlèp mơ lơh gơprah gơpring bol khai.

¹⁶ Bơh jơnau lah pơrhơng Yàng Jehôwa dê, mơ bơh nhơm gơlik bơh di trồm muh Kơnràñ, gen ală tiah jrô dàlềng gơ mpòl, mơ ală mơnàng plai ù gơ ràng tơlik.

¹⁷ Bơh hơđang Kơnràñ ai tê sơmbat añ, Kơnràñ tă tơlik añ klàs bơh di dà dờng.

¹⁸ Kơnràñ dong tă añ klàs bơh di cau sò tơm pràn kơldang, bơh di ală cau neh gơjrañ di añ; bơh bol khai pràn kơldang oă rlau mơ añ.

¹⁹ Bol khai brồ tus di añ tòm ngai rung rài añ jê, mơya Yàng Jehôwa dong kòl añ.

²⁰ Kơnràñ cèng tơlik añ di tiah dờng ơnàng, Kơnràñ dong tă añ tài bơh Kơnràñ niam nùs di añ.

²¹ Yàng Jehôwa neh ai phan ƀàn añ in jat bơta song ring añ jê. Kơnràñ ai phan bàn añ in jat bơta sàng goh tê añ jê.

²² Bơh añ neh lòt jat ală gùng dà Yàng Jehôwa dê; añ neh ò lơh iơh mơ pơrlac sang Yàng Tom Trồ añ jê.

²³ Jơh ală bơta lơh nền Kơnràñ dê gơ ơm di đap añ mơ añ ò pơrlac sang jơh ală bơta sồr lam Kơnràñ dê;

²⁴ Añ ò gơs tiah geh lah pơrhơng di đap Kơnràñ, mơ neh prap gàr să tòm añ klàs bơh di tồi glài.

²⁵ Yàng Jehôwa neh ai phan bàn añ in jat bơta song ring añ jê, jat bơta sàng goh añ jê di đap Kơnràñ.

²⁶ Gơwèt mơ cau dòn song, Yàng yal tơlik să tòm Kơnràñ la dòn song, gơwèt mơ cau wil tơl, Yàng yal tơlik să tòm Kơnràñ la wil tơl.

²⁷ Gơwèt mơ cau sàng goh, Yàng yal tơlik să tòm Kơnràñ la sàng goh, mơya gơwèt mơ cau gơs nùs rkwet rkwe, Yàng yal tơlik să tòm Kơnràñ la sò tơm.

²⁸ Kơnràñ dong tă cau pơndêt să; mơya mat Yàng sền đal ală cau pơnhừ să nàng tơmù bol khai.

²⁹ Ơ Yàng Jehôwa, ngan Kơnràñ la ồs đèng añ jê, Yàng Jehôwa pơnđàng sòl bơta klam jơngo añ jê.

³⁰ Kơnòm di Kơnràñ añ rgơi tơnlề dô mpồl ling, mơ kơnòm di Yàng Tom Trồ añ jê, añ rgơi sơnđoh gan rlau dơrñang.

³¹ Gơwèt mơ Yàng Tom Trồ ală gùng dà Yàng Tom Trồ la wil tơl, jơnau ho Yàng Jehôwa dê la song ngan. Kơnràñ la dô nơm khèl jơh ală cau in kìng crŭ tòm Kơnràñ.

³² Bơh ñcau la Yàng Tom Trồ rlau mơ Yàng Jehôwa taih? Mơ ñcau la Pơnai lŭ rlau mơ Yàng Tom Trồ bol he dê taih?

³³ Hơ̆ la Yàng Tom Trồ neh tơnsoh añ in bơta pràn kơldang, mơ pò ơnàng gùng dà añ jê.

³⁴ Kơnràñ lơh jơng añ kung be jơng dô nơm jùn, Kơnràñ lơh añ in ring lơngai hơđang ală tiah jơnhoa.

³⁵ Kơnràñ bơto tê añ tòmlơh, tơwòr tê añ rgơi wàr àtak mơ kòng.

³⁶ Yàng neh ai añ in khèl bơta dong klàs Kơnràñ dê, Yàng neh mù nàng lơh añ in geh dờng ryŭ.

³⁷ Yàng lơh añ in cơnđòa lòt khat gơboh, mơ jơng añ jê ò ntiar.

³⁸ Añ ting jat cau sò tơm di añ mơ tơnroh bol khai, Añ ò rê wơl jơl tus di tŭ bol khai neh kong tơnroh.

³⁹ Añ chu pơrguc bol khai, añ tơnroh jơh hir bol khai, mơ bol khai ò rgơi guh tai; bol khai gơpừ hơđơm jơng añ.

⁴⁰ Yàng neh kơt but añ in mơ bơta pràn nàng tòmlơh, Yàng neh lơh ală cau sò tơm di añ gơkram hơđơm añ.

⁴¹ Yàng neh lơh ală cau sò tơm añ jê pơrlac dô bơh di añ, ală cau neh gơjrañ di añ; mơ añ neh tơnroh ală cau sò tơm di añ.

⁴² Bol khai kơp gơn, mơya ò gơs cau lơi dong klàs bol khai, bol khai hòi dan mơ Yàng Jehôwa mơya Kơnràñ ò ho wơl bol khai in.

⁴³ Añ pòng tơnlề bol khai ò gơkrơi be thul tòm ù; añ tơnlề mơ jă hơđang bol khai kung be bŏ tòm ală gùng.

⁴⁴ Yàng neh dong tă añ klàs bơh di bơta brồ lơh làng bol añ jê; Yàng neh sền gàr añ be cau lam bồ ală lơgar; Làng bol mơ añ òhềt git duh broă añ,

⁴⁵ mơ ală cau làng bol bơdìh duh rngòt di añ; tòm tŭ kơno bơh añ gen bol khai dòn bơr añ.

⁴⁶ Jơh tơl nă bol khai roh nùs, bol khai rơm să rngòt lik bơh di tiah kìng crŭ kơ̆ cê bol khai dê.

⁴⁷ Yàng Jehôwa kis gam sùm sùm! Pal jòng ro Pơnai lŭ dờng añ jê! Yò tơngguh tĕ Yàng Tom Trồ añ jê la Pơnai lŭ dờng mơ la Bơtau dong klàs añ jê!

⁴⁸ Kơnràñ la Yàng Tom Trồ ai bơta sal tê añ in, la cèng tơmù ală làng bol hơđơm añ.

⁴⁹ Kơnràñ dong tă añ klàs bơh di ală cau sò tơm di añ. Yàng neh yò tơngguh añ hơđang ală cau sòdră di añ, neh dong tă añ klàs bơh di ală cau rhung rhang.

⁵⁰ Ơ Yàng Jehôwa! Tài bơh hơ̆ añ jòng ro Kơnràñ digùl ală làng bol, añ rơp đơs chò jòng ro sơnđan Kơnràñ dê.

⁵¹ Kơnràñ la theng bơta dong klàs bơtau Kơnràñ dê, Kơnràñ yal tơlik bơta kòñ gơboh kơ̆ dơn cau geh bong mơñà Kơnràñ in, hơ̆ la ai Dabit mơ jơi bơtiàn khai in jơl tus sùm sùm.”