II Samuel 21 - Sră Goh 2018

Bơta sal tê cau Gabaôn dê

¹ Tŭ hơ̆ gơs dô bơta jơgloh rung tòm pe sơnam tòm rài Dabit dê, bơh nam do tus nam ne; mơ Dabit hòi lùp Yàng Jehôwa. Yàng Jehôwa đơs lah: “Hơ̆ la bơh glài lơh gơtuh mhàm Sol mơ hìu nhă khai dê, tài bơh khai neh tơnchơt cau Gabaôn.”

² Behơ̆ cau bơtau sồr hòi cau Gabaôn tus mơ tòmbơhbơr mơ bol khai. (Tŭ hơ̆ cau Gabaôn ò di la dô pơnah tòm làng bol Israel, mơya bol khai la cau Amôr gam kis; bulah làng bol Israel neh srat să ho nền ò tơnroh bol khai, mơya Sol neh kòñ pơs tơlik bol khai, bơh nùs ngac ngar khai dê bơh làng bol Israel mơ Juda).

³ Dabit lùp cau Gabaôn lah: “Ñchi bơta añ pal lơh bol mê in taih? Mbe añ kòñ lơh nàng tơwài glài nàng dan bol mê ai lơngai sre brê Yàng Jehôwa in taih?”

⁴ Cau Gabaôn ho lah: “Bol hi ò gơs gơnoar dan màh hala priă bơh di Sol hala bơh di hìu nhă khai dê, bol hi kung ò gơs gơnoar tơnchơt dô nă cau lơi tòm Israel.” Dabit lùp lah: “Ñchi bol mê đơs nàng añ pal lơh bol mê in taih?”

⁵ Bol khai ho mơ bơtau lah: “Gơwèt mơ cau neh tơnroh mơ neh jòi kai tòmdră mơ bol hi, tian gơs bol hi ò gam gơs tiah tòm ù tiah Israel dê,

⁶ gen dan jào tĕ bol hi in poh nă cau tòm ală kòn klau khai dê nàng bol hi tơnchơt mơ yồng ƀồc bol khai di đap Yàng Jehôwa tòm Gibea, hơđang mơnơm Yàng Jehôwa.” Behơ̆, bơtau đơs lah: “Añ rơp jào bol khai bol mê in.”

⁷ Dabit lòi wơl Mephibôset, kòn klau Jônathan, sau Sol dê, tài bơh bơta srat să ho bal digùl Dabit mơ Jônathan kòn klau Sol dê di đap Yàng Jehôwa.

⁸ Mơya bơtau kup bàr nă kòn klau Rispa kòn ùr Aiya dê neh tơnggơs Sol in la Armôni mơ Mephibôset, mơ pram nă kòn klau Merap kòn ùr Sol neh tơnggơs Adriel in, kòn klau Barjilai tòm Mehôla,

⁹ bơtau jào bol khai cau Gabaôn in. Cau Gabaôn tơnchơt bol khai mơ yồng ƀồc bol khai hơđang mơnơm di đap Yàng Jehôwa. Jơh poh nă cau hơ̆ kong chơt dô bă bal; bol khai kong tơnchơt di di ngai bồ kơnhai toès, di tŭ cau rơp sơntòm toès kòi mac.

¹⁰ Rispa, kòn ùr Aija, ai ồi ào sơnò kiat mơ lă khai in hơđang dô nơm pơnai lŭ. Bơh di ngai bồ kơnhai toès jơl tus di tŭ gơs mìu bơh đang trồ dùh hơđang ală ƀồc bol khai, khai ò ai sềm rơp hơđang ƀồc tòm trồ ngai, hala phan poan jơng tus rềp tòm trồ mang.

¹¹ Tòm tŭ Dabit kơno cau yal wơl bơh bơta Rispa, kòn ùr Aija, bau cồng Sol dê neh lơh,

¹² gen khai lòt tus hơ làng bol Jabe tòm Galaat, ai ntìng ƀồc Sol mơ Jônathan, kòn klau Sol dê. (Bol hơ̆ neh cèng òm bol khai bơh Betsan, la tiah cau Philistin yồng bol khai tơnơ̆ mơ tŭ bol khai neh tơnchơt Sol hơđang Gilbôa.)

¹³ Dabit cèng ntìng ƀồc Sol mơ Jônathan, kòn klau khai dê bơh tềng hơ̆, bal mơ ntìng ƀồc ală cau neh kong tơnchơt mơ yồng tềng hơ̆.

¹⁴ Bol khai tơp ntìng ƀồc Sol mơ Jônathan, kòn klau khai dê, tòm bơtô ƀồc Kis bèp Sol dê, tòm Sela, tòm Benjamin, mơ lơh jat jơh ală bơta be bơtau neh sồr. Tơnơ̆ mơ hơ̆ Yàng Tom Trồ ho wơl jơnau hòi dan lơgar in.

Ală bơta tòmlơh mơ cau Philistin

¹⁵ Cau Philistin lòt tòmlơh tai mơ cau Israel. Dabit lòt bal mơ ală cau khai dê nàng tòmlơh mơ cau Philistin, mơ khai gơlik lơbơn òsô.

¹⁶ Tŭ hơ̆, dô nă tòm ală kòn sau Rapha dê la Isbibenôp ngui tà kòng kơnjơ̆ pe rhiang sieklơ mơ kơt đào pa di but, đơs lah khai rơp tơnchơt Dabit.

¹⁷ Mơya Abisai, kòn klau Jeruyah, tus dong kòl Dabit; Abisai tòmlơh pha rlau mơ tơnchơt cau Philistin hơ̆. Gen ală cau duh broă Dabit dê srat să mơ khai mơ đơs lah: “Bơtau bañ gơs tŭ lơi lik lòt tòmlơh tai bal mơ bol hi, tồ ồs đèng Israel dê rơp ò kòl đơp chơt.”

¹⁸ Tơnơ̆ hơ̆ gơs dô bơta tòmlơh ndai digùl cau Philistin tòm Gop. Sipbekai, cau Husat tơnchơt Sap, la dô nă tòm ală kòn sau Rapha dê.

¹⁹ Tòm dô bơta tòmlơh tai mơ cau Philistin tòm Gop. Elhanan, kòn klau Jaare Oregim cau Betlehem tơnchơt Gôliat cau Gat, la cau gơs dô nơm tà gơs ngkơr kung be gai pồt brài cau tàñ ồi dê.

²⁰ Gam dô bơta tòmlơh tai gơlik gơs tòm Gat, tềng hơ̆ gơs dô nă cau dờng jơnhoa gơrê bal mơ jơi bơtiàn Repha; khai gơs prau nơm kòn tê di kòp nơm mpàng tê mơ prau nơm kòn jơng di kòp nơm pàng jơng, jơh ală la bàr jơt poan nơm.

²¹ Tòm tŭ khai bơtat bơtròh Israel gen Jônathan kòn klau Simea bi Dabit dê, neh tơnchơt khai.

²² Poan nă cau Philistin do la kòn sau Rapha ơm tòm Gat, mơ bol khai kong tơnchơt bơh tê Dabit mơ bơh tê ală cau duh broă bơtau dê.